Jadziernyja mižkantynientalnyja balistyčnyja rakiety robiacca nieprydatnymi našmat chutčej, čym ličyłasia raniej

Kitajskija inžyniery-kanstruktary pa rakietabudavańni vyjavili surjoznuju prablemu ŭ ćviordym palivie, jakoje vykarystoŭvajecca ŭ mižkantynientalnych balistyčnych rakietach. Heta adkryćcio moža dać tłumačeńnie častym niaŭdačam pry vyprabavalnych zapuskach takich rakiet u apošnija hady pa ŭsim śviecie, paviedamlaje vydańnie South China Morning Post.

«Tradycyjna ličycca, što pry zvyčajnych umovach zachoŭvańnia ćviordaje paliva dla MBR moža zastavacca stabilnym da 160 hadoŭ. Adnak vyprabavańni ŭ Nacyjanalnaj łabaratoryi ćvierdapaliŭnych ruchavikoŭ u Siani pakazali, što ŭžo praz 30 hadoŭ zachoŭvańnia ŭ palivie pačynajuć adbyvacca niekantralavanyja pracesy ŭnutranaj dehradacyi, ad jakich ruchaviki rakiet padčas palotu mohuć razburacca», — adznačajecca ŭ novym kitajskim daśledavańni.

Kab vyśvietlić heta, navukoŭcy ceły hod vypraboŭvali vysokimi tempieraturami asnoŭnyja kampanienty ćviordaha paliva dla MBR — pierchłarat amoniju, aluminijevuju pudru i HTPB-źviazvalnik. Usie jany ŭ vyniku prademanstravali paskoranaje stareńnie, jakoje adbivałasia na jakaści paliva.

U listapadzie 2023 hoda rakieta Minuteman III vytvorčaści amierykanskaj kampanii Boeing sutyknułasia z prablemami padčas palotu, što pryviało da jaje samaźniščeńnia. Za dva miesiacy anałahičnaja situacyja zdaryłasia z rakietaj Trident II, zapuščanaj z padvodnaj łodki brytanskaha karaleŭskaha fłotu.

A niadaŭniaje vosieńskaje vyprabavańnie rasijskaj sučasnaj MBR «Sarmat», jakoj Kreml časta pałochaje zachodnija krainy, skončyłasia poŭnym pravałam — rakieta vybuchnuła prosta ŭ šachcie i źniščyła palihon. Varta adznačyć, što «Sarmat» pracuje na vadkim palivie, jakoje ličycca jašče bolš niestabilnym, čym ćviordaje.

Zamianić staroje paliva ŭ rakietach na novaje — zadača vielmi składanaja i darahaja. Ćviordaje paliva źjaŭlajecca nieadjemnaj častkaj ruchavika, tamu dla vymańnia staroha paliva spatrebicca całkam demantavać sam ruchavik rakiety, što moža paškodzić jaje kanstrukcyju. 

Praces zamieny paliva taksama patrabuje śpiecyjalnaha abstalavańnia, vysokakvalifikavanych śpiecyjalistaŭ i moža zajmać šmat času, što budzie ŭpłyvać na bajazdolnaść i hatoŭnaść jadziernych sił krainy. Akramia taho, utylizacyja staroha paliva i vytvorčaść novaha źviazany z ekałahičnymi nastupstvami, uklučajučy vykidy taksičnych rečyvaŭ, i patrabujuć strohaha kantrolu dla praduchileńnia mahčymych incydentaŭ ź biaśpiekaj abo kradziažu.

Pa stanie na pačatak 2024 hoda Rasija mieła na ŭzbrajeńni 521 mižkantynientalnuju balistyčnuju rakietu naziemnaha i marskoha bazavańnia. Ab hetym paviedamiła vydańnie Defence Express sa spasyłkaj na niekalki aŭtarytetnych krynic.

Jak adznačajecca, rakietnyja vojski stratehičnaha pryznačeńnia Rasii na pačatak hoda mieli ŭ svaim rasparadžeńni.

• 34 MBR typu RS-20 «Vajavoda» (razhortvańnie startavała jašče ŭ 1988 hodzie).
• 60 MBR typu RS-12M «Topal-M» (razhortvańnie startavała ŭ 1997 hodzie).
• 18 MBR RS-12M1 «Topal-M» (razhortvańnie startavała ŭ 2006 hodzie).
• 180 MBR RS-24 «Jars» u šachtavym varyjancie (razhortvańnie startavała ŭ 2010 hodzie).
• 24 MBR RS-24 «Jars» u mabilnym varyjancie (z 2014 hoda).
• Kala 8 MBR «Avanhard» (z 2019 hoda).
• Kolkaść MBR «Sarmat» u rasparadžeńni Rasii — nieviadomaja.

• 30
• 1
• 21
• 6
• 2
• 8
• 0
• 0