Były biełaruski śpiecnazaviec zahinuŭ u Rasii ad vybuchu hranaty
U Rasii ad vybuchu hranaty zahinuŭ były śpiecnazaviec z Mahilova Juryj Michajłaŭ. Jamu było 47 hadoŭ.
Juryj Michajłaŭ zahinuŭ 2 červienia, a raźvitańnie ź im prajšło praz tydzień u Mahilovie, piša MAYDAY.TEAM.
Na žałobnuju cyrymoniju pryjechaŭ kiraŭnik Biełaruskaj asacyjacyi vieteranaŭ padraździaleńniaŭ śpiecnaza MUS «Honar» Dźmitryj Paŭličenka.
U svaim słovie jon zhadaŭ, što ŭ 90-ja Juryj Michajłaŭ byŭ adnym z tych bajcoŭ, ź jakimi «daviałosia razam ryzykavać, stojačy plačom da plača, žorstka spyniajučy sproby zamachaŭ na kanstytucyjny ład z boku bandyckich i pa-ekstremiscku nastrojenych elemientaŭ».
Jak paviedamlaje MAYDAY.TEAM, u 1995-1996 hadach Michajłaŭ prachodziŭ terminovuju słužbu ŭ 1-j rocie śpiecpryznačeńnia ŭ/č 3214 (Uručča) u zvańni staršyny.
Pachavańnie było arhanizavana za košt achviaravańniaŭ členaŭ Asacyjacyi «Honar».
Abstaviny śmierci eks-śpiecnazaŭca nie vydajucca. Za suchoj farmuloŭkaj moža chavacca jaho ŭdzieł u tak zvanaj SVA.
Kamientary