Ukraina rychtavałasia da adbićcia poŭnamaštabnaj ahresii na praciahu 5 miesiacaŭ — Paŭluk
Pradstaŭniki kamandavańnia Uzbrojenych sił Ukrainy jašče vosieńniu 2021 hoda adznačali vielmi vialikuju vierahodnaść pačatku Rasijaj šyrokamaštabnaj vajennaj ahresii suprać Ukrainy i rychtavalisia da jaje, zajaviŭ kamandujučy Suchaputnymi vojskami USU hienierał-lejtenant Alaksandr Paŭluk u intervju «Radyjo Svaboda».
Paŭluk byŭ pryznačany kamandujučym Apieracyjaj abjadnanych sił u lipieni 2021 hoda. Pavodle jaho, užo vosieńniu jon razumieŭ «vielmi vialikuju vierahodnaść, što budzie poŭnamaštabnaja vajna».
«Pra jaje maštaby było jašče ciažka razumieć, ale što jana, jak minimum, zachopić terytoryju Łuhanskaj i Danieckaj vobłaści — heta było vidavočna. Tamu što my analizavali dziejańni supiernika, jaho adpaviednyja previentyŭnyja miery, jaho vyviedvalnyja funkcyi, jakija jon vykonvaŭ na terytoryi uzdoŭž usioj linii sutyknieńnia, uzdoŭž miažy», — skazaŭ Paŭluk.
Pavodle jaho słoŭ, byli ŭsie prykmiety, što ŭkrainskija vojski sustrenuć voraha nie tolki z časova akupavanych rajonaŭ Danieckaj i Łuhanskaj abłaściej, ale i z terytoryi Rasii.
«Tamu ŭžo z vosieni my prystupili da vykanańnia peŭnych dziejańniaŭ dla taho, kab paśpiachova sustreć i nanieści jamu maksimalnuju parazu. Razumiejučy, što suadnosiny sił i srodkaŭ byli i buduć nie na našu karyść, ale ŭ nas usio roŭna varyjantaŭ nie było — my pavinny byli vystajać, tamu što za nami była ŭsia Ukraina. Tamu na praciahu piaci miesiacaŭ my rychtavalisia da adbićcia poŭnamaštabnaj ahresii», — skazaŭ jon.
Paŭluk dadaŭ, što ŭžo ŭ studzieni-lutym 2022 hoda byli paviedamleńni ad Hałoŭnaha ŭpraŭleńnia raźviedki, u jakich mierkavałasia, što taki varyjant mahčymy.
«I na luty miesiac my zrabili maksimalna ŭsio, kab dastojna sustreć voraha: usie pazicyi byli maksimalna ŭzmocnieny, praličany ŭsie mahčymyja varyjanty dziejańniaŭ, pieramieščany ŭsie reziervy — my dva razy, jak minimum, pravodzili poŭnamaštabnuju treniroŭku, a łakalnych trenirovak było praviedziena vielmi šmat», — raspavioŭ Paŭluk.
Jon havoryć, što heta adyhrała «svaju, mahčyma, vyrašalnuju rolu».
«Što ŭ pieršy dzień, kali byŭ naniesieny ŭdar pa ŭsich kamandnych centrach, pa ŭsich punktach kiravańnia, pa ŭsich miescach, dzie pavinny być navały našych vojskaŭ i składy — jany [udary] prajšli ŭ pustoje miesca», — rastłumačyŭ hienierał-lejtenant.
Čytajcie taksama:
«16 tysiač biezzvarotnych strat». Aŭdziejeŭka vačyma rasijskich vajenkaraŭ
Ukrainskija vojski pakinuli Aŭdziejeŭku. Jakoje heta maje značeńnie?
Ciapier čytajuć
Na Dzień Voli i dzień inaŭhuracyi Łukašenki ŭ Biełarusi abmiažujuć internet4
Kamientary