Palityk adznačaje absurdnaść situacyi, što na ciapierašni momant tolki Łukašenka moža harantavać niezaležnaść Biełarusi.
U efiry ŭkrainskaha 5 kanała viadučy zapytaŭsia ŭ Zianona Paźniaka, chto siońnia realna moža zamianić Łukašenku.
Paźniak padkreśliŭ, što ni na jakuju piensiju Łukašenka nie pojdzie: «Jaho ŭstanoŭka padśviadomaja i śviadomaja — pamierci na pasadzie prezidenta. Jak niekatoryja akciory chacieli pamierci na scenie».
«Zabudźcie. Nie treba słuchać, što jon havoryć, što jon niekaha tam pryznačyć… što jon pojdzie. Jon trymajecca za hetu ŭładu pasiniełymi palcami. Budzie piatlać jak zajac uvieś čas», —
vykazvaje svajo mierkavańnie Paźniak.
Paźniak prosić ujavić situacyju, kali raptam adbudziecca pierałom na rasijska-ŭkrainskim froncie. «Pucin askandaliŭsia. Usio pajšło ŭ tartarary. Što budzie rabić Łukašenka? Jon vystupić suprać Pucina! Dakładna! Jon stanie sajuźnikam Ukrainy. (…) Heta dakładna. Heta taki typaž».
Kali ž havaryć pra taho, chto moža zamianić Łukašenku, to Paźniak śćviardžaje:
«Chto moža zamianić? Realna — nichto. Hledziačy jakaja budzie situacyja. Kali jon raptam, skažam, palacić u kosmas, to zamiena budzie jašče horšaj.
Tamu što ŭsia taja publika, jakaja jość, jana nie zdolnaja zachoŭvać niezaležnaść Biełarusi. I nie razumieje, navošta [zachoŭvać]. Jany zdaduć krainu ŭ vielmi karotki termin.
Kali źjavicca niejki typaž, jaki, dapuścim, niejak budzie staracca jašče zachavać niezaležnaść, to jaho chucieńka skrucić Rasija, zojdzie siudy svaimi vojskami, pryznačyć svajho hienierał-hubiernatara i ŭsio. Hety varyjant budzie vielmi drenny.
Tamu situacyja takaja, davoli absurdnaja. Pakul jość hety typaž — Łukašenka, — situacyja tryvaje. Kali heta ŭpadzie, i kali Rasija budzie ŭ sile — chacia b takoj, jak ciapier, — heta značyć, što my možam stracić niezaležnaść. I na poŭnač ad Ukrainy buduć rasijskija vojski, rasijski režym».
Kamientary
I lidar-voŭk biez prablemaŭ voźmie ŭładu ŭ RB i daść adłup Maskovii.