«Najbolš im cikavy Połk Kalinoŭskaha i Ofis Cichanoŭskaj». KDB viarbuje aktyvistaŭ unutry Biełarusi
«Naša Niva» na asnovie razmovaŭ ź ludźmi ŭ Biełarusi vyśvietliła voś što.
«Našaj Nivie» viadomyja prynamsi čatyry vypadki, kali ludziej, jakija raniej byli aktyvistami niedziaržaŭnych arhanizacyj ci jakija da apošniaha zajmalisia niepalityčnaj hramadskaj dziejnaściu ŭ Biełarusi, aryštoŭvali i sadzili na sutki ŭ Biełarusi. I padčas adbyćcia administratyŭnaha aryštu ich šantažavali apieratyŭniki KDB, staviačy pierad vybaram: abo viarboŭka, abo nadumanaja kryminalnaja sprava.
Što abjadnoŭvaje ŭsie čatyry vypadki: adpracoŭvajucca inicyjatyvy, jakija zusim nie źviazanyja z palitykaj i nikoli nie byli źviazanyja z palitykaj: ekałohija, adukacyjnyja, studenckija i žanočyja inicyjatyvy.
Padčas viarbovačnaj razmovy niekatorym ź ludziej raskazvajuć, byccam by niedziaržaŭnyja arhanizacyi ŭ Biełarusi chočuć adradzić svaje struktury da vybaraŭ, kab «razhojdvać hramadstva».
Dziaržbiaśpieku cikavić, chto ŭvachodzić u tuju ci inšuju inicyjatyvu, jak ludzi kamunikujuć z aktyvistami, jakija pierajechali za miažu, jak finansujucca arhanizacyi, jak dachodziać u krainu hrošy.
Asabliva śpiecsłužbistaŭ cikavić Połk Kalinoŭskaha i struktury, blizkija da Ofisa Śviatłany Cichanoŭskaj.
Charakterna, što meta razmovaŭ, ci dopytaŭ, jak heta ni nazyvaj, ciapier amal zaŭsiody — viarboŭka.
U viadomych nam vypadkach, navat kali čałaviek nie viedaŭ ci ź niejkich pryčynaŭ nie davaŭ infarmacyi, jakaja cikavić KDB, heta nie pryvodziła da kryminalnaha pieraśledu. My nie viedajem, ci jość vypadki, kali praśledavali niekaha z tych, u kaho nie atrymałasia supracoŭnictva z KDB ci chto admoviŭsia padpisać papieru pra supracoŭnictva.
16 kastryčnika Pravaabarončy centr «Viasna» napisaŭ, što apošni miesiac KDB «vyklikaje na razmovy» i zatrymlivaje ludziej, jakija majuć dačynieńnie da roznych inicyjatyŭ i prajektaŭ, što lehalna pracujuć u Biełarusi. Jak stała viadoma pravaabaroncam, heta adbyvajecca ŭ roznych kutkach krainy i z prajektami roznaj nakiravanaści.
Adnym z faktaraŭ, što abjadnoŭvaje ŭsie hetyja kiejsy, źjaŭlajecca toje, što siłaviki chočuć schavać represii ad hramadstva — ludziam pahražajuć, što kali infarmacyja pra pieraśled trapić da pravaabaroncaŭ i ŚMI, to ŭ dačynieńni da ich buduć raspačatyja kryminalnyja spravy.
Pravaabaroncy majuć śpis arhanizacyj i prajektaŭ, jakija trapili pad represii KDB, ale nie publikujuć jaho ŭ metach biaśpieki.
«Naša Niva» — bastyjon biełaruščyny
PADTRYMAĆ
Amierykancy dabilisia vyzvaleńnia Juryja Ziankoviča. Jon byŭ prysudžany da 11 hadoŭ źniavoleńnia18
Kamientary