Sikorski: Łukašenka pavinien dakazać samastojnaść, kab vieści palityku pamiž Rasijaj i Zachadam
«Siońnia my stracili nadziei», — kanstatuje ministr zamiežnych spraŭ Polščy.
Kali Alaksandr Łukašenka choča vieści palityku pamiž Zachadam i Rasijaj, jon pavinien dakazać svaju samastojnaść. Pra heta zajaviŭ ministr zamiežnych spraŭ Polščy Radasłaŭ Sikorski, vystupajučy z dakładam ab zamiežnaj palitycy ŭrada ŭ Siejmie, piša Reform.news.
Pavodle jaho słoŭ, pastupovaja vasalizacyja Biełarusi Rasijaj pryviała da taho, što blizkaja dla Polščy kraina razhladajecca ŭ katehoryjach pahroz.
«Na žal, pastupovaja vasalizacyja Biełarusi Rasijaj pryvodzić da taho, što taksama hetuju krainu pierš za ŭsio pavinny razhladać u katehoryjach pahroz dla biaśpieki. Praciahvajecca bolš za try hady palityčny kryzis, parušeńnie pravoŭ čałavieka, biesprecedentnyja represii, padtrymka rasiejskaj ahresii suprać Ukrainy, pravakavańnie mihracyjnaha kryzisu — usio heta ŭjaŭlaje surjoznyja pahrozy dla cełaha rehijonu. Pieražyvajem za situacyju ŭ krainie, ź jakoj nas abjadnoŭvajuć stahodździ sumiesnaj historyi i mocnyja kulturnyja suviazi», — skazaŭ ministr.
Jon padkreśliŭ, što asablivuju zaniepakojenaść polskaha boku vyklikaje stanovišča polskaj mienšaści ŭ Biełarusi. Sikorski taksama adznačyŭ, što raniej Varšava pieršaj prapanoŭvała dyjałoh Minsku, ale ciapier jana rasčaravałasia ŭ biełaruskim baku.
«Asablivuju zaniepakojenaść vyklikaje stanovišča polskaj mienšaści, jakaja stała zakładnikam režymu. Biełaruskija ŭłady niasuć poŭnuju adkaznaść za najhoršy ŭ historyi stan dvuchbakovych adnosin. U minułym usie polskija ŭrady pieršymi davali impuls dla dyjałohu. Siońnia my stracili nadziei.
Umovaj viartańnia [adnosin na raniejšy ŭzrovień] źjaŭlajucca źmieny ź biełaruskaha boku. Kali Alaksandr Łukašenka choča viarnuć prastoru dla praviadzieńnia palityki pamiž Rasiejaj i Zachadam, pavinien u pieršuju čarhu pakazać, što maje choć niejkuju samastojnaść», — skazaŭ Sikorski.
Jon paćvierdziŭ, što polski ŭrad praciahnie damahacca vyzvaleńnia Andžeja Pačobuta i padtrymlivać biełaruskija demsiły.
«U sakaviku spoŭniłasia try hady, a ŭ lutym prajšoŭ hod ad skandalnaha asudžeńnia Andreja Pačobuta na 8 hadoŭ źniavoleńnia. Paśladoŭna damahajemsia jaho vyzvaleńnia. Budziem padtrymlivać biełaruskija hramadzianskija arhanizacyi i supracoŭničać z demakratyčnaj apazicyjaj», — dadaŭ jon.
Sikorski padkreśliŭ, što MZS praciahnie padtrymlivać ŚMI i finansavać telekanały, jakija viaduć viaščańnie na biełaruskaj i ruskaj movach.
«Nieabchodnaj umovaj baraćby z prapahandaj režymaŭ u Maskvie i Minsku źjaŭlajecca dostup da rasijskich i biełaruskich hramadzian, a šyrej — da hledača va ŭsim śviecie, z dakładnaj infarmacyjaj. Moj adkaz na tyradu rasijskaha pasła ŭ Radzie Biaśpieki AAN pakazvaje, što možna supraćstajać rasiejskaj chłuśni. Budziem rabić heta, niezaležna ad taho, ci źjaŭlajucca jaje aŭtarami rasiejski ambasadar, były prezident, siońniašni kiraŭnik abo lehijony internet-trolaŭ, karysnych idyjotaŭ i płatnych ahientaŭ.
Instrumientam baraćby z dezinfarmacyjaj, a taksama papularyzacyi viedaŭ ab polskaj historyi i dypłamatyi buduć taksama telekanały, jakija finansujucca ź biudžetnych srodkaŭ, što pieradajucca praz MZS: servisy TVP World, jakija viaščajuć na anhlijskaj, niamieckaj, biełaruskaj i ruskaj movach», — skazaŭ ministr.
Da hetaha, kažučy pra vajnu Rasii suprać Ukrainy, Sikorski vykazaŭsia za sinchranizacyju sankcyj suprać RF i Biełarusi.
Načalnik milicyi Brahina stralaŭ u svaju žonku. Jana cudam vyžyła9
Kamientary