Napiaredadni SBU pradjaviła padazreńnie zabitamu ŭ Maskvie hienierał-lejtenantu za prymianieńnie chimičnaj zbroi
SBU ŭčora apublikavała ŭ telehram-kanale padazreńnie zabitamu rankam u Maskvie načalniku vojskaŭ radyjacyjnaj, chimičnaj i bijałahičnaj abarony US RF, hienierał-lejtenantu Iharu Kiryłavu.
SBU 16 śniežnia pradjaviła padazreńnie zabitamu siońnia ranicaj u Maskvie hienierał-lejtenantu Kiryłavu. Śćviardžajecca, što jon adkazny za prymianieńnie chimzbroi suprać USU na ŭschodnim i paŭdniovym frantach Ukrainy.
«Pa zahadzie Kiryłava z pačatku poŭnamaštabnaj vajny zafiksavana bolš za 4,8 tysiač vypadkaŭ vykarystańnia voraham chimbojeprypasaŭ», — havorycca ŭ paviedamleńni.
U pryvatnaści, havorka idzie ab bajavych hranatach K-1, jakija asnaščany atrutnymi rečyvami razdražnialnaha dziejańnia — CS i CN. Ich vykarystańnie zabaroniena Kanviencyjaj ab zabaronie raspracoŭki, vytvorčaści, prymianieńnia chimičnaj zbroi, śćviardžaje SBU.
SBU piša, što identyfikavała na poli boju i pieradała ŭ Mižnarodnuju arhanizacyju pa zabaronie chimičnaj zbroi rasijskija hranaty z atrutnymi rečyvami i adpaviednyja ŭzory hleby.
Dźvie łabaratoryi nibyta paćvierdzili hetyja vajennyja złačynstvy Rasii.
«Na padstavie sabranych dokazaŭ śledčyja Słužby biaśpieki paviedamili Kiryłavu ab padazreńni pa č.2 art.28, č.1 art.438 Kryminalnaha kodeksa Ukrainy (vajennaje złačynstva, ździejśnienaje pa papiaredniaj zmovie hrupaj asob)», — havorycca ŭ paviedamleńni SBU.
Vybuch adbyŭsia rankam 17 śniežnia ŭ Maskvie. Zahinuŭ načalnik vojskaŭ radyjacyjnaj, chimičnaj i bijałahičnaj abarony US RF, hienierał-lejtenant Ihar Kiryłaŭ, a taksama jaho kiroŭca. Imavierna, vybuchoŭka była ŭ samakacie, jaki stajaŭ kala doma.
Kiryłaŭ viadomy tym, što abvinavačvaŭ ZŠA ŭ stvareńni bajavych kamaroŭ dla Ukrainy: jon raspaviadaŭ ab bijałabaratoryjach va Ukrainie, stvoranych ZŠA, jakija vyvučali virusy, zdolnyja pieradavacca praz kamaroŭ. Taksama jon kazaŭ ab płanach ZŠA dastaŭlać kamaroŭ z dapamohaj bieśpiłotnikaŭ, kab zaražać vajskoŭcaŭ praciŭnika. Jon ža tłumačyŭ rost zachvorvańnia ptušynym hrypam u Rasii mihracyjaj zaražanych ptušak z Ukrainy.
Siońnia ŭ Kiryłava pavinien byŭ być čarhovy bryfinh Minabarony, piša kanał 112.
Ciapier čytajuć
U Čechii małady biełarus trapiŭ u komu — nahłytaŭsia tabletak praz prablemy ź lehalizacyjaj i razryŭ ź dziaŭčynaj12
Kamientary