Hałoŭnakamandujučy USU pra «mabilizacyju 500 tysiač»: Paśla aŭdytu hetaja ličba istotna źmienšanaja
«My čakajem, što ŭ nas budzie dastatkova ludziej, zdolnych abaraniać Radzimu», — kaža Alaksandr Syrski.
Hałoŭnakamandujučy USU Alaksandr Syrski kaža, što ŭ vyniku aŭdytu vajskovych častak Hienštab pierahledzieŭ pytańnie «mabilizacyi 500 tysiač ukraincaŭ» u bok istotnaha źmianšeńnia, dakładnuju ličbu patrebaŭ armii hienierał-pałkoŭnik pry hetym nie nazvaŭ, piša «Ukrainskaja praŭda».
«Paśla pierahladu našych unutranych resursaŭ i ŭdakładnieńnia bajavoha składu Uzbrojenych sił hetaja ličba była istotna pamienšanaja. My čakajem, što ŭ nas budzie dastatkova ludziej, zdolnych abaraniać Radzimu. Havorka idzie nie tolki pra mabilizavanych, ale i pra dobraachvotnikaŭ.
Treba ŭličvać, što ludzi — nie robaty. Jany vysilvajucca, fizična i psichałahična, asabliva va ŭmovach bajavych dziejańniaŭ.
Naprykład, tyja ludzi, jakija pryjšli ŭ vajenkamaty ŭ lutym 2022 hoda, majuć patrebu ŭ adpačynku i lačeńni. Dastatkova ŭspomnić, što bajavaja 110-ja bryhada była zadziejničana na Aŭdziejeŭskim kirunku z pačatku poŭnamaštabnaha ŭvarvańnia. Im treba adnavicca i adpačyć, i heta — abjektyŭnaja nieabchodnaść. I takich častak niamała».
Pa słovach Syrskaha, ciapier Hienštab pierahladaje kolkaść peŭnych častak, jakija nie ŭdzielničajuć u bajavych dziejańniach, na padstavie aŭdytu ich dziejnaści. Heta, maŭlaŭ, dazvoliła vyzvalić tysiačy vajskoŭcaŭ i nakiravać ich u bajavyja častki.
«Ale i pry hetym nieabchodna ŭstrymlivacca ad krajnaściaŭ. Va ŭsich armijach śvietu jość asabovy skład, jaki nie ŭdzielničaje ŭ bajavych dziejańniach, ale zabiaśpiečvaje bajavyja padraździaleńni. Heta nie mienš važnaja častka pracy», — skazaŭ hałoŭnakamandujučy.
Kamientary