Amierykaniec, što źbieh u Biełaruś i źbirajecca adkryć tut restaran, spadziajecca na pamiłavańnie Trampa
Evan Ńjuman braŭ udzieł u biesparadkach u Kapitolii 6 studzienia 2021 hoda i trapiŭ u ZŠA pad kryminalny pieraśled.
Amierykanskaje vydańnie Press Democrat raskazała historyju ŭdzielnika šturmu Kapitolija Evana Ńjumana, jaki atrymaŭ palityčny prytułak u Biełarusi. Amierykaniec pryznaŭsia, što spadziajecca na pieramohu Donalda Trampa i jaho pamiłavańnie.
Pra toje, što amierykaniec paprasiŭ palityčny prytułak u Biełarusi, u listapadzie 2021 hoda paviedamiła dziaržaŭnaje telebačańnie «Biełaruś-1». U mai 2023 hoda akazałasia, Ńjuman žyvie ŭ Breście i vykładaje ŭ pryvatnaj škole zamiežnych moŭ.
Žurnalist vydańnia Press Democrat Endru Hrem pahavaryŭ z uciekačom i vyśvietliŭ novyja padrabiaznaści hetaj našumiełaj historyi. Historyju pierakazvaje Reform.by.
Evan Ńjuman pryznajecca, što sumniavajecca ŭ spraviadlivaści padliku vynikaŭ prezidenckich vybaraŭ, ale ciapier nie staŭ by ŭdzielničać u šturmie Kapitolija 6 studzienia 2021 hoda. Jon sumuje pa svaich dzieciach, dvuch padletkach, jakija ŭsio jašče znachodziacca ŭ Kalifornii, i ciapier nie viedaje, jak pryvieźci ich u hości.
51-hadovamu Ńjumanu vystaŭlenaje abvinavačvańnie ŭ 14 złačynstvach, uklučajučy «napad, supraciŭ abo pieraškodu aficeram». Zhodna z abvinavaŭčym zaklučeńniem, Ńjuman na praciahu dnia napaŭ na čatyroch palicejskich, užyŭšy kułaki, a taksama schapiŭ mietaličnuju barykadu i prataraniŭ joju šarenhu palicejskich.
Jon źjechaŭ z ZŠA praź miesiac paśla biesparadkaŭ u Italiju «ŭ kamandziroŭku». U artykule śćviardžajecca, što adtul jon pierabraŭsia va Ukrainu. Viadoma, što pamiž Italijaj i Ukrainaj jon paśpieŭ pabyvać u Šviejcaryi, Hiermanii i Polščy.
U artykule śćviardžajecca, što va Ukrainie jon pracavaŭ na šachcie (u Žytomiry), zajmajučysia prodažami na amierykanski rynak. U žniŭni 2021 hoda jon źbieh z hetaj krainy pieššu, bajučysia aryštu pierad samitam ukrainskich i amierykanskich aficyjnych asob. Ńjuman śćviardžaje, što jaho nibyta pieraśledavali, jon ledź paźbieh aryštu i bajaŭsia stać raźmiennaj manietaj u sprobach Ukrainy atrymać amierykanskuju zbroju.
Ciapier jon žyvie ŭ Breście, imkniecca nie dumać pra minułaje i płanuje adkryć restaran amierykanskaj kuchni. Heta buduć nie hamburhiery.
«Ja dumaju pra svaju budučyniu, svoj biznes … Mnie padabajecca ideja padaryć žycharam Biełarusi smačnuju ježu», — pryznaŭsia jon žurnalistu.
Ciapier, kali ŭ jaho jość dakumienty biežanca, jon moža svabodna pierasoŭvacca pa krainie i za miažoj, choć jon nie pakidaŭ Biełaruś z-za bojazi, što jaho aryštujuć i ekstradujuć. Jamu padabajecca Brest, horad, u jakim jon čakaŭ, pakul razhladałasia jaho zajava ab pradastaŭleńni prytułku, i vyrašyŭ zastacca tam.
Ńjuman raspavioŭ žurnalistu, što Brescki rehijon robić pradukty charčavańnia, tut raźvita miasnaja žyviołahadoŭla i lasy poŭnyja dzikich jahad i hryboŭ, naprykład, čarnic i lisičak. U Bresckaj vobłaści niama vinahradnikaŭ, ale ź jaho pryrodnymi i sielskahaspadarčymi bahaćciami «heta krychu padobna na akruhu Sanoma ŭ Kalifornii».
I ŭsio ž Ńjuman spadziajecca viarnucca na radzimu. «Sumavać pa padletkavym uzroście maich dziaciej vielmi ciažka», — pryznajecca jon.
Jon miarkuje, što jaho najlepšaja nadzieja ŭ tym, što Donald Tramp budzie abrany ŭ listapadzie i paśla svajoj inaŭhuracyi ŭvasobić u žyćcio svaje prapanovy ab pamiłavańni ŭsich, chto abvinavačvajecca ŭ złačynstvach, źviazanych sa šturmam Kapitolija.
«Tramp jość Tramp, — skazaŭ Ńjuman. — Jon moža skazać niešta siońnia, a zaŭtra vyrašyć, što heta niazručna».
Ńjuman aceńvaje vierahodnaść źniaćcia ź jaho abvinavačvańniaŭ prykładna ŭ 25%. «50 na 50 za toje, što Tramp moža być abrany, a zatym 50 na 50 za toje, što jon moža atrymać amnistyju», — patłumačyŭ jon.
Vydańnie Press Democrat pahavaryła z amierykanskimi ekśpiertami pa ekstremiźmie.
Jany miarkujuć, što na radzimie Ńjumanu pahražaje ŭ siarednim ad 2,5 da 5 hadoŭ turmy, bo siaredni termin pakarańnia dla ludziej, jakija pryznali siabie vinavatymi va ŭčynieńni ciažkich złačynstvaŭ padčas paŭstańnia 2021 hoda, skłaŭ blizu 2,5 hadoŭ, a siaredni termin pakarańnia dla asudžanych padčas sudovaha razboru — blizu piaci hadoŭ.
Evan Ńjuman dahetul znachodzicca ŭ vyšuku FBR. Tam paznačana, što, pavodle zdahadak, Ńjuman biŭsia z palicyjaj Kapitolija ZŠA i supracoŭnikami haradskoj upravy palicyi Vašynhtona jak unutry, tak i za miežami Kapitolija. Jaho varta ličyć uzbrojenym i niebiaśpiečnym.
Kamientary