Кадыраў заявіў пра спробу замовіць на яго замах і папярэдзіў аб помсце
«Ёсць сведкі, ёсць людзі, у якіх яны пыталіся, за колькі вы можаце прыняць замову». Кадыраў згадвае Сулеймана Керымава і Бекхана Барахоева.
Кіраўнік Чачні Рамзан Кадыраў падчас нарады з чачэнскімі сілавікамі паведаміў пра спробу замовіць на яго замах. Відэа выступлення Кадырава апублікавана ў яго тэлеграм-канале, вялікая частка якога на чачэнскай мове, піша РБК.
У сваім выступленні Кадыраў згадвае сенатара ад Дагестана Сулеймана Керымава, а таксама дэпутатаў Дзярждумы Бекхана Барахоева і Рызвана Курбанава. «Калі яны не дакажуць супрацьлеглае, я афіцыйна аб’яўляю кроўную помсту Барахоеву, Керымаву Сулейману, Курбанаву Рызвану. Ёсць сведкі, ёсць людзі, у якіх яны пыталіся, за колькі вы можаце прыняць заказ [на забойства Рамзана Кадырава]», — перадае ТАСС пераклад яго слоў з чачэнскай мовы.
Рамзан Кадыраў таксама заявіў пра спробы надаць «нацыянальны колер» сітуацыі са стральбой у маскоўскім офісе Wildberries і абвінаваціць кадыраўцаў у тым, што яны былі ініцыятарамі канфлікту.
«Глыбока памыляецца той, хто лічыць, што можна настроіць цэлыя народы супраць адзін аднаго на бытавой аснове. За словы трэба адказваць! Калі ёсць пытанні да мяне, то ніякіх праблем няма», — сказаў кіраўнік Чачні.
У чэрвені Wildberries і аператар вонкавай рэкламы Russ абвясцілі пра аб’яднанне. У ліпені было зарэгістравана іх сумеснае прадпрыемства — ТАА «РВБ». «Вайлдберрыз» атрымаў у ім 65%, Russ праз ТАА «Стын» — 35%. На фоне здзелкі паміж заснавальнікамі маркетплейса Таццянай Кім (да пачатку кастрычніка яна насіла прозвішча Бакальчук) і Уладзіславам Бакальчуком узнік канфлікт. Кадыраў падтрымаў Бакальчука і заявіў пра «рэйдарскі захоп».
Кім назвала тое, што адбываецца, не рэйдарскім захопам, а разводам, і падала іск аб скасаванні шлюбу з Бакальчуком.
18 верасня каля офіса Wildberries недалёка ад Крамля адбыўся ўзброены канфлікт, у выніку якога загінулі двое ахоўнікаў Wildberries, сямёра чалавек атрымалі раненні. У Wildberries заявілі, што першымі адкрылі агонь узброеныя людзі, якія суправаджалі Бакальчука.
У канфлікце, у прыватнасці, удзельнічалі былы баец ММА, чэмпіён свету па тхэквандо, намеснік камандзіра падраздзялення Расгвардыі «Ахмат-1» Умар Чычаеў і іншыя выхадцы з рэспублік Паўночнага Каўказа. Усяго па справе былі арыштаваныя 30 чалавек. Бакальчук пасля стральбы быў затрыманы. На наступны дзень ён заявіў, што знаходзіцца дома і што з ім «усё ў парадку».
Цяпер чытаюць
«Самі хутка здохнуць». Фоты з саміта ў Мінску даюць пабачыць Пуціна і Лукашэнку без грыму, а таксама Колю4
Каментары