U Minsku płanujuć źnieści jašče adzin pryvatny siektar. Ale budavać šmatpaviarchoviki nie buduć
Minuła amal dziesiać hadoŭ — i horad znoŭ vyrašyŭ uziacca za terytoryi ŭzdoŭž vulicy Majakoŭskaha. Nahadajem, u 2016-m «pierakroić» chacieli kvartał pa pravy bok ad raki. Ciapier nastaŭ čarhovy etap — kvadrat u miežach vulic Dzianisaŭskaj — Majakoŭskaha — Aranskaj — pałasy advodu čyhunki Minsk — Homiel.
Hramadskaje abmierkavańnie prajekta, arhanizavanaje administracyjaj Leninskaha rajona, pačniecca ŭžo zaŭtra, 17 krasavika. I praciahniecca da 1 maja 2025 hoda. Płošča ŭčastka «pad transfarmacyju» značnaja — 51 ha. Pry hetym terytoryi, jakija zaniaty šmatpaviarchovikami i hramadskimi budynkami, čapać nie buduć — ich tolki dobraŭparadkujuć, piša Onliner.by.
A voś za pryvatny siektar voźmucca. I mocna. Jaho płanujuć źnieści.
Pad «razdaču» traplajuć 25 siadzib (ci 2,1 tys. «kvadrataŭ» razam z učastkami) u miežach vulic Nadziedzinskaj, Libava-Romienskaj i pałasy advodu čyhunki.
«Siadzibnaja zabudova na 94% adnapaviarchovaja i na 81% draŭlanaja, pieravažna da 1960-ch hadoŭ pabudovy. Siadzibnaja zabudova pradstaŭlena pieravažna znošanym draŭlanym žyllovym fondam i častkova rekanstrujavanymi katedžami, jakija vykarystoŭvajucca pad ofisy», — adznačajecca ŭ prezientacyi prajekta. Budavać šmatkvaterniki ci adradžać katedžy na hetym miescy nie płanujecca.
Sady i aharody pieratvoracca ŭ «hramadska-kamunalnuju zonu, jakaja vykonvaje na pierśpiektyvu rolu bufiernaj, achoŭnaj zony dla žyłych terytoryj šmatkvaternaj zabudovy».
Adnačasova z hetym dobryja katedžy pa adrasach Nadzieždzinskaja, 32 i 52, jakija ciapier pieraŭtvorany ŭ ofisy, vyrašyli zachavać. Praŭda, pabudovam daviadziecca źmianić status i pierajści z kłasa siadzibnych damoŭ u niežyły fond. A voś ofisny budynak na Nadziedzinskaj, 36, čakaje los draŭlanych damoŭ — jaho źniesuć. Jak i mietaličnyja haražy. I punkt pryjomu škła.
Usio heta źbirajucca zrabić da 2028 hoda. Na pieršy etap taksama zapłanavana:
- budaŭnictva abjektaŭ hramadskaha pryznačeńnia (O3) na vuł. Nadzieždzinskaj;
- budaŭnictva šmatfunkcyjanalnych hramadskich kompleksaŭ (O2) z parkinhami na vuł. Nadzieždzinskaj;
- budaŭnictva abjektaŭ kamunalna-absłuhovaha pryznačeńnia na vuł. Nadzieždzinskaj (P4ko);
- rekanstrukcyja vytvorčaha budynka na vuł. Nadzieždzinskaj, 58;
- rekanstrukcyja vytvorčych budynkaŭ i zbudavańniaŭ (№20 pa eksplikacyi detalovaha płana);
- rekanstrukcyja budynkaŭ i zbudavańniaŭ handlova-vytvorčaj bazy na vuł. Palavoj, 2A.
U vyniku hramadskaja zabudova pavialičycca z 29,2 tysiačy da 131,6 tysiačy «kvadrataŭ». A vytvorčaja — z 3,3 tysiačy da 25,7 tysiačy mietraŭ (a paśla taho, jak budzie realizavany druhi etap, i da 29,7 tysiačy kv. m).
Novyja sady, škoły i palikliniki ŭzvodzić u kvartale nie płanujuć.
Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»9
Kamientary