Amierykaniec padumvaje pierajazdžać u Biełaruś — pryčyna aryhinalnaja
U sacsietcy Reddit źjaviŭsia post ad žychara ZŠA, jaki razhladaje mahčymaść pajechać u Biełaruś.
Ananimny karystalnik piša, što praz šmat pryčyn u ZŠA vielmi ciažka atrymać miedyčnuju adukacyju. Amierykaniec taksama nie razumieje, navošta jamu rabicca častkaj miedyčnaj sistemy ZŠA, bo ŭ jaho da jaje šmat pytańniaŭ.
Aŭtar pasta narakaje, što ŭ amierykanskaj miedycynie vydatkoŭvajuć bahata hrošaj, ale vyniki jon nazyvaje «najhoršymi»:
«Asabliva paśla taho, jak praviły žyćcia ŭ čas kavidu, naviazanyja daktarami hramadstvu, razburyli miljony žyćciaŭ, dy apijoidny kryzis, vyklikany tym, što daktary masava prapisvali abiazbolvajučyja, razburyŭ jašče miljony žyćciaŭ, i paśla šmatlikich inšych sumnych prablem, niahledziačy na pryniatuju klatvu «nie naškodź».
Amierykaniec užo viedaje niekalki moŭ, akramia anhlijskaj: ispanskuju, niamieckuju, kitajskuju, partuhalskuju i francuzskuju. Tamu jon upeŭnieny, što zdoleje chutka vyvučyć i ruskuju movu.
I tym nie mienš, amierykaniec maje svaje aściarohi. Naprykład, jon viedaje, što Dziarždepartamient raić hramadzianam ZŠA nie jechać u Biełaruś, bo ŭ našaj krainie ich mohuć aryštavać ci prosta drenna da ich pastavicca. Taksama aŭtar pasta razumieje, što vajna va Ukrainie moža ŭskładnić ździajśnieńnie jaho płanaŭ pa navučańni ŭ Biełarusi.
U kamientarach amierykaniec dadaje, što, na jaho dumku, Minsk vyhladaje čystym i biaśpiečnym horadam, dzie možna fajna bavić čas, a harady ZŠA jon nazyvaje brudnymi. Jašče adna pretenzija amierykanca — toje, što ŭ miedycynie ZŠA pracuje bahata ludziej z takich «ničoha nie vartych» (pavodle amierykanca) miescaŭ, jak Indyja i Iran.
Darečy, na sioletnich prezidenckich vybarach aŭtar pasta źbirajecca hałasavać za Donalda Trampa. Pierad tym, jak spytać na Reddit pra miedyčnuju adukacyju ŭ Biełarusi, jon cikaviŭsia nakont anałahičnaj adukacyi ŭ Rasii dy jašče abiacaŭ, kali jaho prymuć tudy vučycca, zaŭždy być udziačnym Rasii i, mahčyma, zastacca tam žyć.
Inšy karystalnik apisaŭ dla amierykanca jaho pierśpiektyvy, kali aŭtar pasta nasamreč atrymaje ŭ Biełarusi miedyčnuju adukacyju:
«Kali vy chočacie nie być zdolnym z vašym dypłomam pracavać ni ŭ adnoj zachodniaj krainie i kali vy chočacie pracavać u vielizarnaj depresiŭnaj pustečy, pakinutaj šmatlikimi daktarami, jakich kinuli za kraty z-za palityčnaj apazicyjnaści abo prymusili źbiehčy z krainy, to prosta napierad!
Hučyć jak žudasnaja ideja, ale kali fanat dyktatury nasamreč pryjedzie i budzie žyć u vyšejpaznačanaj dyktatury, ja całkam heta padtrymlivaju. Nasamreč».
«Naša Niva» — bastyjon biełaruščyny
PADTRYMAĆ
Kamientary