Śpikier MZS Ukrainy — pra retranślatary na terytoryi Biełarusi i kalinoŭcaŭ u rasijskim pałonie
Taksama Hieorhij Cichi raskazaŭ pra toje, jaki los moža čakać biełarusaŭ, što pajšli vajavać za Rasiju i trapili ŭ pałon da ŭkrainskich vajskoŭcaŭ.
Pres-sakratar Ministerstva zamiežnych spraŭ Ukrainy Hieorhij Cichi padčas Forumu Astrožskich prakamientavaŭ «Biełsatu» pracu retranślataraŭ na terytoryi Biełarusi i situacyju ź biełaruskimi dobraachvotnikami ŭ rasijskim pałonie.
Pra retranślatary
Ciaham minułaha i biahučaha tydniaŭ na terytoryi Biełarusi ŭkrainskija manitorynhavyja kanały vyjavili pracu adrazu čatyroch retranślataraŭ, jakija zabiaśpiečvajuć kiravańnie reaktyŭnymi bieśpiłotnikami. Dziakujučy im rasijskija apieratary mahli ŭ režymie realnaha času navodzić drony na ciahniki i zapravačnyja stancyi na terytoryi Ukrainy, kala samaj polskaj miažy.
Retranślatary zafiksavanyja ŭ rajonach nasielenych punktaŭ Chojniki, Dzierbinka, Machnavičy i Buda-Safijeŭka. Razhornutaja sietka istotna pavialičyła dalokaść palotu bieśpiłotnikaŭ i dazvoliła im dabiracca ažno da miažy z Polščaj.
Hieorhij Cichi paćvierdziŭ, što retranślatary na terytoryi Biełarusi adklučalisia ŭ červieni paśla taho, jak Uładzimir Zialenski ahučyŭ svoj ultymatum, a ciapier znoŭ źjavilisia paviedamleńni pra ich pracu.
«Nasamreč retranślatary, pra jakija kazaŭ prezident Zialenski ŭ červieni, paśla hetaha adklučalisia. My sapraŭdy bačym ciapier roznyja paviedamleńni pra toje, što, mahčyma, niekatoryja retranślatary znoŭ pačali pracavać, ale ja pierakanany, što praz peŭny čas jany taksama musiać być vyklučanyja. I nakolki ja viedaju ad našych vajskoŭcaŭ, my nasamreč na takoje raźvićcio padziejaŭ i raźličvajem».
Pra biełarusaŭ u rasijskim pałonie
Pres-sakratar MZS raspavioŭ, što Ukraina namahajecca viartać z rasijskaha pałonu jak ukrainskich vajskoŭcaŭ, tak i biełaruskich dobraachvotnikaŭ, jakija vajavali ŭ składzie ZSU. Biełarusy jość u śpisach pałonnych.
«Heta značyć, my ich razhladajem jak ukrainskich vajskoŭcaŭ niezaležna ad hramadzianstva i nastojvajem na viartańni», — padkreślivaje Cichi.
Kali ž biełarus ci hramadzianin inšaj krainy vajuje na baku Rasijskaj Fiederacyi i traplaje ŭ pałon va Ukrainie budučynia jaho moža być roznaj, i mižnarodnaje humanitarnaje prava dazvalaje roznyja scenaryi raźvićcia padziejaŭ.
«Naprykład, traplaje da nas u pałon hramadzianin krainy Afryki, i jon kaža, što nie choča viartacca ŭ Rasiju, a choča być repatryjavanym, viernutym u svaju krainu. Heta adzin z mahčymych varyjantaŭ raźvićcia padziejaŭ, asabliva kali źviartajecca zamiežnaja kraina i prosić viarnuć takoha hramadzianina. Tamu mohuć być navat niejkija formy, kali hety čałaviek nie viartajecca ni tudy, ni tudy», — tłumačyć Cichi.
Kamientary