«Ciapier ja absalutna ščaślivaja, a ščaślivaja, tamu što volnaja». Meryjem Hierasimienka evakuiravali ź Biełarusi
Meryjem Hierasimienka, jakuju asudzili da troch hadoŭ «chatniaj chimii» za pieśniu «Okieana Elzi», pakinuła Biełaruś.
Pra heta śpiavačka napisała ŭ sacsietkach.
«Dobi volny» — u hetych słovach ciapier dla mianie stolki sensu. Kali b u mianie spytali: «Što dla ciabie ščaście?», ja b z upeŭnienaściu skazała: «Svaboda! Svaboda pieramiaščeńnia, svaboda dumak, svaboda zajmacca tym, što lubiš i čym haryš. Svaboda — heta samaje hałoŭnaje dla mianie.
Siońnia ja pračnułasia ščaślivaj…
Ja pakinuła Biełaruś! Hetaj padziei nakanavana było adbycca», — napisała śpiavačka.
Jana padziakavała «Bajsołu» i Andreju Stryžaku za dapamohu ŭ evakuacyi.
«Samaje hałoŭnaje, ja chaču kab vy viedali, maje darahija, zaraz ja absalutna ščaślivaja, a ščaślivaja, tamu što całkam volnaja i praciahvaju svoj jarki šlach», — dadała jana.
Biełaruś taksama pakinuli ŭładalnik bara «Banki-butelki» i jahonaja žonka. Andrej i Maryja Žuk ciapier znachodziacca ŭ Varšavie.
Meryjem Hierasimienka zatrymali 4 žniŭnia 2022 hoda paśla kancerta ŭ minskim bary «Banki-butelki», dzie śpiavačka vykonvała pieśniu «Obijmi» hurta «Okiean Elzi» ŭ padtrymku Ukrainy. Fakt vykanańnia pieśni na ŭkrainskaj movie aburyŭ prapahandystaŭ.
Paśla zatrymańnia śpiavačku dvojčy asudzili na 15 sutak pavodle administracyjnaha artykuła. Paśla pierazatrymali ŭ miežach kryminalnaj spravy i źmiaścili ŭ SIZA.
20 studzienia 2023 hoda sudździa Viktoryja Šabunia asudziła Meryjem Hierasimienka da troch hadoŭ «chatniaj chimii».
Meryjem — lidarka hurta Meriem Band i aŭtarka šmatlikich sinhłaŭ. Śpiavačka atrymała šyrokuju viadomaść paśla ŭdziełu ŭ niekalkich vakalnych šou. Tak, naprykład, jana brała ŭdzieł va ŭkrainskim piesiennym konkursie «Hołos krajini» ŭ 2018 hodzie.
U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała32
Kamientary