Spartyŭny čynoŭnik ličyć, što biełarusam lepš jechać na spabornictvy ŭ Rasiju, čym na Alimpijadu ŭ Paryž
Staršynia Biełaruskaj fiedieracyi lohkaj atletyki, alimpijski pryzior u špurlańni mołatu Ivan Cichan raskazaŭ pra pierśpiektyvy alimpijskaha siezona i šancy, ci stanie jon naohuł alimpijskim dla biełarusaŭ.
Nahadajem, što biełaruskija i rasijskija spartoŭcy dapuščany da Letnich alimpijskich hulniaŭ u niejtralnym statusie z patrabavańniem adchryścicca ad padtrymki rasijskaj ahresii va Ukrainie. Taksama, kab trapić u Paryž-2024, treba zavajavać licenzii (pieramahčy ŭ kvalifikacyjnych spabornictvach), a čas idzie.
— Kali biełaruski spartoviec usio ž pajedzie na Alimpijadu, jon adpravicca tudy adzin?
— Tak, nikoha pobač z atletam nie budzie: ni treniera, ni servis-piersanału. Heta ŭžo nie roŭnyja ŭmovy, bo na nas cisnuć takim čynam sa boku. Lohkaja atletyka raźvivajecca ŭžo bolš za sto hadoŭ, vyniki vysokija i drobiaziaŭ nie byvaje. A ŭsie hetyja drobiazi vielmi mocna buduć upłyvać na vynik spartoŭca na Alimpijadzie. Plus psichałahičnaje ŭździejańnie. Taki niehatyŭny dośvied nie chočacca davać maładym spartoŭcam asabliva.
Jany pakazvajuć dobryja vyniki, ale psichałahična na ich budzie akazany vialiki cisk. Navošta jamu pryvozić drenny vynik i z takim dośviedam žyć usio žyćcio?
Vielmi šmat takich vypadkaŭ zafiksavana ŭ historyi sportu: kali lideram roznymi sposabami śpiecyjalna pieraškadžali pakazać svoj najlepšy vynik. Mohuć padniać niapravilny ściah ci jašče što.
Tamu kidać tam rabiat adnych nie chaciełasia b. Lepš, jak ja baču, atrymać stanoŭčy dośvied siarod mocnych spartoŭcaŭ u Rasii, čym jechać tudy.
Asabistyja rekordy nichto nie zabiraŭ i nie zabiare, ich možna praciahvać stavić u inšym miescy.
— Spartsmieny razumiejuć, jak pravilna siabie pavodzić?
— Tak. My im tłumačyli, što pa pryjeździe ich mohuć zavieźci, naprykład, na dadatkovy kantrol. Abo aficery pryjduć u 22:50, kab uziać dopinh-probu, a tabie zaŭtra vystupać… Takoje ŭžo zdarałasia ŭ našaj praktycy. Tamu pravy i abaviazki atlety viedajuć. I kali ŭ pieršy hod paśla adchileńnia, ubačyŭšy niespraviadlivaść, jany prasili nas chutčej viarnuć ich na suśvietnuju arenu, to ciapier uśviedamlajuć, što siabie možna realizavać i ŭ inšych miescach. Bo ty sam sabie supiernik, pierš za ŭsio.
Dziaržaŭnaja padtrymka atletyki značnaja, stvorana Biełaruskaja liha. Tolki ŭ 2022-m było vypłačana bolš za 500 tysiač rubloŭ pryzavych. Plus kubki i čempijanaty — jašče 200 tysiač. Uvohule, dadatkovaje stymulavańnie spartsmieny atrymlivali i atrymajuć dalej, — supakojvaje kiraŭnik BFŁA.
Kamientary