Žychary vioski ŭ Biarozaŭskim rajonie dva hady skardziacca na nievynosny pach ad zavoda
«Stajać škłopakiety, začyniajucca ščylna, ale i nočču, i dniom da takoj stupieni pach prachodzić, što niemahčyma dychać», — kažuć ludzi.
Žychary vioski Bronnaja Hara Biarozaŭskaha rajona Bresckaj vobłaści skardziacca, što im niama čym dychać z-za vytvorčaści bitumu, jakim zajmajecca pradpryjemstva «Izalacyja», što znachodzicca za dva kiłamietry ad ich. Nie ratuje ni adlehłaść, ni toje, što pamiž imi sasnovy bor, piša «Lusterka».
Paśla skarhaŭ epidemijołahi praviali analiz pavietra, a zavod zakupiŭ novaje abstalavańnie, ale situacyja nie źmianiłasia.
«Stajać škłopakiety, začyniajucca ščylna, ale i nočču, i dniom da takoj stupieni pach prachodzić, što niemahčyma dychać. Navat dzicia pračynajecca ad hetaha smurodu», — raspaviała adna ź miascovych žycharak.
Pa słovach žycharoŭ vioski, pradpryjemstva «Izalacyja» pačało vypuskać maściku na asnovie naftapraduktaŭ z 2022 hoda. Z tych časoŭ im davodzicca ŭskokvać pa načach i začyniać vokny z-za niaścierpnaha pachu.
«Usia noč pierabitaja. I tak amal kožny dzień. U asnoŭnym pa načach pach, ale i dniom byvaje. Idzie atručeńnie arhanizma. U čałavieka pačynajecca hałaŭny bol i młosnaść. Niemahčyma», — padzialiłasia adna z žančyn, jakija žyvuć u vioscy.
Inšyja paćvierdzili jaje słovy, dadaŭšy, što ranicaj zaŭsiody pračynajucca z hałaŭnym bolem, a dzieci chvarejuć vielmi časta, «kašal biaskoncy prosta».
Pradkazać źjaŭleńnie pachu miascovyja nie mohuć, pa ich słovach, heta ŭsio zaležyć ad vietru. Z-za hetaha žychary Bronnaj Hary pačynajuć dumać pra źmienu miesca žycharstva.
«Pach źjaviŭsia z 2022 hoda ŭ asnoŭnym. Raniej my adčuvali, ale redka, a ciapier — uvieś čas. Navat les pažaŭcieŭ», — raspaviała žycharka vioski.
Jany pisali šmatlikija zvaroty miascovym uładam, ale adkazy składana nazvać adkazami.
«Tut vyrablajucca naftapradukty. Jany vyłučajuć vuhlekisłatu, acetylenavuju kisłatu, vielmi šmat chimičnych elemientaŭ, na jakija nichto analizu nie daŭ, nam jaho nie dajuć», — skazaŭ adzin z žycharoŭ, chto zajmaŭsia zvarotami.
Tym časam epidemijołahi śćviardžajuć, što nijakaj niebiaśpieki niama, a analizy jany pravodziać raz na try miesiacy. Apošnija zamiery ŭ normie, a što tyčycca pachu, to, pa ich śćviardžeńniach, jaho pravieryć naohuł niemahčyma.
«Kancentracyja zabrudžvalnych rečyvaŭ u atmaśfiernym pavietry nie pieravyšaje hihijeničnych narmatyvaŭ. Varta taksama adznačyć, što datyčna mienavita pachu, to takoje paniaćcie, jak pach, narmatyŭnymi dakumientami nie rehłamientujecca, heta značyć my nie možam skazać, pach vyšej za normu abo nižej za normu», — śćviardžaje hałoŭny doktar Biarozaŭskaha rajonnaha centra hihijeny i epidemijałohii Raman Čatyrbok.
Paśla šmatlikich zvarotaŭ miascovyja ŭłady praviali schod z žycharami, a zavod zakupiŭ piečku dapalvańnia i novaje abstalavańnie, jakoje ŭstalavali ŭsiaho paru tydniaŭ tamu. Sa słoŭ kiraŭnictva pradpryjemstva, ciapier usio pavodle standartaŭ. Adnak pach u vioscy nikudy nie źnik.
«Piečka pracuje pa pryncypie: stvarajecca tempieratura kala tysiačy hradusaŭ i ŭsie piraliznyja hazy i hazy ad našaj akiślalnaj kałony, jakija iduć siudy pa trubapravodzie, traplajuć u piečku, harełka raspalvaje hetyja hazy, i hazy sychodziać, zharełyja hazy sychodziać», — raspavioŭ dyrektar pradpryjemstva «Izalacyja» Vasil Hiercyk.
Pa jaho słovach, pachu na dadzieny momant praktyčna niama, a inšych varyjantaŭ vyrašeńnia prablemy jon nidzie nie ŭbačyŭ.
Miascovyja kažuć, što na pradpryjemstvie abiacali pastavić filtry, ale, mabyć, hetaha tak i nie zrabili. Na sustrečy z žycharami vioski dyrektar nie adkazaŭ na pytańnie z nahody filtraŭ, zajaviŭšy, što «ŭ nas usio pracuje». Jon taksama adznačyŭ, što zavod panios značnyja dadatkovyja vydatki i likvidavaŭ niepryjemnyja pachi, — viaskoŭcy z hetym nie pahadzilisia.
Ludzi ŭ vioscy nie majuć namieru adstupać, a śpiecyjalisty paabiacali praciahnuć pravierki.
Kamientary