«Hałoŭnaje — nie pierachitryć samoha siabie». MZS Biełarusi adkazała na zaklik Ukrainy advieści vojski ad miažy
Pres-sakratar MZS Anatol Hłaz adkazaŭ ukrainskamu boku va ŭłaścivaj sabie maniery: abvinavaciŭ Ukrainu va ŭsich hrachach.
MZS Biełarusi adreahavaŭ na zaklik Ukrainy advieści biełaruskija vojski ad miažy.
Pres-sakratar viedamstva Anatol Hłaz zajaviŭ, što aficyjnych zvarotaŭ ad ukrainskaha boku, maŭlaŭ, nie było.
«Aficyjna takija zvaroty ad ukrainskaha boku ni ŭ jakim vyhladzie da nas nie pastupali. My tolki bačyli hetaje paviedamleńnie na prastorach internetu. Viedajecie, tam chapaje ŭsialakaha. Tak što my sami byli b udziačnyja, kali b chto-niebudź zmoh nam rastłumačyć łohiku padobnych zajaŭ. Jak na našu dumku, vielmi mudrahielistuju», — adznačyŭ Hłaz va ŭłaścivaj jamu maniery.
Jon čarhovy raz abvinavaciŭ Ukrainu ŭ pravakacyjach, nibyta biespryčynnaj kancentracyi vojskaŭ na miažy ź Biełaruśsiu i teraryźmie.
«Atrymlivajecca, što kiraŭnictva Ukrainy zapuskaje praz terytoryju Biełarusi bajavyja drony, a praz tydzień na sajcie svajho MZS ździŭlajecca dziejańniam našych uzbrojenych sił, jakija vykonvajuć zadačy pa harantavańni biaśpieki terytoryi Biełarusi i našych hramadzian.
U našym razumieńni tut usio łahična. Asabliva, kali ŭličyć pastajannyja pravakacyi na miažy z ukrainskaha boku, dysłakacyju hrupoŭki vojskaŭ bolš za 100 tysiač čałaviek, zakidańnie ŭ Biełaruś terarystaŭ, ich zabieśpiačeńnie i finansavańnie, tatalnaje miniravańnie prymiežnaj terytoryi i mnohija inšyja rečy. Ale vy ž razumiejecie, što heta ŭ ramkach kłasičnaj łohiki. A jakoj łohikaj kirujecca ŭkrainski bok, my nie viedajem», — zajaviŭ Hłaz.
Jon vykazaŭ zdahadku, što «tut prysutničaje niejkaja chitraja hulnia, raźličanaja na ŭnutranaje spažyvańnie albo na atrymańnie avacyj z Zachadu».
«Adnak hałoŭnaje ŭ takoj hulni — nie pierachitryć samich siabie», — reziumavaŭ čynoŭnik.
Napiaredadni MZS Ukrainy zajaviła, što Biełaruś kancentruje vojski i techniku na paŭdniovaj miažy. Ukraina zaklikała aficyjny Minsk «nie rabić trahičnych dla ŭłasnaj krainy pamyłak pad ciskam Maskvy», a biełaruskuju armiju — «spynić niedružalubnyja dziejańni i advieści vojski ad dziaržaŭnaj miažy Ukrainy na adlehłaść, jakaja pieravyšaje dalokaść paražeńnia najaŭnych u Respublicy Biełaruś sistem ahniu».
Biełaruś kancentruje vojski kala paŭdniovaj miažy — MZS Ukrainy
«Drazdy-3». Jak u pasiołku pad Minskam pasialilisia Hałoŭčanka, Hłaz, Jančeŭski, Kavalčuk i inšaja łukašenkaŭskaja elita
Ukraincy sprabavali prarvacca ŭ Klimaŭski rajon Branskaj vobłaści — jon miažuje ź Biełaruśsiu
Łukašenka apraŭdvaŭsia na rasijskim TB za advod vojskaŭ ad ukrainskaj miažy
Ciapier čytajuć
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku60
Kamientary