Sud va Ukrainie daŭ 15 hadoŭ turmy biełarusu-vahnieraŭcu, jaki navodziŭ rasiejcaŭ na enierhietyčnuju infrastrukturu
Sud va Ukrainie prysudziŭ da 15 hadoŭ turemnaha źniavoleńnia biełarusa, jaki spačatku ŭ składzie PVK «Vahnier» braŭ udzieł u šturmie Bachmuta, a paśla pa zadańni rasijskaj raźviedki rychtavaŭ udary pa ŭkrainskaj enierhietyčnaj infrastruktury, paviedamili ŭ pres-słužbie SBU.
Pavodle infarmacyi SBU, biełarus byŭ zatrymany ŭ studzieni 2024 hoda ŭ Rovienskaj vobłaści, kali sprabavaŭ zamacavać GPS-trekiery na aporach linij elektrapieradačy, jakija siłkujuć Kijeŭskuju ahłamieracyju. Pa sihnałach ad hetych majačkoŭ rasijskija vojski chacieli nanieści prycelny ŭdar pa enierhaabjektach.
U SBU zajavili, što mužčyna vykonvaŭ zadańnie rasijskaj vajskovaj raźviedki.
Padčas śledstva było ŭstanoŭlena, što biełarus z 2014 pa 2017 hod vajavaŭ na baku samaabvieščanych «ŁNR» i «DNR». Paśla poŭnamaštabnaha ŭvarvańnia rasijskich vojskaŭ va Ukrainu jon ustupiŭ u PVK «Vahnier», u šerahach jakoj siarod inšaha šturmavaŭ Bachmut.
Paśla taho jon viarnuŭsia ŭ Biełaruś, dzie atrymaŭ novaje zadańnie ad svajho kuratara z vajskovaj raźviedki Rasii, a paśla byŭ pierapraŭleny va Ukrainu dla arhanizacyi dyviersij.
Sudzili mužčynu pavodle art. 133 KK (dyviersija) i č. 1 art. 258-3 KK (udzieł u terarystyčnaj hrupie abo terarystyčnaj arhanizacyi). U vyniku jaho prysudzili da 15 hadoŭ turemnaha źniavoleńnia z kanfiskacyjaj majomaści.
SBU zatrymała na haračym biełarusa. Jon rychtavaŭ dyviersii, kab adklučyć elektraenierhiju ŭ Kijevie
SBU vykryła ahienturnuju sietku FSB z byłych i ciapierašnich słužbovych asob śpiecsłužbaŭ Ukrainy
U Biełarusi pasadzili vahnieraŭca, jaki vajavaŭ za Rasiju. Heta vośmaja sudzimaść chraničnaha ałkaholika
Stali viadomyja padrabiaznaści pra zahinułaha śvietłahorca, jaki vajavaŭ u PVK «Vahnier»
Niežyvym znojdzieny ŭ Varšavie Źmicier Kaśpiarovič — 43-hadovy były palitviazień, zavierbavany KDB6
Kamientary