«Pravakacyja pierad prezidenckimi vybarami». Pa danosie Bondaravaj u Minsku admianili kancert rasijskaha rok-hurta
Usia sprava ŭ pieśni, jakuju zabaranili jašče ŭ 2010 hodzie.
U Minsku admianili kancert papularnaha ŭ 2000-ja hady rasijskaha rok-hurta «Psichieja».
Kalektyŭ pavinien byŭ vystupić u kłubie «Reaktar» 21 vieraśnia z nahody svajho dnia naradžeńnia i 20-hodździa paśpiachovaha alboma «Psichieja».
Adnak na dniach afiša kancerta źnikła z sacsietak kłuba. 13 žniŭnia «Psichieja» abviaściła ab admienie kancerta — «pa niezaležnych ad hurta pryčynach».
Pryčyny sapraŭdy ad kalektyvu nie zaležali — usia sprava ŭ tym, što kancertam zacikaviłasia Volha Bondarava. 10 žniŭnia ŭ svaim telehram-kanale jana zajaviła, što Bresckaja fiłarmonija — arhanizatar kancerta — «viazie ŭ Minsk ekstremistaŭ».
Bondarovu aburyła pieśnia «Zabi mianta», jakaja vyjšła jakraz u albomie 2004 hoda. Jana zajaviła, što «Psichieja» źbirajecca vystupać z hetaj pieśniaj na kancercie ŭ Minsku i zapatrabavała, kab HUBAZiK pravieryŭ arhanizataraŭ, heta značyć Bresckuju fiłarmoniju, na ekstremizm. Pryčym Bondarava ŭmudryłasia źviazać rok-kancert z vybarami, jakija pavinny prajści ŭ 2025 hodzie.
«Pierad vybarami klikać u krainu ekstremistaŭ — heta treba być nu vielmi nievierahodnym. Cikava, HUBAZiK nam raskaža, chto ž heta taki ŭ Bresckaj abłfiłarmonii? A ŭ kłubie «Reaktar»?» — napisała Bondarava. I apublikavała ŭryvak ź pieśni, pryznanaj u Rasii ekstremisckaj.
Z-za pieśni «Zabi mianta» ŭ hurta sapraŭdy byli prablemy ŭ druhoj pałovie 2000-ch. U 2010-m sud u Rasii ŭnios kampazicyju ŭ śpis ekstremisckich materyjałaŭ. Z taho času «Psichieja» bolš ni razu nie vykonvała hetuju pieśniu na kancertach — u set-liście jaje zamianili na trek «Kolki ž kaštuje tvaja svaboda?» z tym ža minusam, ale ŭžo bieź źmiestu, pryznanaha ekstremisckim.
Uvohule, «Zabi mianta» na kancercie ŭ Minsku naŭrad ci b prahučała. Ale Bondarava, miarkujučy pa ŭsim, pajšła da kanca. Užo praz dva dni paśla jaje pasta ŭ telehramie prodaž biletaŭ na kancert «Psichiei» byŭ spynieny. 13 žniŭnia stała viadoma ab admienie kancerta.
Siońnia ž Bondarava paskardziłasia, što niezadavolenyja fanaty hurta ździejśnili nalot na jaje telehram-kanał. Jany, pavodle jaje słoŭ, «pačali abražać administrataraŭ kanała, hramadzian Biełarusi i Biełaruś». Danosčyca skrynšoty paviedamleńniaŭ publikavać nie stała, ale namiaknuła, što Id kamientataraŭ adsačyli siłaviki. I znoŭ źviazała «ataku» na svoj kanał z vybarami.
«Sproby kaho b tam ni było napiaredadni prezidenckich vybaraŭ zaciahnuć u krainu tych, chto stvaraje i raspaŭsiudžvaje infarmacyjnyja materyjały ekstremisckaha źmiestu, sieje nianaviść da supracoŭnikaŭ pravaachoŭnych orhanaŭ abo raspalvaje inšuju varožaść, buduć žorstka spyniacca», — zajaviła Bondarava.
«Psichieja» ŭ nulavyja ličyłasia adnym z hałoŭnych alternatyŭnych rok-hurtoŭ Rasii. Kalektyŭ z Kurhana źbiraŭ poŭnyja zały, aktyŭna hastralavaŭ, vystupaŭ na razahrevie ŭ papularnych jeŭrapiejskich i amierykanskich hurtoŭ. U asiarodździ ruskamoŭnych prychilnikaŭ alternatyŭnaha roku «Psichieja» atrymała tady praktyčna kultavy status.
Ciapier čytajuć
Hienierał Kiełah raskazaŭ, čamu ZŠA razmaŭlajuć z Łukašenkam12
Kamientary