Źlapili z taho, što ŭžo było: pačaŭ pracu novy telekanał — «Pieršy infarmacyjny»
«Pieršy infarmacyjny» kanał zapracavaŭ ad ranicy 17 vieraśnia. Pahladzieli, što ž prapanuje hledačam prajekt, «padobnaha jakomu pa ŭzroŭni i zadumcy ŭ nacyjanalnaj miedyjaprastory nie było». Spojler: usio pradkazalna sumna.
Darečy, treba adznačyć, nakolki ž zacyklenyja łukašenkaŭskija ideołahi na słovie «pieršy». Tak nazyvajecca krama «jaho» mierču, a na BT pra hałoŭnyja padziei ŭ žyćci palityka za tydzień raskazvajuć u rubrycy «Čas pieršaha». Uličvajučy hety fakt, niadziŭna, što televizijonščyki nie vielmi imknulisia być aryhinalnymi, abirajučy nazvu novaha kanała.
Pijaryli «Pieršy infarmacyjny» kanał davoli aktyŭna. Pačynajučy ź biłbordaŭ na biełaruskich vulicach i zakančvajučy instahramami prapahandystaŭ.
Ivan Ejsmant chvaliŭsia, što novy kanał stanie pieršym kruhłasutačnym infarmacyjnym telekanałam u składzie Biełteleradyjokampanii.
Ale padobna, što efirnuju sietku «ŭnikalnaha» kanała zabivali pa pryncypu «źlapili, z taho, što było». Naprykład, zapoŭnić efir vyrašyli pieradačami Ksienii Lebiedzievaj «Heta inšaje» — ich za pieršy tydzień pakažuć ažno 9 razoŭ. Roŭna stolki ž razoŭ hledačy pabačać «Na kantroli prezidenta».
Roznyja varyjanty «Zony Ch» u efiry buduć 33 razy za pieršyja 6 dzion viaščańnia, «Śfiera intaresaŭ» — 17 razoŭ, «Hałoŭny efir» — 5 razoŭ, «Tajamnicy śledstva», «Panarama», «Sport-kadr» — pa 4 razy. Na «Pieršy infarmacyjny» zakinuli navat prahramu «100 pytańniaŭ darosłamu» — šou, u jakim dzieci ahučvajuć zahadzia vyvučanyja pytańni roznym piersanažam.
Asnovu sietki buduć składać naviny — vypuskaŭ pa roznych śfierach zapłanavana ažno 119. Taksama pakažuć 26 «Aŭtarskich pohladaŭ», 25 «Śpiecyjalnych repartažaŭ», 17 «Aktualnych intervju», 8 «Mierkavańniaŭ». Nu i biez «Zrazumiełaj palityki» nikudy — dzivosy, jakija adbyvajucca ŭ Biełarusi, pasprabujuć niejak rastłumačyć u 6 vypuskach.
Kiraŭnictva Biełteleradyjokampanii nazyvaje ŭnikalnymi rubryki i prajekty pad nazvaj «Fakty», «Aktualna», «Mietadata», «Prostaja mova».
Faktyčna heta amal usie tyja samyja prahramy, što ŭžo isnavali ŭ Biełteleradyjokampanii, prosta ciapier ich buduć dublavać na jašče adnu knopku.
Zapłanavana taksama pakazać 17 dakumientalnych filmaŭ i 11 telefilmaŭ. Dvojčy na sutki ŭ efiry budzie hučać himn.
Viadučy BT raskazaŭ, jak jaho nie chacieli puskać u Paryž na Alimpijadu. Ale jon pieramoh
Na BT zapuścili šou «Dobry viečar!» Hościa pieršaha vypusku — zorka rasijskaha šansona Vika Cyhanova
Markaŭ zaklikaŭ zamiaścić YouTube, Telegram, Instagram i TikTok biełaruska-rasijskimi sacsietkami
Marat Markaŭ: DziaržSMI vyzvalilisia ad ludziej z «ideałahičnaj razhublenaściu»
Kamientary