Z pačatku poŭnamaštabnaj vajny zahinuli 43 tysiačy ŭkrainskich vajskoŭcaŭ. Pra heta zajaviŭ prezident Ukrainy Uładzimir Zialenski.
«Našy ludzi koštam svaich žyćciaŭ abaraniajuć svoj dom, i kožnaje žyćcio našych vajaroŭ i našych cyvilnych kaštoŭnaje dla nas. Z pačatku poŭnamaštabnaj vajny Ukraina straciła 43 tysiačy voinaŭ, jakija zahinuli na poli boju. 370 tysiač vypadkaŭ akazańnia dapamohi paranienym, i heta z ulikam, što ŭ našym vojsku prykładna 50 pracentaŭ paranienych viartajucca ŭ stroj, i fiksujucca ŭsie ranieńni, u tym liku lohkija i paŭtornyja», — skazaŭ Zialenski.
Jon taksama nazvaŭ svaju acenku rasijskich strat. Pa jahonych słovach, Rasija straciła 198 tysiač čałaviek zabitymi, bolš za 550 tysiač atrymali ranieńni.
«Ź vieraśnia hetaha hoda Rasija hublaje na poli boju ludziej u suadnosinach 5 i navat 6 suprać 1 u nas. Tak jany chočuć zachapić bolš ziamli, pierš čym cisk śvietu na ich moža ŭzmacnicca da nievynosnaha», — napisaŭ Zialenski.
U lutym 2024 hoda Zialenski kazaŭ, što z pačatku poŭnamaštabnaj vajny z Rasijaj zahinuła 31 tysiača ŭkrainskich vajskoŭcaŭ.
U kancy listapada 2024 hoda žurnalisty acanili, kolki ŭkraincaŭ zahinuła ŭ vajnie z rasijanami. Pavodle vydańnia The Economist, Ukraina mahła stracić ad 60 da 100 tysiač sałdat zahinułymi, jašče kala 400 tysiač sałdat mahli atrymać ciažkija ranieńni. Što tyčycca rasijskich strat, to, pavodle danych vydańnia, Rasija za hety čas straciła kala 200 tysiač vajskoŭcaŭ zabitymi.
Kamientary