Iranski pradprymalnik vykanaŭ «Kupalinku» na staražytnym iranskim barabanie
Unikalny duet muzyčnych instrumientaŭ źjaviŭsia dziakujučy irancu Džamšydu Ebrachimchani, jaki čatyry hady tamu pryjechaŭ u nieviadomuju jamu Biełaruś, piša kraj.by.
Džamšyd kiruje iranskim zavodam paraškovych farbaŭ «Bieł Peka Pejnt», jaki znachodzicca ŭ vioscy Iźbina Vilejskaha rajona. Akramia prafiesijnych jakaściaŭ kiraŭnika, Džamšyd vielmi lubić muzyku i sam ihraje na tambaku — barabanie, stvoranym jašče ŭ staražytnym Iranie bolš za piać tysiačahodździaŭ tamu.
Znajomiačysia ź biełaruskaj nacyjanalnaj kulturaj i muzykaj, iraniec zachapiŭsia pieśniaj «Kupalinka». Džamšyd zahareŭsia idejaj zapisać hetaje tvory ŭ supravadžeńni biełaruskich cymbałaŭ i iranskaha tambaka.
Biełaruska-iranskaja «Kupalinka» ŭžo stvoranaja. Pra heta partału Kraj.by raspaviała mietadyst Maładziečanskaha rajonnaha centra kultury Nadzieja Kanapackaja, jakaja ŭsiebakova dapamahała ŭ stvareńni ŭnikalnaj kampazicyi. U piatnicu, 20 śniežnia, Nadzieja zaprasiła Džamšyda Ebrachimchani ŭ centr kultury na Libava-Romienskaj vulicy.
Džamšyd sa svajoj žonkaj Niki žyvuć u Maładziečnie. Siamja zdymaje kvateru. U Biełaruś Džamšyd pryjechaŭ z rodnaha Tehierana.
Što tyčycca muzyki, Džamšyd tłumačyć:
— U Tehieranie 25 hadoŭ tamu maja mama adpraviła mianie ŭ muzyčnuju škołu. Z 16 hadoŭ ja vučyŭsia hrać na tambaku. Heta ŭdarny instrumient, jaki vykarystoŭvajecca ŭ ansamblach, ale na im možna ihrać i solna.
— Ja pryjechaŭ u krainu, pra jakuju ničoha nie viedaŭ, dumaŭ, što heta Biełaja Rasija, — uspaminaje Džamšyd. — Ale ŭbačyŭ, što Biełaruś — heta niezaležnaja kraina z haścinnymi ludźmi. Vaša «Kupalinka» mianie začaravała.
Iraniec pierakłaŭ tekst pieśni na farsi z dapamohaj anłajn-pierakładčyka i ciapier razumieje, pra što ŭ joj havorycca.
Padrychtoŭka da zapisu była surjoznaj. Partyju cymbałaŭ vykanała vučanica Maładziečanskaha muzyčnaha kaledža imia M. K. Ahinskaha Evielina Łamiejka.
Džamšyd raspaviadaje, što za čatyry hady žyćcia ŭ Maładziečnie, jak čałaviek, jaki abažaje muzyku i zachaplajecca tvorčaściu Šastakoviča, jon naviedvaŭ roznyja maładziečanskija muzyčnyja forumy i fiestyvali. Ale pieśniu «Kupalinka», jakaja kranuła jaho da hłybini dušy, jon pačuŭ upieršyniu ŭ kampanii svaich biełaruskich siabroŭ. Kala siami miesiacaŭ tamu jaje na siabroŭskaj sustrečy vykanała žonka adnaho ź jaho tavaryšaŭ.
— Ja zrazumieŭ, što zakachaŭsia ŭ «Kupalinku» ź pieršych not, — pryznajecca Džamšyd. — Matyŭ hetaj pieśni vielmi padobny na iranskija nacyjanalnyja miełodyi. I ja vyrašyŭ sam zapisać hetuju pieśniu ź biełaruskimi vykanaŭcami, kab pakinuć u Biełarusi pamiać pra siabie i zachavać dla siabie pamiać pra Biełaruś.
Padrychtoŭka da zapisu pačałasia adrazu. Nieabchodna było znajści cymbalistku i vakalistku. Partyju tambaka Džamšyd, naturalna, vyrašyŭ vykonvać sam.
— Biełarusy i irancy zasłuhoŭvajuć tolki najlepšaha. Ja bačyŭ u internecie šmat varyjantaŭ vykanańnia «Kupalinki», ale dumaju i spadziajusia, što naš sumiesny prajekt stanie najlepšaj viersijaj u śviecie, — kaža Džamšyd Ebrachimchani.
Anton, jaki dapamahaje Džamšydu ŭ realizacyi jaho tvorčaj idei, dadaje:
— Džamšyd nastolki patrabavalna i surjozna stavicca da hetaha, što, kali ja pačynaju śpiavać «Kupalinku» sa svaim nie samym idealnym słycham, jon adrazu mianie spyniaje. Kaža: «Pamaŭčy, kali łaska. Hetuju pieśniu treba vykonvać abo vielmi dobra, abo nie vykonvać uvohule», — śmiajecca Anton.
Kamientary