Minčanie stvaryli pietycyju, kab zachavać sartavańnie śmiećcia
Minskija ŭłady vyrašyli admovicca ad paasobnaha zboru śmiećcia: maŭlaŭ, žychary horada nie spravilisia z sartavańniem. Minčanie stvaryli pietycyju z nahody mahčymaha ŭviadzieńnia novaj sistemy.
«Raździelny zbor śmiećcia — klučavy krok da ekałahična čystaj budučyni. Našy namahańni stali padmurkam ekałahičnaj adkaznaści ŭ horadzie. Ukaranieńnie novaj sistemy moža ścierci heta dasiahnieńnie», — havorycca ŭ pietycyi.
Prapanavanyja źmieny, pavodle aŭtaraŭ pietycyi, padarvuć ekałahičnyja pamknieńni i pryviaduć da rostu kolkaści niezapatrabavanych adchodaŭ.
Jany prosiać zachavać raździelny zbor śmiećcia i praciahnuć padtrymlivać sistemu, jakaja spryjaje ekałahičnaj čyścini i śviadomamu vykarystańniu resursaŭ.
Dniami stała viadoma, što minskaj haradskoj žyllovaj haspadarcy prapanavali pierajści na dvuchkantejniernuju sistemu sartavańnia śmiećcia, admoviŭšysia ad paŭsiudnaj ustanoŭki kalarovych bakaŭ dla roznych vidaŭ adchodaŭ.
Jak rastłumačyli ahienctvu «Minsk-Naviny» ŭ Minskaj haradskoj žyllovaj haspadarcy (MHŽH), takaja dvuchkantejniernaja sistema była b zručniejšaj dla horada: adzin vid śmiećcievych bakaŭ prapanavali vykarystoŭvać dla zboru ŭsich vidaŭ bytavych adkidaŭ, druhi — vyklučna dla adsartavanaj druhasnaj syraviny.
Ciapier na bolšaści śmiećcievych placovak možna ŭbačyć try vidy bakaŭ dla druhasnaj syraviny: zialonaha — dla papiery, žoŭtaha — dla płastyka, siniaha — dla škła. Kali inicyjatyva MHŽH budzie adobrana ŭładami, ich usio zamieniać adnym ahulnym kantejnieram.
Pavodle słoŭ staličnych kamunalnikaŭ, ciapier takuju sistemu ahulnych kantejnieraŭ dla druhasnaj syraviny ŭ jakaści ekśpierymientu testujuć u asobnych rajonach Minska i ich śpiecyjalisty «vyvučajuć, jak reahujuć na novaŭviadzieńnie žychary».
Adyści ad asobnych kantejnieraŭ dla roznaha vidu śmiećcia vyrašyli praz toje, što ciapierašniaja schiema sartavańnia śmiećcia tak i nie zapracavała ŭ tym vyhladzie, u jakim jana była zapłanavanaja ŭ prahramnych dakumientach.
Na praktycy ŭ śpiecyjalnyja kantejniery dla druhasnaj syraviny niaredka vykidvajuć toje, što tudy traplać nie pavinna, z-za čaho źmieściva paśla zboru ŭsio roŭna davodzicca sartavać.
Ciapier čytajuć
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam8
Kamientary