Błok Jahorava śviatkuje pieramohu: bolšaść delehataŭ KR nie padtrymlivaje lidarstva Cichanoŭskaj. Sapraŭdy tak?
Kali ličyć 15% bolšaściu — to ŭsio pravilna.
Pa apazicyjnych kołach praciahvaje raznosicca recha kanfierencyi «Novaja Biełaruś», padčas jakoj było abvieščana, što Śviatłana Cichanoŭskaja budzie mieć paŭnamoctvy nacyjanalnaha lidara da momantu praviadzieńnia sumlennych i svabodnych vybaraŭ.
Što vyśvietliłasia ŭ papiarednich sieryjach? Spačatku Andrej Jahoraŭ, Vadzim Prakopjeŭ i Alaksandr Knyrovič vystupili suprać hetaha biesterminovaha statusa Cichanoŭskaj. Paśla stała viadoma, što Jahoraŭ sam udzielničaŭ u raspracoŭcy dakumienta, jaki zaćviardžaŭ status Cichanoŭskaj, ale nie źviarnuŭ uvahu na farmuloŭku. Dalej błok Jahorava-Prakopjeva zaklikaŭ delehataŭ Kaardynacyjnaj rady vykazać svajo mierkavańnie na ŭnutranym hałasavańni — choć nijakaj jurydyčnaj siły takoje apytańnie nie maje.
I voś 19 žniŭnia błok Jahorava-Prakopjeva narešcie abvieściŭ: «Bolšaść delehataŭ KR, jakija prahałasavali, nie padtrymlivajuć biesterminovaść paŭnamoctvaŭ Cichanoŭskaj». Na apublikavanym skrynšocie vidać, što na knopku «nie padtrymlivaju» nacisnuła 44% udzielnikaŭ hałasavańnia — i heta nasamreč samy papularny adkaz.
Ale kolki čałaviek prahałasavała? Na raspaŭsiudžanych skrynšotach ličba akuratna abrezanaja.
Jak akazałasia, u hałasavańni pryniali ŭdzieł 23 delehaty, a taksama 4 čałavieki z sakrataryjatu (rabotnikam sakrataryjatu treba bačyć ahulnyja vyniki, ale prava hołasu jany nie majuć). A ahułam u KR 80 delehataŭ.
Takim čynam, udzieł u apytancy ŭziali tolki 29% delehataŭ KR, 71% delehataŭ vyrašyŭ nie hałasavać.
U vyniku suprać paŭnamoctvaŭ Cichanoŭskaj vykazalisia 12 čałaviek — heta roŭna 15% ad ahulnaj kolkaści siabroŭ KR. Admietna, što «suprać» prahałasavali navat nie ŭsie pradstaŭniki błoka Prakopjeva-Jahorava.
Kamientary