Krytykavaŭ byłych kaleh u internecie. U Homieli pavodle palityčnaha artykuła zatrymali eks-milicyjanta
Pryčyna zatrymańnia hamielčuka Vilena Turhunava — kamientary ŭ internecie, u tym liku niehatyŭnyja ŭ bok milicyi, piša «Radyjo Svaboda».
Vilenu Turhunavu 55 hadoŭ. Jahony baćka pachodzić z Uźbiekistana, maci biełaruska. Vilen skončyŭ univiersitet u rasiejskim Navazybkavie (Branskaja vobłaść) pa śpiecyjalnaści «pravaznaŭstva». Žyŭ u Homli, byŭ žanaty, ciapier raźviedzieny, paviedamili «Svabodzie» ŭ abjadnańni byłych siłavikoŭ BelPol.
Pracavaŭ Vilen Turhunaŭ u Čyhunačnym RAUSie abłasnoha centra. Mieŭ tam pieryjadyčna prablemy. Jašče ŭ 2001 hodzie atrymaŭ vymovu za «biezadkaznaje staŭleńnie da słužby», u 2002 hodzie mieŭ «niapoŭnuju słužbovuju nieadpaviednaść», u 2004-m — vymovu za «hrubaje parušeńnie słužbovaj dyscypliny, parušeńnie zahadu MUS».
Paźniej były milicyjant pracavaŭ u budaŭniča-mantažnym treście ŭ Homieli. Žyŭ u baćkoŭskaj kvatery.
Zatrymany aktyŭna vioŭ staronki ŭ roznych sacyjalnych sietkach, dzie vykazvaŭsia pra palityčnyja i sacyjalnyja padziei. Za padtrymku Ukrainy inšyja karystalniki sietak nazyvali jaho «banderaŭcam».
«Svabodzie» stała viadoma, što ciapier taksama adbyvaje pakarańnie svajak Vilena Turhunava, Ihar Kazubaŭ. Jak i Turhunaŭ, Kazubaŭ słužyŭ u homielskaj milicyi, ale ŭ 90-ch. Paśla pracavaŭ kucharam. U sacyjalnych sietkach aktyŭna vykazvaŭsia, časam rezka, pra biełaruskich siłavikoŭ i čynoŭnikaŭ. Zatrymali Kazubava 8 červienia 2023 hodu. Sudzili ŭ zakrytym režymie pavodle artykułaŭ «raspalvańnie varožaści», «abraza prezidenta», «paklop na prezidenta». Ihara Kazubava pakarali pazbaŭleńniem voli, dakładny termin nieviadomy.
Biełaruskaja dziaržava paśla padziej 2020 hodu pomścić siłavikam, jakija nie padtrymali «aficyjnaha kursu» ci zvolnilisia z pracy. Pad kryminalny pieraśled trapili byłyja śledčyja Jaŭhien Juškievič, Mikita Staraženka, Jahor Viaršynin, Alaksiej Siańkoŭ.
«Chatniuju chimiju» i kałoniju atrymali byłyja milicyjanty Dźmitry Kułakoŭski, Maksim Klimovič, Andrej Harun, Piatro Bućko i inšyja. Mnohija siłaviki, jakija zajavili ŭ 2020 hodzie pra svaju pazicyju, vymušanyja byli paśla ŭciakać za miažu.
Kamientary