Ukraincy zabili rasijskaha pałonnaha, bo jaho žonka nie dasłała hołaje fota? Zdajecca, znoŭ fejk
Niekalki dzion tamu ŭ rasijskich ŚMI i Z-błohieraŭ prajšła publikacyja pra biesčałaviečnaje abychodžańnie z rasijskim pałonnym. Na skrynšotach byli pakazany frahmienty pierapiski byccam by ŭkrainskich vajennych z hramadzianskaj žonkaj 44-hadovaha pałonnaha Alaksieja Motuza. Ad jaje patrabavali dasłać hołyja zdymki, inačaj by jaje muža zabili. Jana nie stała ničoha adpraŭlać. Tady žoncy dasłali zdymki ruki z adrezanymi palcami, prastrelenaj nahi, a taksama cieła vajennaha paśla mierkavanaha zabojstva.
Aŭtary publikacyj i Z-błohiery ŭ adzin hołas asudžali źvierstvy ŭkraincaŭ i dzivilisia hieraičnym pavodzinam rasijskaha bajca. Pry hetym jany pryvodzili tolki pierapisku i zdymki biez spasyłak na krynicu infarmacyi.
Rasijskaje niezaležnaje vydańnie ASTRA zdoleła źviazacca z maci Alaksieja Motuza. Žančyna paćvierdziła, što jaje syn udzielničaŭ va ŭvarvańni na Ukrainu ŭ jakaści dobraachvotnika. Maci raspaviała, što ŭ noč na 9 studzienia 2024 hoda hramadzianskaj žoncy Alaksieja Motuza nieviadomyja napisali ŭ telehram z ukrainskaha numaru.
Vydańnie źviartaje ŭvahu na toje, što numar telefona nie byŭ schavany, chacia ŭ telehram jość takaja funkcyja. U pierapiscy žoncy prapanoŭvali adpravić svaje intymnyja zdymki. U advarotnym vypadku pahražali, što jaje muža buduć pavolna zabivać. Ź nieviadomymi kamunikavali jak žonka, tak i maci.
Pa słovach maci, Alaksiej apošni raz vychodziŭ ź joj na suviaź 5 studzienia. Tady jon paviedamiŭ: «My pajšli na šturm». Nieviadomyja napisali praz try dni paśla hetaha.
«My sprabavali niejak razrulić situacyju, ale nie atrymałasia. Ja prasiła ich, kab nie ździekavalisia z syna. U apošnim paviedamleńni jany skinuli jaho zastrelenaha ŭ hałavu, paśla hetaha pierastali vychodzić na suviaź», — cytuje ASTRA słovy maci.
Pa słovach žančyny, na fota sapraŭdy jaje syn. Ale nijakaj aficyjnaj infarmacyi jana nie maje. Ź joj nichto z kamandziraŭ nie źviazvaŭsia. Žančyna spadziajecca, što heta byŭ žart.
U toj ža čas žurnalisty zmahli vyśvietlić, što prynamsi adzin z dasłanych zdymkaŭ nie źjaŭlajecca datyčnym historyi. Jon byŭ apublikavany 21 studzienia 2022 hoda va ŭkrainskim vydańni Depo.ua u natatcy «Zakarpackija daktary pryšyli chłopcu adrezanyja palcy».
U navinie było apublikavana fota ruki 16-hadovaha ŭkrainskaha chłopca, jaki padčas raboty z cyrkularnaj piłoj vypadkova adrezaŭ sabie ŭsie piać palcaŭ. Zdymak ukrainskaha vydańnia poŭnaściu supadaje z tym, jakoje było adpraŭlena rodnym Alaksieja.
ASTRA pasprabavała źviazacca z kantaktam, ź jakoha maci i hramadzianskaj žoncy pisali nieviadomyja. Ni ŭ telehramie, ni pa sotavaj suviazi źviazacca nie ŭdałosia. Ukrainskija i rasijskija aficyjnyja viedamstvy pakul nie kamientavali situacyju.
Čytajcie jašče:
MZS Rasii vydała ruku Zialenskaha za ruku vajskoŭca z tatuiroŭkaj «Boha niama»
U tvitary zavirusiłasia videa elektronnaha branzaleta dla dziaciej. Ale heta fejk
Ciapier čytajuć
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj11
Kamientary
Pora užie vzrośleť i samim formirovať novosti i narativy a nie kopipastiť vsie i vsia da jeŝie ot vraha Biełarusi.