Jak Biełaruś stała chabam dla luksavych aŭto ź Jeŭropy. Ličby ŭražvajuć

Napłyŭ luksavych aŭto

Ličby, pryviedzienyja Polskim ekanamičnym instytutam, adlustroŭvajuć rost ekspartu mašyn u Biełaruś nie ŭ kolkasnym vymiareńni, a ŭ vartasnym. U 2023 hodzie impart mašyn ź ES u Biełaruś dasiahnuŭ 2,62 młrd jeŭra. U paraŭnańni z 2021-m suma vyrasła na 642%.

Tamu śćviardžeńnie pra bolš, čym šaścirazovy rost impartu aŭto ŭ Biełaruś budzie pierabolšvańniem.

Ahučanyja ličby ŭ pieršuju čarhu pakazvajuć na toje, što mocna pavialičyŭsia siaredni košt aŭtamabila, jaki impartujecca z krain ES u Biełaruś.

Pra heta śviedčyć i inšy pakazčyk. Tak, naprykład, u vypadku z mašynami z abjomam ruchavika bolš za 2500 sm³ prodažy ŭ Biełaruś vyraśli na 1666% u koštavym vymiareńni.

Taksama peŭny ŭniosak u taki šalony pryrost uniesła inflacyja i suśvietny rost cen na aŭtamabili, jaki byŭ vyklikany ŭ pieršuju čarhu nastupstvami pandemii.

Ale, biezumoŭna, hałoŭny čyńnik — toje, što Biełaruś stała pieravałačnaj bazaj na šlachu ź Jeŭropy ŭ Rasiju. Jašče letam 2023 hoda ES zabaraniŭ ekspart u Rasiju mašyn z abjomam ruchavika bolš za 1,9 litra i/abo daražejšych za 50 tysiač jeŭra. Na Biełarusi hetyja abmiežavańni nie raspaŭsiudžvajucca. 

Na skaračeńnie impartu aŭto ź ES u Rasiju paŭpłyvała i toje, što rasijskija pakupniki majuć składanaści z raźlikami praz sankcyi ŭ bankaŭskaj halinie.

Ź jakich krain masava jeduć mašyny ŭ Biełaruś

Asnoŭnymi pastaŭščykami aŭtamabilaŭ u Biełaruś stali try jeŭrapiejskija krainy: Hiermanija, Polšča i Litva.

Na Hiermaniju prychodzicca kala 42% ekspartu aŭtamabilaŭ ź ES u Biełaruś, na Polšču 27% i na Litvu — 10%.

Polšča pry hetym, kali brać usie hrupy tavaraŭ, — najbujniejšy eksparcior u Biełaruś siarod krain ES. U pieryjad z 2021 pa 2023 hod polski ekspart u Biełaruś pavialičyŭsia na 2/3.

Pavialičyć

Popyt unutry Biełarusi taksama mocna pavialičyŭsia

Ale varta adznačyć, što rost impartu aŭto ź ES u Biełaruś adbyvajecca ŭ tym liku za košt unutranaha rynku.

Reč u tym, što da poŭnamaštabnaha ŭvarvańnia Rasii va Ukrainu i ŭviedzienych u adkaz sankcyj bolšaść mašyn, jakija pradavali biełaruskija dylery, vyrablalisia na zavodach u Rasii.

Paśla zychodu suśvietnych aŭtavytvorcaŭ z Rasii biełaruskija dylery ŭ bolšaści svajoj zastalisia biez pastavak novych mašyn. 

Kali ŭ davajennym 2021 hodzie było realizavana amal 47 tysiač adzinak techniki, to pa vynikach 2023 hoda dylery pradali kala 25 tysiač adzinak. A ŭ 2022 hodzie ŭsiaho 17 234 mašyny.

Pakolki popyt na aŭtamabili siarod biełaruskich pakupnikoŭ nikudy nie źnik, rasijskaj vytvorčaści znajšli zamienu.

Rost impartu aŭto ź Jeŭropy ŭ ličbavym vymiareńni vyhladaje nastupnym čynam. Kali za 2021 hod fizičnyja asoby impartavali ŭ Biełaruś z trecich krainie kala 35 tysiač mašyn, to ŭ 2022 hodzie ŭžo kala 81 tysiačy adzinak techniki. Danyja za 2023 hod adsutničajuć.

Ci zachavajecca tendencyja?

Vyhladaje, što abjomy 2023 hoda tak i zastanucca pikavymi. Minułym letam ES zabaraniŭ impart aŭto ŭ Rasiju z abjomam ruchavika bolšym za 1,9 litra abo daražejšymi za 50 tysiač jeŭra. Pakolki na Biełaruś abmiežavańni nie raspaŭsiudžvalisia, padsankcyjnyja aŭto išli ŭ Rasiju praz našu krainu. 

Ale z kanca sakavika Polšča, Litva i Łatvija ŭzmacnili kantrol za vykanańniem sankcyj. Ciapier padsankcyjnyja ŭ Rasii aŭto ŭžo nie tak prosta pravieźci praź Biełaruś. Jeŭrapiejskaja mytnia patrabuje dadatkovyja dakumienty, u tym liku paćviardžeńnie płaciažu ź biełaruskaha banku.

Jak praviła, za mašyny pryznačanyja dla pieraprodažu ŭ Rasiju, raźličvalisia najaŭnymi, kryptavalutaj abo praz afšornyja firmy. Ciapier takim mašynam ujezd u Biełaruś zakryty. Aŭto ŭ Rasiju buduć pastupać bolš składanym i darahim šlacham — praz Turcyju.

Pavialičyć

Ci ŭdałosia pabić rekordy 2010-2011 hadoŭ?

Kali hladzieć na abjomy pastavak aŭto ź Jeŭropy i ZŠA ŭ kolkasnym vymiareńni, to ciapierašniamu bumu daloka da taho, što było ŭ 2010-m — pieršaj pałovie 2011 hoda. Tady za ŭvieś 2010 hod fizičnyja asoby impartavali z trecich krain bolš za 250 tysiač aŭto, a za šeść miesiacaŭ 2011-ha — 192 tysiačy aŭto.

• 2
• 0
• 3
• 1
• 2
• 0
• 2
• 0