U Minsku za pratesty buduć sudzić muža i žonku. U ich troje dziaciej
U sudzie Centralnaha rajona Minska ŭ sieradu, 24 lipienia, pačniecca razhlad kryminalnaj spravy suprać Kanstancina i Vieraniki Kavaleŭskich. Siamiejnuju paru buduć sudzić pa «narodnym» artykule 342 KK za ŭdzieł u pratestach, piša «Lusterka»
Abodvum vystaŭlenaje abvinavačvańnie ŭ «aktyŭnym udziele ŭ hrupavych dziejańniach, jakija hruba parušajuć hramadski paradak». Razhlad spravy pačniecca ŭ 10.30, pasiadžeńnie projdzie ŭ adkrytym režymie.
Kanstancin i Vieranika Kavaleŭskija — muž i žonka ź Minska, im kala 35 hadoŭ. Para vychoŭvaje traich dziaciej — syna i dźviuch dačok (praŭda, infarmacyja ŭ sacsietkach nie abnaŭlałasia bolš za piać hadoŭ i mahła sastareć). Starejšamu kala 10-11 hadoŭ, małodšaj dziaŭčyncy — siem.
Vieranika, miarkujučy pa profili ŭ sacsietcy, atrymlivała vyšejšuju adukacyju ŭ vilenskim EHU.
Pra zatrymańnie Kavaleŭskaha stała viadoma 24 červienia hetaha hoda. Kanał siłavikoŭ apublikavaŭ videa dvuch mužčyn, jakich apaznali pa kadrach ź mirnaha pratestnaha maršu 6 vieraśnia 2020 hoda ŭ Minsku: abodva stajali pobač u natoŭpie ź bieł-čyrvona-biełymi ściahami, nie chavajučy tvaraŭ, i trapili na kamiery.
Adnym ź ich byŭ Kavaleŭski. Na kamieru siłavikoŭ jon skazaŭ, što byŭ padpisany na telehram-kanały Nexta Life i «Matolka, dapamažy» i vyjšaŭ na akcyju pa zakliku «ekstremisckaha» kanała. Mužčyny byli vymušanyja pryznać, što ŭdzielničali ŭ prateście i znachodzilisia na prajeznaj častcy. Vieraniki Kavaleŭskaj na videa nie było — vierahodna, jaje zatrymali ŭžo paśla taho, jak pryjšli pa muža.
Druhim čałaviekam ź videa byŭ minčanin Arciom Čop — miedyk pa adukacyi i amatar padarožžaŭ. Vierahodna, jon z Kanstancinam nie znajomy — prynamsi, ni z kim z Kavaleŭskich jon nie źjaŭlajecca siabrami ŭ sacsietkach. Jamu taksama było pradjaŭlenaje abvinavačvańnie pa artykule 342 KK, ale ŭ ramkach asobnaj kryminalnaj spravy. Praces nad Arciomam pačaŭsia ŭ tym ža sudzie Centralnaha rajona ŭ paniadziełak.
Sudździoj pa abodvuch spravach — jak muža i žonki Kavaleŭskich, tak i Arcioma Čopa —pryznačanaja Juljana Ščerba, jakaja vyniesła dziasiatki palityčna matyvavanych prysudaŭ.
Kavaleŭskim i Čopu pahražaje da čatyroch hadoŭ pazbaŭleńnia abo ad dvuch da piaci hadoŭ abmiežavańnia voli
Kamientary