Staŭ płatnym samy papularny ŭ biełarusaŭ VPN. Ale pakul nie dla ŭsich
U Biełarusi dla karystalnikaŭ ajfonaŭ staŭ płatnym VPN Psiphon. Pra novyja praviły karystańnia paviedamili čytačy vydańnia Tochka.by.
Pry sprobie ŭvachodu ŭ prahramu ŭładalnikam ajfonaŭ vystaŭlajucca płaški nastupnaha źmiestu:
«Psiphon bolš nie biaspłatny ŭ vašym rehijonie. Dapamažycie zachavać Psiphon biaspłatnym dla tych, chto bolš za ŭsio ŭ im maje patrebu! Padpišyciesia zaraz ci kupicie Speed Boost».
Za tydniovuju padpisku prahrama prosić zapłacić 2,99 dalara, za miesiačnuju — 9,99, a hadavaja abyjdziecca ŭ 71,99. Paśla jaje kupli stvaralniki abiacajuć pavialičyć chutkaść internetu i prybrać rekłamu. Padpiska budzie praciahvacca aŭtamatyčna, a adklučyć jaje možna ŭ luby momant.
Jość i bolš tannaja pasłuha, Speed Boost, jakaja dazvalaje tolki pavialičyć chutkaść internetu. Padklučyć jaje možna za ŭnutranuju valutu prahramy, jakuju možna nabyć za sapraŭdnyja hrošy.
Padpiska na miesiac tut kaštuje 3000 PsiCash, kupić 4000 PsiCash možna za 3,99 dalara.
Płatnaja padpiska źjaviłasia paśla niadaŭniaha abnaŭleńnia prahramy. Nie vyklučana, što z nastupnym abnaŭleńniem biaspłatnaje skarystańnie skončycca i dla karystalnikaŭ Android.
Kamientary