Mižnarodny alimpijski kamitet jašče raz pravieryć imavierny dopusk biełarusaŭ na Alimpijadu
Da Hulniaŭ byli abjaŭlenyja dadatkovyja kryteryi dopusku, tamu patrebna pravierka.
Spartoŭcaŭ ź Biełarusi i Rasii, jakija adabralisia na Alimpijadu i atrymali dopusk, jašče raz pravierać niezaležnyja analityki, zajaviŭ dyrektar Mižnarodnaha alimpijskaha kamiteta (MAK) pa kamunikacyjach Mark Adams, piša «Sputnik».
Jon adznačyŭ, što spabornictvy z udziełam spartsmienaŭ u niejtralnym statusie byli praviedzieny na ŭmovach mižnarodnych fiederacyj, ale da Hulniaŭ byli abjaŭleny dadatkovyja kryteryi dopusku, tamu patrebna pravierka.
«Što tyčycca pracesu, to my ŭ ciapierašni čas zajmajemsia vyznačeńniem i pryznačeńniem niezaležnych analitykaŭ z hodnaj reputacyjaj, jakija pravierać kožnaha atleta, kab jany nie parušali krytery. Možacie być upeŭnienyja: užo byŭ adzin praces, budzie praviedzieny jašče adzin z boku Mak z zadziejničańniem niezaležnych analitykaŭ», — skazaŭ Adams.
U dačynieńni da atletaŭ ź Biełarusi i Rasii byli ŭviedzienyja sankcyi ŭ sakaviku 2022 hoda paśla poŭnamaštabnaha ŭvarvańnia Rasii va Ukrainu. Mnohija fiederacyi zabaranili pad svajoj ehidaj pravodzić u Biełarusi i Rasii mižnarodnyja spabornictvy.
U sakaviku 2023-ha, MAK rekamiendavaŭ mižnarodnym fiederacyjam dapuskać da startaŭ rasijan i biełarusaŭ, jakija nie padtrymlivali vajnu, ale tolki ŭ statusie niejtralnych atletaŭ.
XXXIII Alimpijskija Hulni 2024 hoda projduć u Paryžy z 26 lipienia pa 11 žniŭnia.
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»1
Kamientary