«Nie padajcie ducham, paručyk Špakoŭski». Jak biełaruskija prapahandysty i analityki reahujuć na padziei ŭ Siryi
Paŭstancy zachapili Damask, Bašar Asad daŭ łataty. Heta vialiki hieapalityčny ŭdar pa Rasii. Sabrali acenki situacyi.
Hihin: «Padzieńnie Asada — mocny ŭdar pa Rasii. Ale nie śmiarotny»
Takoje mierkavańnie ŭ svaim telehram-kanale vykazaŭ Vadzim Hihin. Jon azadačany prablemaj zachavańnia rasijskich baz u Siryi:
«Asad usio. Rasija zaraz budzie vyrašać svaje zadačy ŭ Siryi bieź jaho. Składana, ale nie niemahčyma. Zrazumieła, što ŭ pieršuju čarhu staić pytańnie ab rasijskich bazach, a mienavita ich biaśpiecy i mahčymym zachavańni (pažadana) ci vyvadzie».
Hihin bačyć, što z pradstaŭnikami «antyasadaŭskich sił» možna damaŭlacca. I raić «zachoŭvać chałodnuju hałavu i mocnyja niervy».
«Padzieńnie Asada — mocny ŭdar dla Rasii. Ale nie śmiarotny. Adna z klučavych zadač zaraz, kab da ŭłady ŭ Damasku nie prarvalisia praamierykanskija maryjanietki», — piša Hihin.
Špakoŭski: «Pieramieny mohuć być nie tolki da lepšaha, ale i da horšaha»
Alaksandr Špakoŭski pra padziei ŭ Siryi vykazaŭsia ŭčora. Daradca-pasłańnik pasolstva Biełarusi ŭ Rasii i asabliva davierany čałaviek režymu zaŭvažaje:
«Toje, što adbyvajecca ŭ Siryi — adzin z elemientaŭ toj karciny hłabalnych pieramien, jakija adbuducca ŭžo ŭ bližejšy čas».
Prapahandyst zaŭvažaje, što pieramieny mohuć być nie tolki da lepšaha, ale i da horšaha, i tłumačyć:
«U šerahu vypadkaŭ čakany hłabalny kampramis — heta nie tolki žadanyja pośpiechi (taksama abaviazkova buduć), ale taksama narastańnie schavanych i vidavočnych ryzyk, jakija transfarmujucca ŭ aktualnyja pahrozy ŭ budučyni.
U hetym sensie tryumf «prahresiŭnych džychadystaŭ» (jak ich nazyvaje zachodniaja presa) u Siryi nie abiacaje ničoha dobraha. Narastajuć terarystyčnyja vykliki dla Centralnaj Azii, Irana, Rasii».
Špakoŭski zaŭvažaje, što prykład «siryjskaj madeli pieryjadu Bašara Asada» pakazalny jašče i tym, što «zamiežnaja padtrymka nie moža być stałaj harantyjaj isnavańnia dziaržavy».
«Tolki ŭłasnaje matyvavanaje vojska, pravaachoŭny błok i śpiecsłužby razam z šyrokaj hramadskaj lehitymnaściu zdolnyja zabiaśpiečyć dziaržaŭny suvierenitet», — adznačaje prapahandyst i dadaje, što dla kiraŭnictva krainy «vielmi škodna samazaspakojvacca va ŭtulnym łožy «kanstruktyŭnych» spravazdač čynoŭnikaŭ i miłahučnaj prapahandy».
Špakoŭski prapanuje «formułu abarony luboj dziaržavy, jakaja padviarhajecca ahresii «mocnych hetaha śvietu» — «sistema pierakryžavanaha kantrolu, pastajannaja krytyka i samakrytyka, akcent na prablemnych pytańniach, niaspynnaja bajavaja vučoba armii i pravaachoŭnaha błoka».
«Zastoj u padobnych vypadkach padobny da śmierci», — ličyć prapahandyst.
