Śviedčańni pra pieražyty seksualny hvałt mužčyny publikujuć na svaich staronkach u sacyjalnych sietkach. Ich vypadki majuć značnyja adroźnieńni ad vypadkaŭ z žančynami i ŭzdymajuć važnuju prablemu, jakaja isnuje ŭ hramadstvie.
Jak piša Le Monde, chešteh #metoogarcons byŭ zapuščany 22 lutaha akcioram Aŭrylenam Vikam (Aurélien Wiik), jaki va ŭzroście ad 11 da 15 hadoŭ sam byŭ achviaraj hvałtu z boku svajho ahienta i ludziej ź jahonaha atačeńnia.
Chešteh chutka raspaŭsiudziŭsia, i ciapier sacyjalnyja sietki napoŭnienyja śviedčańniami mužčyn usich uzrostaŭ ab tym, jak jany stali achviarami seksualnaha hvałtu, žorstkaha abychodžańnia ŭ dziacinstvie abo padletkavym uzroście z boku ludziej ź ich asiarodździa, radziej — z boku nieznajomcaŭ.
Vydańnie cytuje niekatoryja zapisy: «Kali mnie było 11, moj starejšy brat paprasiŭ mianie zaniacca ź im aralnym seksam»; «Ja staŭ achviaraj seksualnych dotykaŭ z boku stryječnaha brata, jakoha bačyŭ kožnaje leta»; «Siamiejny doktar dakranaŭsia da mianie, kali mnie było 16»; «Z 9 da 15 hadoŭ ja padviarhaŭsia hvałtu z boku ajčyma».
Pa danych Ministerstva ŭnutranych spraŭ Francyi, u 2022 hodzie ŭ 13% usich zarehistravanych vypadkaŭ seksualnaha hvałtu achviarami byli mužčyny. Ale, u adroźnieńnie ad žančyn, jakija cierpiać ad hetaha na praciahu ŭsiaho žyćcia, u vypadku mužčyn situacyja vyhladaje inakš.
Jak pakazała apytańnie, praviedzienaje ŭ 2015 hodzie siarod 27 tysiač mužčyn i žančyn va ŭzroście ad 20 da 69 hadoŭ, 80% mužčyn stali achviarami va ŭzroście da 18 hadoŭ. Pra toje, što zaznavali seksualny hvałt na praciahu ŭsiaho žyćcia, paviedamili 3,9% mužčyn i 14,5% žančyn.
Daktarant Škoły pierśpiektyŭnych daśledavańniaŭ u halinie sacyjalnych navuk i Nacyjanalnaha instytuta demahrafičnych daśledavańniaŭ Lusi Viki (Lucie Wicky) u intervju vydańniu adznačyła, što 90% vypadkaŭ hvałtu ŭ adnosinach da mužčyn taksama ździajśniajuć inšyja mužčyny, i heta nie zaŭsiody darosłyja. Isnuje mnostva śviedčańniaŭ ab złoŭžyvańniach, ździejśnienych inšymi niepaŭnaletnimi, jakija starejšyja za achviar.
Hetaja asablivaść charakternaja dla chłopčykaŭ, u toj čas jak dziaŭčynki čaściej padviarhajucca napadam z boku darosłych mužčyn. Pa słovach Viki, ahresary vykarystoŭvajuć svaje namiery pad markaj hulniaŭ i dałučeńnia da seksualnaha žyćcia.
Kali da 12-hadovaha ŭzrostu seksualny hvałt, jakomu padviarhajucca chłopčyki, u pieravažnaj bolšaści vypadkaŭ ździajśniajecca kimści ź siamji ci blizkaha atačeńnia, to paśla hetaha ŭzrostu jon adbyvajecca ŭ «inšych prastorach znosin — u škole ci internacie, padčas zaniatkaŭ sportam ci praviadzieńnia volnaha času». Seksualny hvałt, jakomu padviarhajucca padletki, taksama časam zjaŭlajecca častkaj prynižeńniaŭ u škole.
Taksama šmat śviedčańniaŭ pra seksualny hvałt, jaki zaznali padletki padčas pieršych homaseksualnych adnosin. Na dumku Lusi Viki, «kali hieteraseksualnyja mužčyny časta ŭstupajuć u seksualnyja adnosiny z maładziejšymi žančynami, to ŭ hiejaŭ usio naadvarot. Ich inicyjujuć starejšyja mužčyny, i časam im ciažka skazać «nie».
U svaich apaviadańniach achviary hvałtu taksama vielmi časta adznačajuć, što kali jany kazali pra zdareńnie, im nie vieryli ni navakolnyja, ni palicyja. Pa słovach antrapołaha i aktyvista pa abaronie dziaciej Arno Hale (Arnaud Gallais), jaki sam u dziacinstvie byŭ achviaraj incestu,
«my žyviem u hramadstvie, dzie havorym sabie, što chłopčyk nie moža być achviaraj. My miarkujem, što jon zaŭsiody zmoža abaranicca».
Śpiecyjalisty adznačajuć značnyja ciažkaści ŭ raspaznańni seksualnaha hvałtu. U hramadstvie isnuje praktyka zamoŭčvańnia takich faktaŭ. Dzieci niezaležna ad połu zastajucca niedastatkova pačutymi, ich słovy nie ŭsprymajucca ŭsurjoz.
Čytajcie jašče:
Hetaja vystava dakazvaje, što vopratka i seksualny hvałt nijak nie źviazanyja FOTY
«Vulharnaść i hvałt». U ZŠA prymajuć Bibliju sa škoł
U Brytanii dziaŭčynu asudzili na siem hadoŭ za chatni hvałt z bojfrenda
Ciapier čytajuć
Muž Siamaški byŭ nie adzinym, chto atrymaŭ pašpart prykryćcia 13 lutaha 2018 hoda46
Kamientary
https://dck8xvlq18iei.cloudfront.net/337474