«P****iec adbyŭsia». Volha Kavalkova patłumačyła, čamu adyšła ad palityki i carkvy i jak transfarmuje bol u luboŭ
Apošnija hady žyćcia Volhi Kavalkovaj — heta sucelnaje daśledavańnie. Jana daśleduje krainy — pažyła ŭ Polščy i Ispanii, ciapier spyniłasia ŭ Hiermanii. Jana vyjšła ź Biełaruskaj chryścijanskaj demakratyi i carkvy, pakinuŭšy miesca tolki mieniedžarskaj pracy i jurydyčnym kansultacyjam. I — samaje hałoŭnaje — ščylna zaniałasia mientalnym zdaroŭjem.
«Što z vami zdaryłasia, Vola?» — pytajucca ŭ jaje ŭ instahramie, dzie jana dzielicca ŭnutranymi pieramienami, časam u tancy, časam — publikujučy śmiełyja fotazdymki i hłybokija dumki-razvažańni. «P****iec adbyŭsia, prabačcie. Adbylisia ciažkija padziei, jakija pryviali da transfarmacyi, ale jana adbyvajecca praz bol», — ščyra pryznajecca Volha.
«Ja doŭha nie mahła pryznacca sabie ŭ tym, što mnie baluča»
Amal usie biełarusy paśla 2020 hoda žyvuć z posttraŭmatyčnym stresavym razładam, ličyć Volha. Prosta adzin heta pryznaje, i sprabuje niešta rabić, i inšy — nie. U Volhi akurat źjaviłasia žadańnie razabracca sa svaim stanam.
«U mianie dosyć vialikaja talerantnaść da bolu i strachu, da prynižeńnia. Heta ŭsio, na čym budujecca siońniašniaja palityka, i składana znachodzicca ŭ hetym siektary, kali ty adčuvalny. Tamu ja doŭha nie mahła pryznacca sabie ŭ tym, što mnie baluča. Što toje, što adbyłosia ŭ 2020-m — moj asabisty bol. A taksama inšych biełarusaŭ — nie tolki tych, chto źjechaŭ, ale i tych, chto zastaŭsia. Heta bol usioj Biełarusi.
Plus ja zrazumieła: kali ŭ palitycy ŭ nas tak doŭha nie atrymlivajecca žadanaje, to štości my, vidać, robim nie tak. I treba raźbiracca z saboj najpierš, prychodzić u niejkuju inšuju jakaść siabie. Paśla pryznańnia taho, što mnie baluča, pačaŭsia praces transfarmacyi hetaj enierhii bolu ŭ supraćlehłuju — lubovi».
Praces pracy nad saboj dla Volhi nie spyniŭsia pa siońnia. Za try hady jana pierasprabavała kala 25 roznych instrumientaŭ, praciahvaje terapiju i miedytacyi na stałaj asnovie.
«Była i hrupavaja terapija, i piersanalnaja, i koŭčynhavyja praktyki, i šmat litaratury, cibieckija čary, joha-nidra… Asnoŭnaje, što patrebna dziela źmienaŭ niezaležna ad hadoŭ, heta žadańnie».
«Siońnia ja nie adnošu siabie da nivodnaj ź sistem i ideałohij»
Volha nie tolki nie ŭdzielničała ŭ apošnich vybarach u Kaardynacyjnuju radu, jana vyjšła z BCHD i z chryścijanstva, da hetaha 20 hadoŭ budučy ŭcarkoŭlenaj chryścijankaj.
«Siońnia ja nie adnošu siabie ni da adnoj ź sistem i ideałohij. Ja z udziačnaściu staŭlusia da taho času, kali tam była, ale jany nie adpaviadajuć siońniašniaj mnie.
Ja nie znachodžusia ŭ tych sistemach, jakija mianie zvužajuć i nie dajuć mnie mahčymaści pašyracca. Maja śviadomaść bolšaja, čym jany ciapier».
Pryvodziačy kankretnyja prykłady «vuzkaści», Volha adznačaje, naprykład, što ŭ palitycy pieravažvaje mužčynskaja enierhija.
«Kali ty prychodziš u palityku, treba adpaviadać. Padajecca, ty nie vytrymaješ tam, kali nie budzieš, jak usie. Žanočaja siła dušyłasia šmat hadoŭ, tyja ž inkvizicyi zhadajem.
