Što viadoma pra Viačasłava Papšo — błohiera «Žyvie», jaki pajechaŭ u Biełaruś i byŭ aryštavany
Papšo — hramadzianin Litvy, ale cikaviŭsia biełaruskim paradkam dnia.
Viačasłavu Papšo 39 hadoŭ. Pa źviestkach prajekta Digital intelligence team, jon hramadzianin Litvy, žyŭ u Vilni. Padobna, što sam Viačasłaŭ maje biełaruskija karani, prynamsi, jon doŭhi čas cikaviŭsia biełaruskim paradkam dnia. Svabodna vałodaje litoŭskaj i ruskaj movami, ale dobra razumieje i biełaruskuju.
Jahonaja žonka Volha rodam z Hrodna. Razam jany hadujuć dačku.
Viačasłaŭ zaŭždy cikaviŭsia hramadska-palityčnymi navinami. U sacsietkach pisaŭ pra toje, što jamu balić u Litvie, i dzialiŭsia fotami sa svajho žyćcia.
Ale ŭ 2020 hodzie staŭ pryśviačać videa vyklučna biełaruskaj temie. Jon padtrymlivaŭ biełarusaŭ, jakija vychodzili na pratesty, raskazvaŭ pra palitviaźniaŭ i krytykavaŭ roznyja struktury, apošnim časam hetamu była pryśviečanaja bolšaja častka kantentu.
Viačasłaŭ rabiŭ videa rehularna i vyklučna na entuzijaźmie, źbirali jany niašmat — u siarednim ad 500 da 1000 prahladaŭ.
Apošnija publikacyi Papšo byli pryśviečanyja krytycy Ofisa Cichanoŭskaj i inšych struktur demakratyčnych siłaŭ pa-za miežami Biełarusi. U apošni čas krytyka stanaviłasia ŭsio bolš ahresiŭnaj, vyhladała tak, što błohier atakuje ŭsie struktury i inicyjatyvy adrazu – i Ofis Cichanoŭskaj, i niezaležnyja miedyja, i Połk Kalinoŭskaha. Niezrazumieła navat, kaho jon ličyŭ sajuźnikami.
Viačasłaŭ niečakana dla ŭsich źnik adusiul 29 lipienia 2024 hoda. Paśla hetaha adbyłosia dziŭnaje — ź jaho kanała źnikła častka videa, a z kanała i čata ŭ telehramie vydalili častku padpisčykaŭ. 23 žniŭnia 2024 hoda jahony kanał «Žyvie» ŭnieśli ŭ śpis ekstremisckich farmiravańniaŭ.
Dniami stała viadoma pra zatrymańnie Papšo. Pra heta napisaŭ błohier-kanśpirołah Vital «Virus» Kandracienka — maŭlaŭ, tak jamu adkazali z akaŭnta Viačasłava.
Čamu Papšo vyrašyŭ pajechać u Biełaruś i ŭ čym jaho abvinavačvajuć — nieviadoma.
«Naša Niva» — bastyjon biełaruščyny
PADTRYMAĆ
Kamientary
I takija ž biudžetniki, susiedzka-kankurenta hatunkavyja - z beseseryi, jaho źniavolili. Praz krytyku ž biudžetnikaŭ ichaha hatutku