Recydyvist, jaki skraŭ unitaz u susieda. Raskazvajem, chto toj najmit ź Biełarusi, jakoha ŭziali ŭ pałon va Ukrainie
Artur Jafremaŭ maje bolš za dziasiatak administratyvak za pjanki i debošy. Na adnym miescy pracy jon taksama nikoli doŭha nie pracavaŭ. A ciapier apynuŭsia va ŭkrainskim pałonie.
Arturu Jafremavu 37 hadoŭ. Jon rodam z pasiołka Šarejki Kaściukovickaha rajona. Viadoma taksama, što jon maje jak minimum adno dzicia, ale ź jahonaj maci nie žyvie.
Vyšejšaj adukacyi nie maje, a značnuju častku žyćcia pravioŭ na šabaškach u Rasii. Na adnoj pracy Jafremaŭ doŭha nikoli nie zatrymlivaŭsia. Pracavaŭ, miarkujučy pa bazach, tam, dzie jaho brali — to raznarabočym, to miechanikam, to burylščykam.
Pa źviestkach Digital intelligence team, pieršuju kryminałku Jafremaŭ zajmieŭ u 17 hadoŭ. U vieraśni 2005 hoda jon napadpitku zalez u chleŭ u rodnaj vioscy i skraŭ kanistru z 20 litrami bienzinu. Nastupnym letam jon ździejśniŭ jašče adzin «podźvih» — skraŭ mietaličnyja truby ŭ svajoj ža vioscy.
Ahułam u Jafremava čatyry sudzimaści ŭ Biełarusi. Usie za kradziež. Samaje niahiehłaje jaho złačynstva — u lutym 2010 hoda jon razam ź siabram skraŭ u susieda ŭnitaz sa źliŭnym bačkom. Praz heta jaho abjavili ŭ vyšuk u Rasii, dzie i zatrymali. Apošni raz jaho sudzili ŭ 2019-m — Artur skraŭ telefon u svajoj ułasnaj dziaŭčyny, za što jaho znoŭ-taki abjavili ŭ vyšuk.
Taksama Artur maje 13 pravaparušeńniaŭ — i ŭsie za pjanku. Adnojčy jon pabiŭ svaju dziaŭčynu, u 2013 jaho chacieli vysielić z chaty praz antysanitarny stan budynku, a niekalki razoŭ jon pjany sprabavaŭ kiravać mašynaj.
Urešcie Jafremaŭ apynuŭsia na froncie — pajšoŭ vajavać za Rasiju.
«Mianty mianie pryniali, davaj presavać. Padpisvaj, typu, kantrakt na vajnu. Ja pieršy raz, druhi raz admoviŭsia, treci. Potym ja znoŭ napiŭsia i mianie presavali, znoŭ uziali. I ja pjany ŭziaŭ i padpisaŭ. A potym, kali praćvierazieŭ, užo pozna było, ja ŭžo byŭ u Varoniežy. Mianie tudy zavieźli pjanaha», — zajaviŭ Jafremaŭ ukrainskim vajskoŭcam.
«Naša Niva» — bastyjon biełaruščyny
PADTRYMAĆ
Kamientary