Taja mahija, ź jakoj žančyna moža transfarmavać śviet, zaŭždy mužčynami dušyłasia. Ale siońnia pa svaich źmienach ja adčuvaju i razumieju, što ŭ palitycy možna pa-inšamu. Možna ŭ lohkaści, rassłablenaści, ź luboŭju, biez napružvańnia, biez baraćby».
Pieraźbirajučy svaju asobu, Volha adkryła, što ciapier dla jaje demakratyja sama pa sabie — nie kaštoŭnaść.
«Dla mianie kaštoŭnaść — svaboda. Tak, u demakratyjach jaje bolš, ale pašyrać miežy svabody i palapšać sistemu možna i inšymi padychodami. Adzin z takich padychodaŭ, dziakujučy jakomu ja dasiahała vynikaŭ da 2020 hoda — heta dyjałoh i vybudova adnosin. Taksama dla mianie kaštoŭnaść — adzinstva, pra jakoje siońnia šmat kažuć i jakoje ja, mabyć, razumieju pa-inšamu. Dla mianie heta — pavaha da luboha čałavieka nasuprać mianie, kali ty nie dzieliš ludziej, a razumieješ kaštoŭnaść i rolu kožnaha. A hety kryter časta nie prachodziać i demakratyčnyja lidary ci ludzi z hetaha asiarodździa, jakija sprabujuć prynizić čałavieka.
Sama ideja Kaardynacyjnaj rady ŭ 2020 hodzie była kłasnaja, tamu što treba było abjadnoŭvać patencyjał ludziej. Ale nam nie chapaje navykaŭ kamunikacyi, kab z pavahaj stavicca da roznaści inšaha čałavieka. Šmat enierhii sychodziła na dakazvańnie, chto z nas lepšy, čyje dumki ci stratehii lepšyja, na kankurencyju, jakoj, nasamreč, uvohule niama, bo niama pola dla kankurencyi.
Volha kaža, što ŭ jaje karcinie śvietu ciapier — usie sajuźniki adnoj hulni, tolki roli va ŭsich roznyja. Navat da ludziej, jakija jaje zatrymlivali i vyvozili z krainy, jana siońnia stavicca z pavahaj.
«Tam, kaniečnie, roznyja ludzi jość. I ja baču kolki repartažaŭ, kolki brudu vylivajecca ŭ tym liku na mianie asabista. Ale pry hetym ja razumieju kolkaść bolu i inšych pačućciaŭ, čamu jany heta robiać. Nie moža tak siabie pavodzić čałaviek, jaki lubić siabie, žyćcio i śviet. My sami padzialajem: naprykład, Łukašenka ci inšy čałaviek — vorah. Ale tolki kali my budziem razvažać, što pierad nami takija ž ludzi, prosta sa svajoj rollu, možna budzie niešta źmianić».
«Kali ŭ kahości jość niehatoŭnaść bačyć mianie ŭ novym prajaŭleńni, treba zadumacca, ci nie ŭłasny heta strach»
Svajoj novaj enierhijaj Volha ŭ tym liku dzielicca ŭ instahramie, publikujučy siabie ŭ tancy ci ŭ dosyć adkrytych, na dumku niekatorych padpisantaŭ, łukach. Jana pryznajecca, što ŭvahi ad mužčyn, kamplimientaŭ apošnim časam stała bolš. Jak i ad žančyn, dla jakich jana stała prykładam raźniavolenaści.
«My nastolki ŭsie abmiežavanyja sistemaj, carkvoj, što prajaŭlacca, kaniečnie, moža być strašna. Strašna vychodzić ź niejkich rolaŭ, u jakich ludzi pryzvyčailisia ciabie bačyć. Ale mnie ciesna vyklučna ŭ roli palityka. I kali ŭ kahości jość niehatoŭnaść bačyć mianie ŭ novym prajaŭleńni, treba zadumacca, ci nie ŭłasny heta strach.
Usio, što vy bačycie i adčuvajecie — heta pra vas. Što ŭ vas sa svajoj seksualnaściu? Zaŭždy zadavajcie pytańni sabie ŭ takich situacyjach. Raniej ja złavałasia, kali mianie chtości tryhieryŭ, a ciapier radujusia — značyć, ja mahu ŭziać niešta ŭ hetaha čałavieka. Usprymajcie, što kožny čałaviek dla vas — koŭč i nastaŭnik, dziakujučy jakomu vy možacie vyraści, kali ŭ vas niama mahčymaści pajści da sapraŭdnaha koŭča.
