Pamierła Anžalika Kałatazišvili. Aktyvistka sa Słaŭharada zmahałasia za svajo žyćcio paśla pamyłkovaj apieracyi
U 40 hadoŭ Anžalicy Kałatazišvili pamyłkova dyjahnastavali rak i zrabili nie tuju apieracyju. Jana akazałasia prykutaj da invalidnaha vazka, ale zdoleła pastavić siabie na nohi. Vyjšła zamuž. Haładoŭkaj damahłasia spatkańnia sa źniavolenym mužam. Kłapaciłasia pra badziažnych žyviołaŭ. Apošnija čatyry miesiacy praviała ŭ balnicy.
«Zmahajusia za žyćcio, pakul niama čym pachvalicca. Papała na hiemadyjaliz. 10 dzion komy. Nie viedaju, ci ačuniaju. Pieražyvaju za svaich katoŭ i sabak», — napisała Anžalika Kałatazišvili za miesiac da śmierci.
A potym pierastała apaviadać pra siabie ŭ sacyjalnych sietkach, a siońnia stała viadoma, što jana pamierła 23 lutaha. Joj było 53 hady.
Anžalika Kałatazišvili sa Słaŭharada. Z 27 hadoŭ pracoŭnaha stažu trynaccać jana adrabiła ŭ miaścinach, zabrudžanych z-za Čarnobylskaj katastrofy radyjacyjaj. Heta adbiłasia na zdaroŭi. Prajavilisia prablemy z ščytavicaj, pačali razburacca kostki.
Anžalika kazała, što ŭ 2011 hodzie lekary dyjahnastavali ŭ jaje rak: sarkomu matki, jakuju vydalili razam ź jaječnikami.
Paśla apieracyi histałahičny analiz pakazaŭ, što ankałohii ŭ pacyjentki nie było. Dadatkovaje abśledavańnie paćvierdziła zachvorvańnie ščytapadobnaj załozy, z-za jakoha ŭ kaściach nie trymaŭsia kalcyj.
Anžalika damahałasia pakarańnia vinavatych. Pisała ŭ prakuraturu i ŭ Administracyju Łukašenki. Adusiul prychodzili adpiski.
Žančyna spadziavałasia, što jaje zmahańnie źmienić padychody ŭ dyjahnastavańni chvarobaŭ i ludziam nie daviadziecca prajści toje, što jana.
U 2013 hodzie paśla čatyroch apieracyj Anžalicy dali invalidnaść pieršaj hrupy. Vydali vazok. Za try hady lačeńnia ŭ jaje atrafiravalisia ciahlicy. Ale žančyna zdoleła pastavić siabie na nohi. Samastojna vychodziła na vulicu, praŭda, trymajučysia za vazok.
Pa jaje słovach, kali źjaviłasia bieź jaho na miedyka-reabilitacyjnuju ekśpiertnuju kamisiju, to čynoŭnikaŭ heta šakavała. Jany nie spadziavalisia, što žančyna naohuł vyžyvie.
U 2014 hodzie Anžalika vyjšła zamuž za hramadzianina Hruzii Kachabiera Kałatazišvili, ź jakim paznajomiłasia ŭ sacyjalnaj sietcy. U 2018-m jaho zatrymali pa abvinavačańni ŭ raspaŭsiudzie narkatyčnych rečyvaŭ.
Kali jon byŭ pad śledstvam, Anžalicy nie davali spatkańnia ź im. Tady jana abviaściła haładoŭku. Tryvała jaje pad mahiloŭskaj turmoj. Heta padziejničała.
Kachabiera Kałatazišvili asudzili na dva hady i departavali na radzimu. Anžalika damahałasia, kab jamu dazvolili viarnucca, ale marna. Paźniej jana daviedałasia, što jon žyvie ź inšaj žančynaj.
Anžalika ličyła, što muža źniavolili z-za jaje ŭpartaści ŭ abaronie svaich pravoŭ.
Jana sama trapiła pad pieraśled za padpiski na «ekstremisckija kanały».
Apošnija hady Anžalika pryśviaciła kłopatu ab badziažnych žyviołach. U jaje doma pastajanna pierabyvali katy i sabaki. Niekatorych jana sabie znachodziła na vulicach, a inšych padkidvali.
Svaju nievialikuju piensiju žančyna traciła na hadavancaŭ. Źviartałasia da ludziej ab dapamozie ŭ nabyvańni kormu dla ich.
Jašče jana šyła lalek.
Pachavali Anžaliku Kałatazišvili ŭ jaje rodnym Słaŭharadzie, vulicami jakoha jana lubiła prahulvacca. Časta prychodziła na miascovaje zamčyšča, kab pahladzieć na Sož i jaho navakolle.
«Naša Niva» — bastyjon biełaruščyny
PADTRYMAĆHladzicie taksama:
Mihrantka z Efiopii ciažarnaj lacieła ŭ Jeŭrasajuz, a naradziła ŭ Mahilovie
93-hadovy vieteran: Jaki parad, navošta?! Chiba Łukašenku karcić pakazacca ŭ maršalskim mundziry
Ciapier čytajuć
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary