Bajden choča praciahvać baraćbu za pasadu prezidenta

Prezident ZŠA Džo Bajden paabiacaŭ u piatnicu, 19 lipienia, što adnović svaju kampaniju pa pieraabrańni na nastupnym tydni, piša Deutsche Welle.

U suviazi z zaražeńniem karanavirusam Bajden zastajecca ŭ svaim domie ŭ Dełavery i admianiŭ šerah mierapryjemstvaŭ. Svaju zajavu viarnucca da baraćby kiraŭnik Biełaha doma zrabiŭ na fonie zaklikaŭ usio bolšaj kolkaści jahonych kalehaŭ-demakrataŭ u Kanhresie vyjści ź pieradvybarnaj baraćby paśla pravalnych červieńskich debataŭ z eks-prezidentam ZŠA Donaldam Trampam.

«Ja ź nieciarpieńniem čakaju mahčymaści viarnucca da pieradvybarnaj kampanii na nastupnym tydni, kab vykryć pahrozy, jakija niasie prahrama Donalda Trampa, i adnačasova pakazać svaju pracu i toje bačańnie, jakoje ŭ mianie jość dla Amieryki», — skazaŭ Bajden.

Doktar Bajdena kaža pra značnyja palapšeńni simptomaŭ karanavirusa

81-hadovy Bajden zdaŭ stanoŭčy test na kavid padčas pajezdki ŭ Łas-Viehas u pačatku tydnia. Bieły dom paviedamiŭ ab «lohkich simptomach» i «ahulnym niadužańni». Paśla testu Bajden viarnuŭsia ŭ Dełaver dla prachodžańnia lačeńnia.

Doktar Biełaha doma Kievin O'Konar zajaviŭ u piatnicu, što ŭ prezidenta ŭsio jašče jość suchi kašal i achrypłaść hołasu, ale simptomy palepšylisia.

Jon skazaŭ, što inšyja žyćciova važnyja pakazčyki Bajdena, takija jak puls, arteryjalny cisk i tempieratura ŭ normie i što jon dobra pieranosić lačeńnie.

Cisk na Bajdena raście. Abama i Pełosi zaniepakojenyja

Na dadzieny momant 32 Z 264 členaŭ Demakratyčnaj partyi ŭ Kanhresie adkryta zaklikali Bajdena spynić svaju kampaniju, u toj čas jak inšyja vysokapastaŭlenyja lidary demakrataŭ kažuć pra heta niepublična.

Cisk na Bajdena rezka ŭzros za apošnija 48 hadzin paśla paviedamleńniaŭ, što były prezident ZŠA Barak Abama, były śpikier Pałaty pradstaŭnikoŭ Nensi Pełosi i lidary partyi ŭ Kanhresie niepublična vykazvali zaniepakojenaść zychodam kampanii Bajdena.

Demakraty ŭsio bolš zaniepakojenyja pieramohaj respublikancaŭ na vybarach 5 listapada, u vyniku jakoj Tramp i jahonyja sajuźniki zmohuć atrymać nie tolki Bieły dom, ale i bolšaść u abiedźviuch pałatach Kanhresu.

Vice-prezident Kamała Charys, jakaja źjaŭlajecca asnoŭnym pretendentam na toje, kab źmianić Bajdena na pasadzie kandydata ŭ prezidenty ad Demakratyčnaj partyi, kali toj usio ž taki vyjdzie z hulni, u piatnicu praviała razmovu z hrupaj donaraŭ.

Bajdena zakličuć syści ŭ jaho lubimym tok-šou

«Biezumoŭna, prezident udzielničaje ŭ hetaj honcy», — zajaviła ŭ svaju čarhu staršynia pieradvybarčaha štaba Džen O'Meli Dyłan u prahramie «ranišni Džo» na kanale MSNBC.

Tym časam demakratyčnaja hrupa pad nazvaj «Pieradaj pachodniu» źbirajecca ŭ prahramie «Ranišni Džo», jakuju lubić hladzieć sam Bajden, pakazvać telerekłamu z zaklikam da jaho spynić baraćbu.

Telekanał NBC News paviedamiŭ, što niekatoryja členy siamji Bajdena «abmiarkoŭvali, jak moža vyhladać vychad ź jaho kampanii», choć kančatkovaha rašeńnia na hety kont jašče nie było.

Mnohija pradstaŭniki Demakratyčnaj partyi pry hetym kažuć, što vychad z honki — heta pytańnie času.

• 0
• 0
• 1
• 0
• 0
• 0
• 0
• 0