Kadyraŭ zajaviŭ pra sprobu zamović na jaho zamach i papiaredziŭ ab pomście
«Jość śviedki, jość ludzi, u jakich jany pytalisia, za kolki vy možacie pryniać zamovu». Kadyraŭ zhadvaje Sulejmana Kierymava i Biekchana Barachojeva.
Kiraŭnik Čačni Ramzan Kadyraŭ padčas narady z čačenskimi siłavikami paviedamiŭ pra sprobu zamović na jaho zamach. Videa vystupleńnia Kadyrava apublikavana ŭ jaho telehram-kanale, vialikaja častka jakoha na čačenskaj movie, piša RBK.
U svaim vystupleńni Kadyraŭ zhadvaje sienatara ad Dahiestana Sulejmana Kierymava, a taksama deputataŭ Dziarždumy Biekchana Barachojeva i Ryzvana Kurbanava. «Kali jany nie dakažuć supraćlehłaje, ja aficyjna abjaŭlaju kroŭnuju pomstu Barachojevu, Kierymavu Sulejmanu, Kurbanavu Ryzvanu. Jość śviedki, jość ludzi, u jakich jany pytalisia, za kolki vy možacie pryniać zakaz [na zabojstva Ramzana Kadyrava]», — pieradaje TASS pierakład jaho słoŭ z čačenskaj movy.
Ramzan Kadyraŭ taksama zajaviŭ pra sproby nadać «nacyjanalny koler» situacyi sa stralboj u maskoŭskim ofisie Wildberries i abvinavacić kadyraŭcaŭ u tym, što jany byli inicyjatarami kanfliktu.
«Hłyboka pamylajecca toj, chto ličyć, što možna nastroić cełyja narody suprać adzin adnaho na bytavoj asnovie. Za słovy treba adkazvać! Kali jość pytańni da mianie, to nijakich prablem niama», — skazaŭ kiraŭnik Čačni.
U červieni Wildberries i apieratar vonkavaj rekłamy Russ abviaścili pra abjadnańnie. U lipieni było zarehistravana ich sumiesnaje pradpryjemstva — TAA «RVB». «Vajłdbierryz» atrymaŭ u im 65%, Russ praz TAA «Styn» — 35%. Na fonie ździełki pamiž zasnavalnikami markietplejsa Taćcianaj Kim (da pačatku kastryčnika jana nasiła proźvišča Bakalčuk) i Uładzisłavam Bakalčukom uźnik kanflikt. Kadyraŭ padtrymaŭ Bakalčuka i zajaviŭ pra «rejdarski zachop».
Kim nazvała toje, što adbyvajecca, nie rejdarskim zachopam, a razvodam, i padała isk ab skasavańni šlubu z Bakalčukom.
18 vieraśnia kala ofisa Wildberries niedaloka ad Kramla adbyŭsia ŭzbrojeny kanflikt, u vyniku jakoha zahinuli dvoje achoŭnikaŭ Wildberries, siamiora čałaviek atrymali ranieńni. U Wildberries zajavili, što pieršymi adkryli ahoń uzbrojenyja ludzi, jakija supravadžali Bakalčuka.
U kanflikcie, u pryvatnaści, udzielničali były bajec MMA, čempijon śvietu pa tchekvando, namieśnik kamandzira padraździaleńnia Rashvardyi «Achmat-1» Umar Čyčajeŭ i inšyja vychadcy z respublik Paŭnočnaha Kaŭkaza. Usiaho pa spravie byli aryštavanyja 30 čałaviek. Bakalčuk paśla stralby byŭ zatrymany. Na nastupny dzień jon zajaviŭ, što znachodzicca doma i što ź im «usio ŭ paradku».
Kamientary