Dziermant: «Nielha spadziavacca na zamiežnuju vajennuju dapamohu»
Z Špakoŭskim salidarny Alaksiej Dziermant. Na svajoj staroncy ŭ telehramie siońnia rankam jon pakinuŭ karotki post nastupnaha źmiestu:
«Hałoŭnaja navuka ź Siryi takaja: nikoli nielha spadziavacca tolki na zamiežnuju vajennuju dapamohu. Ułasnaje mocnaje vojska i śpiecsłužby — na hetym nielha ekanomić. I nikoli nielha marudzić z umacavańniem unutranaha adzinstva, kali jość na heta čas. Utrymać krainu moža navat nievialikaje zhurtavanaje, idejna zaradžanaje jadro, ale jano pavinna ŭ vas być».
Azaronak: «Na Rasiju niama čaho narakać»
Salist biełaruskaj prapahandy Ryhor Azaronak na praciahu siońniašniaha dnia na svajoj staroncy ŭ telehram pakinuŭ niekalki dopisaŭ.
Pieršy jon raspačaŭ z frazy «Na Rasiju tut narakać niama čaho». (jon napisaŭ pa-rasiejsku z pamyłkaj: «piniať»). Jon miarkuje: za toje, što adbyłosia, niasie adkaznaść kiraŭnictva Siryi:
«Za zachavanaść ułady i terytoryi adkazvaje vajskova-palityčnaje kiraŭnictva krainy. Rasija ŭ 2016 hodzie Siryju vyratavała. Mahčymaść stvarać mahutnaje vojska była».
«Dla nas adna navuka — nikoli nie samazaspakojvacca. Nikoli nie vieryć Zachadu. Sajuźniku vieryć, ale samim nie kiepścicca. Rabić vojska, zbroju i ideałohiju. I čakać udaru».
U nastupnym svaim paście Azaronak tłumačyć: «Armija, bieśpiłotniki, arta, vojski, vyvučka, dobraachvotniki, prapahanda, raźviedka i kontrraźviedka, technika, ludzi».
I jašče raz dadaje pra sajuźnika: «Sajuźnik dapamoža tolki tady, kali ty sam na niešta zdatny».
«U Bašara Asada byŭ čas na ŭsio heta. Ale jon pavieryŭ u damoŭlenaści z Zachadam i pryhožyja spravazdačy».
U nastupnym zapisie prapahandyst zaŭvažaje: «Kali Zachad vas pryhavaryŭ — to vy možacie choć sto razoŭ ź im damovicca. Bašar Asad vučyŭsia ŭ Brytanii, mieŭ bliskučyja adnosiny z francuzami. Jak i Chusejn, zbroju jakomu dla vajny ź Iranam davali Štaty. Jak i Kadafi, jaki spansaravaŭ Sarkazi. Jak i Miłošavič, jaki «ŭsio parašaŭ» z Zachadam».
Nasamreč, Azaronak tut naciahvaje rečaisnaść na svaje antyzachodnija schiemy. Zachad uchiliŭsia ad vyrašeńnia situacyi ŭ Siryi — tamu što Asad byŭ suprać taho, kab Zachad braŭ u hetym udzieł. Abama čyrvonuju liniju pravioŭ — i ŭmyŭ ruki, kali Damask jaje pierajšoŭ. Los krainy vyrašali Rasija, Iran, Turcyja — a Asad, naadvarot, zrabiŭ staŭku na siłavoje rašeńnie, a nie damovy.
Azaronak prapanuje nie haravać z nahody projhryšu Rasii ŭ Siryi. Jon ličyć, što «hłabalna» jana budzie ŭ pieramožcach: «Rasija prajhravała Krymskuju vajnu. Japonskuju. Stalin prajhravaŭ Juhasłaviju, Hrecyju, Iran. Ale my zaŭsiody ŭ vyniku pieramahali hłabalna. Nie padajcie ducham».
