Zbornaja Litvy nie choča hulać ź biełaruskami ŭ futboł. I navat zhodnaja na dźvie techničnyja parazy

Traplańnie ŭ adnu hrupu z padapiečnymi Juryja Malejeva nie ŭzradavała našych paŭnočna-zachodnich susiedziaŭ. Tam ad samaha pačatku poŭnamaštabnaj vajny va Ukrainie paśladoŭna prytrymlivajucca pazicyi, što da jaje zakančeńnia rasijskija i biełaruskija spartsmieny nie pavinny ŭdzielničać u mižnarodnych spabornictvach. A hod tamu litoŭski Siejm adnahałosna pryniaŭ rezalucyju, jakaja zaklikaje da zabarony biełaruska-rasijskaha ŭdziełu ŭ Alimpijadzie-2024. Pry hetym svaim spartsmienam spaborničać z pradstaŭnikami Biełarusi i RF litoŭskija palityki nie zabaraniali, piša «Trybuna».

Dyk voś, z toj pary, jak pačałasia vajna, litoŭcy ŭžo ŭ jaki raz natraplajuć na biełarusaŭ u futbole i nie atrymlivajuć ad hetaha nijakaj radaści. Spačatku losavańnie źviało zbornyja ŭ futzale. Litva ŭvohule nie chacieła hulać ź biełarusami, ale pad pahrozaj bana ad UEFA pahadziłasia pravieści dva matčy na niejtralnaj terytoryi ŭ Armienii — i niečakana vykinuła supiernika z kvalifikacyi da čempijanatu śvietu.

Druhi raz musili sustrecca ŭžo mužčynskija futbolnyja zbornyja Litvy i Biełarusi ŭ stykach za prava zastacca ŭ dyvizijonie S Lihi nacyj. Adnak praz padaŭžeńnie bana Rasii kamanda Ałosa aŭtamatam zachavała prava hulać u dyvizijonie S, a Litva atrymała ŭ stykach Hibrałtar.

A ciapier hulać ź Biełaruśsiu pavinna ŭžo žanočaja zbornaja Litvy — i znoŭ prablema. Prezident litoŭskaj fiederacyi futboła Edharas Stankiavičus nazvaŭ čarhovaje pierasiačeńnie ź biełaruskim supiernikam praklonam. A jašče zajaviŭ, što hulać z kamandaj Malejeva litoŭski bok nie maje namieru:

«Los hraje z nami zły žart. U nas jość hety praklon, jaki zvodzić nas ź Biełaruśsiu. U minułym hodzie hulali zbornyja pa mini-futbole, pavinny byli sustrecca i mužčynskija zbornyja ŭ vialikim futbole, ale ŭdałosia zmanieŭravać i nie zhulać. Ciapier fartuna «ŭśmichnułasia» žanočaj zbornaj. Kali kazać pra spartyŭny bok, to losavańnie całkam spryjalnaje.

Usie try kamandy možna pieramahčy, ale hulać ź Biełaruśsiu my dakładna nie płanujem», — zajaviŭ Stankiavičus.

Svaju zajavu kiraŭnik futboła Litvy padmacoŭvaje taksama hatoŭnaściu atrymać pakarańnie ad UEFA, praŭda, raźličvaje, što jano abmiažujecca techničnymi parazami.

«Vielmi spadziajusia, što sankcyi abmiažujucca techničnymi parazami 0:3, i našyja dziaŭčaty praciahnuć udzielničać u adbory. Jany zdolnyja pazmahacca za druhoje miesca ŭ hrupie i miesca ŭ nastupnym raŭndzie. Ale pakul takoha precedentu nie było. Dla mianie samaje hałoŭnaje, kab nas nie dyskvalifikavali. Heta było b samym balučym, bo panizić u kłasie nas nie mohuć — dyvizijona D niama», — kanstatavaŭ Stankiavičus.

Kapitan zbornaj Milda Lužynajcie taksama skazała, što hulać ź biełaruskami Litva nie budzie, spadziejučysia, što kamanda atrymaje prosta technary i zmoža vyjści z hrupy z druhoha miesca.

«Nam nie pašancavała ź losavańniem. Pazicyja adnaznačnaja: my ź imi hulać nie budziem. Budziem šukać tavaryskija matčy, kab zachavać tonus. Z hrupy možna vychodzić. Navat biez hetych dźviuch hulniaŭ my možam finišavać druhimi ŭ hrupie», — skazała Lužynajcie.

Varta adznačyć, druhoha miesca dla prachodu dalej moža być niedastatkova. Z dyvizijona S pry najaŭnaści piaci hrup u styki vychodzić tolki try najlepšyja kamandy, jakija finišujuć na druhoj pazicyi ŭ svaich hrupach.

• 15
• 0
• 3
• 5
• 1
• 0
• 6
• 0