«Moj fokus ciapier u tym, kab pabudavać supolnaść, u asnovie jakoj budzie pavaha da inšaha čałavieka»
Viartańnia ŭ palityku Volha nie vyklučaje, ale kankretnyja pasady dla jaje bolš nie samameta.
«Ja z 12 hadoŭ maryła być prezidentkaj, ale ciapier razumieju, što lubaja pasada — prosta forma dla taho, kab nieści kaštoŭnaści. Ale ja mahu nieści svaje kaštoŭnaści i praź inšyja formy.
Moj fokus ciapier u tym, kab samoj pabudavać takuju sistemu, supolnaść, u asnovie jakoj budzie pavaha da inšaha čałavieka, niehvałtoŭnaja kamunikacyja, adsutnaść kankurencyi, dzie kožny budzie bačyć svaju i vartaść inšaha. Pačynajecca hetaja pabudova ź ludźmi, ź jakimi ja pracuju — siabrami, kalehami z vysokim uzroŭniem asensavanaści. I potym heta možna budzie maštabavać, bo nielha pabudavać supiervialikuju efiektyŭnuju sistemu, kali jana spačatku nie spracuje na piać čałaviek».
Što heta budzie ŭ vyniku — partyja imia Kavalkovaj ci prosta ekśpierymient, surazmoŭca pakul nie raskryvaje. Ale jana hatovaja dzialicca svaimi viedami z palitykami i prosta ŭsimi zacikaŭlenymi ŭ naładžvańni kamunikacyi ŭ svaim asiarodździ, kali ŭ ich budzie taki zapyt.
«U mianie jość skił — palapšać lubuju sistemu, u jakoj ja znachodžusia. Ale heta dvuchbakovy praces. Vyratoŭvać kahości biez zapytu — u mianie ŭžo niama takoha žadańnia. Tolki kali ja pabaču, što čałaviek choča heta ŭziać, kali jon bačyć u hetym kaštoŭnaść».
«Prapanoŭvać pieramovy pavinny ludzi sa zrazumiełym mandatam. Uzroŭniu Natalli Piatkievič, naprykład»
Dzialicca svaim dośviedam dziela budučyni Biełarusi Volha hatovaja nie tolki z demakratyčnymi siłami, ale i z čynoŭnikami znutry krainy.
«Tamu boku taksama nie chapaje navykaŭ kamunikacyi. Sa mnoj byli roznyja sproby, tak skazać, pieramovaŭ. Maŭlaŭ, Volha, viartajciesia, usio vyrašalna, nie pieražyvajcie, što ŭ vas prysud. Ale ŭ takich pieramovach mnie znoŭ važnaja pavaha i roŭnaść.
Jak čałaviek, datyčny da padziej 2020 hoda, ja biaru adkaznaść za toje, što adbyłosia ŭ Biełarusi i za vynik, jaki my na siońnia majem, i hatova dapamahčy vypravić hetu situacyju. Ale tut važna, kab druhi bok taksama ŭziaŭ na siabie takuju adkaznaść. Nu, a pa-druhoje — prapanoŭvać pieramovy pavinny ludzi sa zrazumiełym mandatam. Uzroŭniu Natalli Piatkievič, naprykład. Tady ja budu razumieć, što sapraŭdy jość žadańnie vyrašyć situacyju, biez eskałacyi. Hatovaja navat pryjechać u Biełaruś i razmaŭlać».
«U Łatuški na mianie kryŭda. A ja adstojvaju svajo mierkavańnie». Dušeŭnaja hutarka z Volhaj Kavalkovaj — pra palityku, siužet na BT i tyndar
«Ci nie zašmat vy na siabie ŭziali?» Cichanoŭskaja adkazała na vostryja pytańni pra status Nacyjanalnaj lidarki
Vaskrasienski patłumačyŭ, što Łukašenka choča ŭ abmien na palitviaźniaŭ. I pachvaliŭ Usava, Bałkunca i Harbunovu
Ciapier čytajuć
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki11
Kamientary
Nu voś, jany, maładyja palityki. Pryjšli na zamienu....https://dck8xvlq18iei.cloudfront.net/img/w732d4webp1/photos/z_2024_09/kavalkova2-su7pd.jpg.webp