«Niepadkupnym» biełaruskim dypłamatam u Małdovie akazaŭsia kadravy supracoŭnik KDB
Biełaruskaha dypłamata z pasolstva Biełarusi ŭ Małdovie, jakoha nibyta sprabavali zavierbavać u Kišyniovie polskija śpiecsłužby, zavuć Uładzimir Zubkoŭ. Jon źjaŭlaŭsia supracoŭnikam Hałoŭnaha ŭpraŭleńnia Kamiteta dziaržaŭnaj biaśpieki Biełarusi. Reform.news daviedaŭsia jaho imia i padrabiaznaści jaho žyćciovaha šlachu.
U repartažy pra śpiecapieracyju KDB u Małdovie, jaki 10 śniežnia pakazali ŭ efiry «Biełaruś 1», śćviardžałasia, što polski dypłamat prapanavaŭ biełaruskamu kalehu 100 tysiač jeŭra za pracu na śpiecsłužby Polščy, ale biełarus admoviŭsia ad supracoŭnictva, zmoh zapisać ich razmovu i navat źniać častku sustrečy na videa. Było ahučana tolki imia biełaruskaha dypłamata. Jaho zavuć «Vałodzia». Tak jaho nazyvaŭ polski kaleha Marcin Hrabovič. Intervju z «Vałodziem» biełaruskimi prapahandystami zapisvałasia sa śpiny. Tvar byŭ schavany. Proźvišča nie nazyvałasia.
U biełaruskaj ambasadzie nie tak šmat dypłamataŭ ź imiem Uładzimir. Dakładniej takich dypłamataŭ usiaho adzin — heta Uładzimir Zubkoŭ. U siecivie praktyčna niama infarmacyi pra dypłamata Uładzimira Zubkova, nieviadoma navat jaho imia pa baćku, ale dosyć šmat zhadak pra vypusknika Vajskovaj akademii Biełarusi Uładzimira Anatoljeviča Zubkova.
Hety Zubkoŭ naradziŭsia 3 žniŭnia 1984 hoda. Vučyŭsia ŭ Minskim suvoraŭskim vučyliščy (46-y vypusk, druhaja rota). Zatym pastupiŭ u Vajskovuju akademiju na fakultet pahraničnych vojskaŭ.
8 maja 2015 hoda Zubkovu ŭručyli miedal «za ŭkład u stvareńnie Jeŭrazijskaha ekanamičnaha sajuza» III stupieni. Miarkujučy pa ŭznaharodnym dakumiencie, u pamiežniki «Vałodzia» nie pajšoŭ, a pracaŭładkavaŭsia ŭ Hałoŭnaje ŭpraŭleńnie KDB Biełarusi. U 2015 hodzie jon pracavaŭ na pasadzie «hałoŭny refierent adździeła HU KDB RB».
Reform.news źviarnuŭsia pa dapamohu da «Kibierpartyzanaŭ». Sapraŭdy, u pasolstvie Biełarusi ŭ Małdovie ŭ jakaści daradcy pracuje toj samy kadravy supracoŭnik KDB Uładzimir Anatoljevič Zubkoŭ.
Ci moža kadravy supracoŭnik KDB pracavać u pasolstvie daradcam? Pa słovach byłoha dypłamata Valeryja Kavaleŭskaha z Ahienctva jeŭraatłantyčnaha supracoŭnictva, takoje byvaje.
«Supracoŭnik śpiecsłužby adkryta zajaŭlaje: «Ja pryjechaŭ ad KDB, maja zadača — kontrraźviedka, supracoŭnictva ź miascovymi śpiecsłužbami pa pytańniach baraćby z teraryzmam, narkatrafikam i hetak dalej».
Adnak, adznačaje Kavaleŭski, byvajuć situacyi, kali rabotniki śpiecsłužbaŭ pryjazdžajuć pad prykryćciom. U takim vypadku ŭłady prymajučaj krainy mohuć vysłać takich supracoŭnikaŭ z-za dziejnaści, jakaja nie adpaviadaje zajaŭlenaj mety.
Całkam tekst pa spasyłcy.
Kamientary
- Antybiełaruskaja bursa imia kata biełaruskaha naroda Suvorava, jaki źjaŭlaŭsia addanym karnikam rasiejskaha samdziaržaŭja
- Koračka na nibyta ahulnavajskovym fakultecie, jaki nasamreč rychtuje palityčnuju palicyju dyktatara - KDB.
- Viarboŭka FSB, kab vyniščać biełaruščynu i vykonvać rolu voka Kramla, pryhladajučy za dyktataram i jahonaj namienkłaturaj. Za heta i napracavanaja azijopskaja miadalka ad rasiejskich haspadaroŭ.