«Naša Niva» dniami pisała pra toje, kolki zarabili na prodažy BiełAZaŭ pasiaredniki z kołaŭ siamji Łukašenki. Detali da karciny vakoł pradpryjemstva dadaje novaje rasśledavańnie «Biełpoł». A mienavita — jak akcyjami vałodali nabližanyja da siamji biznesmieny Juryj Čyž i Viktar Kułujeŭ.
Rola Kułujeva
Pradukcyju zavoda ŭ Rasii pradaje «Handlovy dom BiełAZ». Kampanija była zarehistravana ŭ Rasii ŭ 2007 hodzie. Na momant rehistracyi siarod jaho zasnavalnikaŭ, akramia pradpryjemstva (40% akcyj), byŭ Prezidencki spartyŭny kłub, jaki vałodaŭ 30% akcyj, i ZAT «UrałBiełAZsierviz» (30%).
Paźniej u raźmierkavańni akcyj adbyvalisia źmieny (u 2019-m akcyjami vałodali BiełAZ i Prezidencki spartyŭny kłub — 55% na 45%).
U peŭny čas 5% akcyj atrymaŭ uradženiec Słucka Viktar Kułujeŭ. «Biełpoł» padrabiaźniej raskazaŭ pra jaho asobu.
Kułujeŭ z 1998 hoda pracavaŭ u Administracyi Łukašenki, zatym u sakrataryjacie Savieta Respubliki, a z 2005 hoda i pa siońnia — u Prezidenckim spartyŭnym kłubie.
Paralelna z 2011 hoda Kułujeŭ staŭ zajmać roznyja pasady ŭ «Handlovym domie BiełAZ», dzie daros da staršyni savieta dyrektaraŭ. Takaja pasada, vierahodna, tłumačycca jaho afilavanaściu z Prezidenckim spartyŭnym kłubam.
Akramia BiełAZa, Kułujeŭ byŭ akcyjanieram takich kampanij, jak «KuzbasBiełAŭta» (8% akcyj), «Hornatranspartnaja kampanija» (25% akcyj) i «B-24 MINING» (50,01% akcyj).
Jak paviedamlajuć biełpołaŭcy, budučy ŭładalnikam usiaho tolki 5% akcyj, Kułujeŭ z 2013 pa 2018 hod atrymaŭ nie mienš jak $3 miljony dyvidendaŭ.
U 2018 hodzie pa nieviadomaj pryčynie Kułujeŭ pradaŭ usie svaje akcyi «Handlovaha doma BiełAZ» Prezidenckamu spartyŭnamu kłubu pa naminalnym košcie (kala 2400 dalaraŭ) i pakinuŭ pasadu staršyni rady dyrektaraŭ, atrymaŭšy inšuju pasadu, jakuju zajmaje da hetaha času — dyrektara pa stratehičnym raźvićci.
U sakaviku 2023 hoda Kułujeŭ z 50% akcyj staŭ adnym z zasnavalnikaŭ kampanii «RusBiełSajuz».
Rola Čyža
U 2013 hodzie ŭładalnikam 4% akcyj «Handlovaha doma BiełAZ» byŭ taksama Juryj Čyž. Akramia hetaha, jon vałodaŭ 18% akcyj TAA «KuzbasBiełAŭta», dzie ad jaho imia dziejnaść ažyćciaŭlaŭ Viktar Kułujeŭ. Praz svaju dačku Taćcianu nabližany da Łukašenki biznesmien taksama vałodaŭ 30% akcyj u TAA «BiełAZ-Pamorje» i «BiełAZ-Servis».
Adnak u 2016 hodzie pamiž Čyžom i siamjoj Łukašenki adbyŭsia razład. Na biznesmiena była zaviedzienaja kryminalnaja sprava. Z sakavika pa kastryčnik 2017 hoda jon znachodziŭsia pad vartaj. U krasaviku 2017 hoda sprava była spyniena z-za niedakazanaści.
Paśla vyzvaleńnia ŭ listapadzie 2017 hoda Čyž prapanavaŭ pravieści pravierku finansava-haspadarčaj dziejnaści «Handlovaha doma BiełAZ» i jaho dyleraŭ. Za niekalki miesiacaŭ byli praviedzieny dźvie pravierki, jakija nie vyjavili nijakich parušeńniaŭ.
U vyniku biznesmienu daviałosia pradać akcyi handlovaha doma. Pryčym pa naminalnym košcie.
Jak było napisana ŭ iskavaj zajavie žonki Juryja Čyža, BiełAZ zapatrabavaŭ ad jaje muža pradać akcyi pa naminalnym košcie, matyvujučy heta daručeńniem Łukašenki.
Ale zychodziačy z tekstu damovy kupli-prodažu, nie BiełAZ źviarnuŭsia da Čyža, a Čyž źviarnuŭsia da BiełAZa z prapanovaj kupić u jaho za 120 tysiač rasijskich rubloŭ (kala 1900 dalaraŭ) 4% akcyj, što ŭ 120 razoŭ mienš za ich rynkavy košt.
Pa padlikach «Biełpoła», Čyž zarabiŭ 2,5 młn dalaraŭ za čas vałodańnia akcyjami (2008-2018 hady).
Stała viadoma, kolki zarabili na prodažy BiełAZaŭ pasiaredniki z kołaŭ małodšych Łukašenkaŭ — heta sotni miljonaŭ dalaraŭ na hod
«My adna siamja». Dylery BiełAZa, źviazanyja z synami Łukašenki, zarablajuć, jak sam BiełAZ
Rasśledavalniki: Siamja Dźmitryja Łukašenki ciesna źviazanaja ź biznesoŭcami, jakija zarabili sotni miljonaŭ dalaraŭ na prodažy BiełAZaŭ
Kamientary