Łazutkin: «Śviet staŭ bližejšym da kanfliktu vakoł Irana»
Na sajcie BiełTA i dziaržaŭnych ŚMI naviny ź Siryi hublajucca siarod inšych padziej u śviecie. BiełTA i «Biełaruś siehodnia» pieradrukoŭvaje paviedamleńni TASS, svajho mierkavańnia, jak i svaich karespandentaŭ Minsk nie maje, hladzić na śviet praz padzornuju trubu Maskvy. Z kamientaryjem vystupiŭ tolki palityčny ahladalnik «Minskaj praŭdy» kamunist Andrej Łazutkin.
Jon śćviardžaje, što «ŭ bližejšy čas Siryja źniknie jak subjekt mižnarodnych adnosin. Na karcie zastanucca staryja miežy, ale, jak i Livija, niekali adzinaja dziaržava pieratvorycca ŭ nie źviazanyja adna z adnoj zony kantrolu».
Pa mierkavańni Łazutkina, «roznych hulcoŭ u rehijonie» abjadnoŭvała supolnaja meta — likvidavać uładu Asada. Ciapier, kali jana dasiahnutaja, kožnaja hrupoŭka paasobku budzie realizoŭvać svaje intaresy.
«Jak praviła, zony kantrolu chutka farmujucca vakoł naftavych radoviščaŭ i kanałaŭ łahistyki, tamu ŭ kožnaj uzbrojenaj bandy chutka budzie svaja vyška, ściah i šejch. Novaj adzinaj siły, pa typie IDIŁ, tam nie źjaviacca, u svajoj masie heta buduć kurdskija, pratureckija i vachabickija farmiravańni».
Kamunist čakaje, što Siryju čakaje kryzis kiravańnia na praciahu niekalkich miesiacaŭ. A Rasija, chutčej za ŭsio, pasprabuje zachavać chacia b zonu kantrolu ŭ Łatakii, kab mieć chacia b minimalny instrumient dla ŭpłyvu na situacyju.
«Ale navat u vypadku poŭnaha chaosu niejkaja apornaja hrupa siarod nasielnictva ŭ Rasii zastaniecca — da rasiejcaŭ hramadzianie Siryi staviacca dobra, mnohija kiraŭniki vučylisia ŭ savieckich VNU, rasiejcam udziačnyja za akazanuju dapamohu. Tak što, chutčej za ŭsio, u procivahu novaj uładzie (pratureckim i vachabickim hrupoŭkam) rasiejcy praciahvajuć šukać padychody da siryjskaha kiraŭnictva na miescach», — ličyć Łazutkin i dadaje, što «z padzieńniem Siryi śviet staŭ adnaznačna bližejšym da łakalnaha kanfliktu vakoł Irana».
Charakterna, što Łazutkin, jak i Hihin, i amal usie, kamu ŭ łukašenkaŭskich ŚMI dazvolena havaryć, nie robiać roźnicy miž intaresami Biełarusi i Rasii. Dla ich intaresy Maskvy, u tym liku i ŭ dalokaj Siryi — heta i ich intaresy.
Niezaležnyja analityki i žurnalisty niezaležnych ŚMI, naadvarot, miarkujuć, što biełaruski intares z rasijskim razychodzicca.
Frydman: «Budučynia Siryi vyhladaje zmročna»
Taki pohlad vykazaŭ analityk Alaksandr Frydman. Na jaho pohlad, kraina maje ŭsie šancy «zahraznuć na hady ŭ kryvavym bałocie hramadzianskaj vajny i pieratvarycca ŭ «novuju Liviju».
Analityk prahnazuje, što «za radaściu ŭ Chomsie, Damasku i Alepa vielmi chutka rušyć uśled praćvieražeńnie, a ŭ Jeŭropu nakirujucca natoŭpy biežancaŭ, jakich u hety raz u ES, imavierna, nie puściać».
