U Ministerstvie padatkaŭ prakamientavali situacyju z čerhami pa klučy elektronnaha ličbavaha podpisu
U MPZ raskazali, jakija zachady zroblenyja dla skaračeńnia čerhaŭ.
U sacyjalnych sietkach nabraŭ papularnaść videarolik, u jakim błohierka aburyłasia načnymi čerhami ŭ padatkovuju dla atrymańnia kluča elektronnaha ličbavaha podpisu (EŁP). Pres-sakratar Ministerstva padatkaŭ i zboraŭ Siarhiej Saładucha prakamientavaŭ BiełTA situacyju z čerhami za atrymańniem klučoŭ elektronnaha ličbavaha podpisu.
U Biełarusi vydańnie i padaŭžeńnie siertyfikataŭ EŁP ažyćciaŭlajuć 12 rehistracyjnych centraŭ, akredytavanych dziaržaŭnaj sistemaj kiravańnia adkrytymi klučami pravierki elektronnaha ličbavaha podpisu. Zaraz dziejničajuć 44 punkty akazańnia elektronnych pasłuh, infarmacyja ab jakich raźmieščana na partale NCEP.
Siarhiej Saładucha raskazaŭ, jakija miery pryniaty dla skaračeńnia čerhaŭ.
«Dla zručnaści płacielščykaŭ va ŭsich rehistracyjnych centrach (akramia punkta pa adrasie: Minsk, praśpiekt Mašerava, 25) praz aficyjny sajt mahčymy papiaredni zapis. Heta značyć možna vybrać datu i čas naviedvańnia rehistracyjnaha centra», — adznačyŭ jon.
Infarmacyjna-vydaviecki centr pa padatkach i zborach z 4 lipienia pieramiaściŭ punkt akazańnia elektronnych pasłuh, jaki raniej raźmiaščaŭsia pa adrasie: Minsk, praśpiekt Mašerava, 7, u bolš kamfortnaje pamiaškańnie pa adrasie: Minsk, praśpiekt Mašerava, 25, kab. 200, dzie źjaviłasia zała čakańnia, a taksama abstalavana 16 dystancyjnych pracoŭnych miescaŭ zamiest 12.
«Ministerstva pa padatkach i zborach uličyła maksimalnuju zahružanaść rehistracyjnych centraŭ, a taksama pryniało da ŭvahi zvaroty płacielščykaŭ ab niemahčymaści vykanańnia ŭ takich umovach abaviazkaŭ pa davańni padatkovych dekłaracyj indyvidualnymi pradprymalnikami ŭ elektronnym vyhladzie. Padatkovyja dekłaracyi (raźliki), padadzienyja na papiarovym nośbicie, buduć prymacca padatkovymi orhanami va ŭstanoŭlenym paradku», — raspavioŭ Siarhiej Saładucha.
Heta značyć IP mohuć pa-raniejšamu padavać dekłaracyi na papiery.
Pres-sakratar taksama źviarnuŭ uvahu na mahčymaści identyfikacyjnych kart.
«Pry najaŭnaści ID-karty indyvidualny pradprymalnik maje mahčymaść pracavać u asabistym kabiniecie płacielščyka i nakiroŭvać roznyja elektronnyja dakumienty biez dadatkovaha vykarystańnia atrybutnaha siertyfikata. ID-karta vydajecca hramadzianinu terminam na 10 hadoŭ.
Adnačasova ź jaje vydačaj vypuskajecca siertyfikat adkrytaha kluča na toj ža termin. Dla pašyreńnia mahčymaści padačy płacielščykami dekłaracyj (raźlikaŭ) pry dapamozie ID-karty, va ŭsich inśpiekcyjach MPZ abstalavany śpiecyjalnyja pracoŭnyja miescy sa sčytvalnikam, na jakich luby płacielščyk moža zapoŭnić, padpisać i nakiravać dekłaracyju ŭ padatkovy orhan», — adznačyŭ jon.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki42
Kamientary