Va ŭzroście 89 hadoŭ pamierła žurnalistka Dzijana Čarkasava, šmathadovaja supracoŭnica haziety «Hołas Radzimy» i maci zabitaj u 2004 hodzie žurnalistki Vieraniki Čarkasavaj, zabojstva jakoj dahetul nie raskrytaje, paviedamlaje «Salidarnaść».
Dzijana Cimafiejeŭna Čarkasava naradziłasia 22 studzienia 1935 hoda ŭ Minsku. U 1946-m pierajechała ź siamjoj u Navahrudak. U 1958 hodzie skončyła biełaruskaje adździaleńnie fiłałahičnaha fakulteta BDU.
Usio žyćcio jana prapracavała ŭ haziecie dla biełarusaŭ zamiežža «Hołas Radzimy»: karektarkaj, litaraturnaj supracoŭnicaj, adkaznaj sakratarkaj i narešcie namieśnicaj hałoŭnaha redaktara. U 2000 hodzie vyjšła na piensiju.
U 1978 hodzie ŭ biblijatečcy haziety «Hołas Radzimy» vyjšła kniha Dzijany Čarkasavaj «Lublu» pra žyćcio i tvorčaść biełaruskaj paetesy Kanstancyi Bujło, ź jakoj žurnalistka doŭhija hady padtrymlivała asabistyja suviazi.
Jaje publikacyi źjaŭlalisia taksama ŭ hazietach «Litaratura i mastactva», časopisach «Połymia», «Nioman», na pačatku 2000-ch pa jaje scenarach stvaraŭsia cykł prahram «Svaja čužyna» na biełastockim radyjo «Racyja» pra kulturnych dziejačaŭ biełaruskaj emihracyi. Jaje rukapisy, pierapiska z Kanstancyjaj Bujło, publikacyi zachoŭvajucca ŭ Biełaruskim dziaržaŭnym archivie-muziei litaratury i mastactva.
U 2004-m hodzie była zabitaja pry dahetul nie vyśvietlenych abstavinach jaje dačka, taksama žurnalistka Vieranika Čarkasava, a ŭ 2019-m pajšoŭ z žyćcia kachany muž Uładzimir Mialeška, ź jakim Dzijana Cimafiejeŭna razam kročyła pa žyćci ciaham dziesiacihodździaŭ.
Dzijana Cimafiejeŭna pamierła na 90-m hodzie žyćcia paśla praciahłaj chvaroby. Praktyčna da apošnich dzion jana zachoŭvała vastryniu rozumu.
Kamientary
Śpiarša vydavałasia Biełaruskim tavarystvam pa suviaziach z suajčyńnikami za rubiažom. Potym da 2018 hodu źjaŭlałasia dadatkam da haziety «Sovietskaja Biełoruśsija». Zaraz vydajecca jak asobnaje vydańnie Vydavieckim domam «Źviazda».
I heta, luby čytače, Akabčyk Maleńki jašče pra rastralanych paetaŭ nie daŭmieŭsia ściślej ciabiepaznajomić