Jon zaŭvažaje, što krach Asada nanosić surjozny ŭron maskoŭska-tehieranskaj «vosi zła».
Pavodle słoŭ Frydmana, ambicyjny fundamientaliscki Iran pakazaŭ siabie słaboj rehijanalnaj dziaržavaj, a razhrom iranskaha pasolstva ŭ Damasku moža stać pradvieśnikam epachalnych pieramien u samoj Isłamskaj Respublicy, režym jakoj trymajecca na štykach Korpusa vartavych isłamskaj revalucyi i inšych karnych padraździaleńniaŭ.
Maskva ž paciarpieła, mabyć, samaje hučnaje zamiežnapalityčnaje paražeńnie za miežami postsavieckaj prastory z časoŭ vojnaŭ u Juhasłavii i jašče raz nahladna pakazała, što źjaŭlajecca tyhram, ale papiarovym tyhram, piša Frydman.
Analityk ličyć krach Asada znakavym dla inšych dyktataraŭ.
«Los Asada (niezaležna ad taho, zahinuŭ jon u avijakatastrofie ci stanie «novym Janukovičam») jašče raz paćviardžaje, što chod majatnika historyi možna zapavolić (jak heta robić Pucin usie apošnija hady), ale jaho nielha spynić. Pucin i Łukašenka nikoli nie zrazumiejuć hetuju prostuju aksijomu. Jany mohuć i dalej zapasacca «arešnikami», ale «arešniki» nie vyhaniać ź ich rezidencyj pryvidu… pryvidu zrynutaha dyktatara Bašara Asada», — dadaje Frydman.
Hurnievič: «Što Pucin vyjhraŭ u Siryi?»
Hetym pytańniem zadaŭsia Dźmitryj Hurnievič. U svaim telehram-kanale žurnalist zaŭvažaje, što padzieńnie režymu Asada ŭ Siryi nahadała źbituju formułu «Pucin usich pierajhraŭ», jakuju «vielmi časta paŭtarali, kali kazali pra Siryju. Maŭlaŭ, och, och, jakija hienijalny strateh i taktyk Pucin. Zły, ale hienij».
Žurnalist pryvodzić vialiki tekst, napisany im jašče ŭ 2018 hodzie pra mif pra «pieramohi» Pucina. U im jon krytykuje prapahandu, jakaja stvaraje vobraz rasijskaha prezidenta jak mocnaha lidara i chavaje sapraŭdny stan rečaŭ. «Zadavoleny ad frazy «Pucin usich pierajhraŭ» moža być tolki sam Pucin», — ličyć Hurnievič.
Usie kiraŭniki, suprać jakich vystupali pratestoŭcy padčas Arabskaj viasny 2011 hoda, syšli ŭ minułaje. Asad staŭ apošnim
Izrail nanios avijaŭdary pa Damasku. I zaniaŭ častku terytoryi Siryi na Hałanskich vyšyniach
MZS Rasii pierastała nazyvać siryjskich paŭstancaŭ terarystami — ciapier kažuć pra apazicyju
Bašar Asad pakinuŭ pasadu prezidenta Siryi i krainu — MZS Rasii
Kamientary
Ale navat atłumleny pačućciem zara zdahadajecca:
Kamuniany razhledzieli dychatamiju pamiž spadarom Asadam i iślamskimi fundamentalistami i ŭjaŭlajuć jaje, jak supraćstajańnie zła z dabrom? A z hetaje nahody zara śviatkujuć pieramohu demakratyi ŭ pieradčuvańni pavieličeńnia nadojaŭ z bulby kubičnaj ŭ pieraliku na adsotak pracaŭładkavanych adnačasova ź nieminuča nadychodziačym apadzieńniem błych i mandavošaknak z pracaadzinkavych tušak ŭ kamunianskim kałhasie za try parseki ad Byłoha Asadlandu?
Iślamisty vyščymili spadara Asada erho i škodniki z kamunianskich paloŭ źbiahuć!