«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram

U tekście «Na stražie» nie nazyvajuć imionaŭ zahinułaj i złačynca. Ale havorka idzie pra rezanansnuju spravu pra zabojstva 43‑hadovaj ciažarnaj žančyny.

Taćciana Marciščanka źnikła 8 vieraśnia. 11 vieraśnia pa padazreńni ŭ złačynstvie byŭ zatrymany 38‑hadovy były chakieist i chakiejny arbitr Alaksiej Haŭrylonak.

Pavodle słoŭ načalnika adździeła UUR HUUS Minharvykankama Andreja Piatroviča, paśla taho jak stała viadoma pra źniknieńnie 43‑hadovaj ciažarnaj, śledčyja chutka ŭstanavili koła jaje siabroŭ i znajomych. Asablivuju ŭvahu skancentravali na tych, chto dapuskaŭsia ŭ jaje dom. Pad padazreńnie trapiŭ 38‑hadovy žychar stalicy, jaki znachodziŭsia ŭ blizkich adnosinach z šukanaj i siabravaŭ ź jaje dačkoj. Da taho ž, pa infarmacyi siamji, mienavita ad jaho žančyna była ciažarnaja.

Pry pieršaj razmovie z apieratyŭnikami kryminalnaha vyšuku mužčyna pavodziŭ siabie absalutna spakojna.

«Jon paviedamiŭ, što apošni raz razmaŭlaŭ z žančynaj u aŭtorak (mahčyma, havorka idzie pra aŭtorak, 8 vieraśnia, — dzień, kali blizkija paviedamili pra źniknieńnie minčanki. — Zaŭv. red.), pa jaje daručeńni advoziŭ zakazčyku sumku ź miedykamientami. Paśla čaho, [pavodle jaho słoŭ], jana sama nibyta pajechała na niekalki pryznačanych sustreč. A kali raptam pierastała vychodzić na suviaź, dasłaŭ joj u miesiendžary kranalnaje paviedamleńnie pra toje, što chvalujecca i sumuje», — raskazaŭ namieśnik načalnika Centralnaha RUUS — načalnik kryminalnaj milicyi Uładzimir Kubrakoŭ.

Historyja z preparatami nie paćvierdziłasia. Paśla dbajnaj pravierki chłuśnioj akazalisia i inšyja źviestki, pryviedzienyja mužčynam. Tamu siłaviki vyrašyli pravieryć jaho bolš pilna.

Pa infarmacyi vydańnia, žyćcio mužčyny, zdavałasia, išło pa zvyčajnym hrafiku: dom, pieramiaščeńni pa spravach, pajezdka da svajakoŭ za horad. Niestandartnaj u hetaj rucinie była adna detal: u budaŭničym hipiermarkiecie na MKAD jon kupiŭ rydloŭku.

«Čym bolš udakładniajučych pytańniaŭ minčuk atrymlivaŭ, tym macniejšym było dryžańnie hołasa, jon zapinaŭsia, — kaža načalnik adździeła pa raskryćci asabliva ciažkich i ciažkich złačynstvaŭ suprać asoby UUR KM HUUS Minharvykankama Andrej Bachar. — I ŭ razmovie z apieratyŭnikami pryznaŭsia: viedaje, dzie źnikłaja žančyna. Kali dakładniej, dzie jaje cieła».

«Akryvaŭlenuju majku i brudny ručnik skłaŭ u čamadan i adnios u mašynu, kab potym vykinuć u vypadkovy śmietnik»

Pa infarmacyi «Na stražie», mužčyna pryznaŭsia, što toj ranicaj para była razam. Kali jon hatavaŭ na kuchni sałat, jaho spadarožnica čarhovy raz zaviała razmovu pra budučyniu, bo jany chutka stanuć baćkami. Potym žančyna pryhraziła pajści da inšaha. Mienavita reŭnaść, jak pryznaŭsia fihurant, stała tryhieram. Tym ža nažom, jakim tolki što rezaŭ harodninu na śniadanak, jon nanios ciažarnaj nie mienš za 15 ranieńniaŭ.

Žančyna sprabavała supraciŭlacca, ale biezvynikova.

Paśla hetaha mužčyna pakinuŭ zabituju ŭ vannaj i syšoŭ. A praz paru hadzin zavitaŭ u kramu, dzie kupiŭ rydloŭku.

«Na nastupny dzień minčanin viarnuŭsia ŭ kvateru, najbolš vierahodna, mienavita tady zamyŭ ślady na kuchni i ŭ vannaj, — paviedamlaje «Na stražie». — Adrazu pazbaviŭsia ad naža — vykinuŭ u kantejnier u dvary. Svaju akryvaŭlenuju majku i brudny ručnik skłaŭ u čamadan i adnios u mašynu, kab potym vykinuć u vypadkovy śmietnik na vulicy Kalcova. Cieła źmiaściŭ u vialikuju čornuju sumku i pakłaŭ u bahažnik, papiarednie nadzieŭšy na hałavu achviary pakiet».

Dalej padazravany praciahnuŭ žyć pa standartnym rasparadku — praca, abied. I tolki kali ŭžo ściamnieła, adpraviŭsia na mašynie za horad. Pa darozie vykinuŭ u raku smartfon zabitaj i klučy ad kvatery, zajechaŭ u pieršy-lepšy dvor i «skinuŭ» płastykavy čamadan z dokazami.

«Fihurant nakiravaŭsia pa darozie, jakuju dobra viedaŭ. Jon raskazaŭ, što niedaloka ad Łahojska paviarnuŭ u les, pakinuŭ aŭtamabil i prajšoŭ u huščar, dzie vykapaŭ niehłybokuju jamu», — paviedamlaje Andrej Bachar.

Paźniej viarnuŭsia pa sumku i staŭ błukać: jak śćviardžaje, adrazu navat nie zmoh uspomnić, dzie paru chvilin tamu vykapaŭ mahiłu dla žančyny, piša «Na stražie». Vydańnie paviedamlaje, što, kali mužčyna znoŭ akažacca tut, ale ŭžo ŭ supravadžeńni kanvoju i śledča-apieratyŭnaj hrupy, jon taksama budzie doŭha šukać miesca pachavańnia.

«Apieratyŭniki znajšli ŭ jaho mašynie majku z burymi śladami, jakaja, miarkujučy pa ŭsim, vypała z čamadana i zastałasia na dyvanku niezaŭvažanaj (prytym što fihurant prapyłasosiŭ svoj «Ford» i ŭ aŭtorak addaŭ jaho ŭ karystańnie bratu). Taksama była znojdziena sumka ź bijałahičnymi śladami achviary. Jaje mužčyna cynična zabraŭ dadomu, dzie žyŭ ź siamjoj, — raskryvaje padrabiaznaści Uładzimir Kubrakoŭ. — I prykładna tady ž pačyściŭ pierapisku dy napisaŭ zabitaj žančynie paviedamleńnie pra toje, što chvalujecca i čakaje sustrečy».

Pry hetym siłaviki padkreślivajuć: pra toje, što adbyłosia ŭ kvatery, viedajuć tolki sa słoŭ mužčyny, i sam jon u asobnych momantach błytajecca. Kab adnavić padziei taho dnia pa chvilinach, budzie vykanana jašče niamała dadatkovych mierapryjemstvaŭ, daśledavańniaŭ i ekśpiertyz. Rasśledavańnie kryminalnaj spravy praciahvajecca.

• 1
• 2
• 0
• 10
• 4
• 7
• 8
• 0