Łukašenka nazvaŭ łaŭreataŭ premii «Za duchoŭnaje adradžeńnie». Siarod ich centr Rumo i BRSM

Alaksandr Łukašenka prysudziŭ premii «Za duchoŭnaje adradžeńnie» i śpiecyjalnyja premii dziejačam kultury i mastactva. Adpaviednyja ŭkazy jon padpisaŭ 31 śniežnia, paviedamlaje BIEŁTA.

Premijaj «Za duchoŭnaje adradžeńnie» ŭhanaravany kalektyŭ Minskaha navukova-praktyčnaha centra chirurhii, transpłantałohii i hiematałohii za vydatnyja dasiahnieńni ŭ palapšeńni jakaści miedycynskaj dapamohi, raźvićcio navuki i papularyzacyju idej dabračynnaści i miłasernaści. Uznačalvaje hety RNPC Aleh Rumo — člen Savieta Respubliki i davieranaja asoba Łukašenki na vybarach 2025 hoda. Jon byŭ davieranaj asobaj i padčas sfalšavanych vybaraŭ 2020 hoda.

Premiju taksama atrymaŭ kalektyŭ Biełaruskaha dziaržaŭnaha ŭniviersiteta kultury i mastactvaŭ — za aktyŭnuju dziejnaść u patryjatyčnym vychavańni moładzi i realizacyju prajekta «Linija pamiaci. Kod vajny».

Protaijerej Aleh Kuncevič, nastajaciel prychoda chrama Uźvižańnia Kryža Haspodniaha ŭ Minsku, udastojeny vysokaj uznaharody za vialiki asabisty ŭkład u spravu duchoŭnaha aśvietnictva i patryjatyčnaje vychavańnie, uviekaviečvańnie pamiaci ab zahinułych u fašysckim łahiery śmierci dla savieckich vajennapałonnych «Štałah 352».

Za dasiahnieńni ŭ halinie kultury prysudžany vosiem śpiecyjalnych premij dziejačam kultury i mastactva.

Uznaharoda znajšła kalektyvy:

Moładzievaha teatra estrady — za značnyja dasiahnieńni ŭ halinie muzyčnaha mastactva, aktyŭny ŭdzieł u hramadska-kulturnym žyćci krainy;

Homielskaha dziciačaha sacyjalnaha pansijanata «Ščaślivyja ŭśmieški» — za raźvićcio tvorčaha patencyjału dziaciej i maładych ludziej ź invalidnaściu, intehracyju inkluziŭnaha mastactva ŭ kulturnuju prastoru krainy;

Minskaha dziaržaŭnaha kaledža mastactvaŭ — za plonnuju rabotu ŭ halinie navučańnia i vychavańnia tvorčaj moładzi, aktyŭnuju hramadska-patryjatyčnuju dziejnaść;

Minskaha dziaržaŭnaha pałaca dziaciej i moładzi — za značnyja dasiahnieńni ŭ patryjatyčnym vychavańni padrastajučaha pakaleńnia, arhanizacyju raboty Posta №1 horada-hieroja Minska pa niasieńni Hanarovaj vachty pamiaci.

Za ŭniosak u rekanstrukcyju miemaryjalnaha kompleksu ŭ pamiać ab viaźniach Azaryckaha łahiera śmierci ŭ Kalinkavickim rajonie Homielskaj vobłaści śpiecyjalnaj premijaj adznačany aŭtarski kalektyŭ u składzie načalnika biuro hałoŭnych inžynieraŭ prajekta AAT pa kompleksnym prajektavańni abjektaŭ žyllova-sielskahaspadarčaha pryznačeńnia «Instytut Homielhramadzianprajekt» Volhi Ačapoŭskaj, zahadčycy navukova-aśvietnickaha adździeła Homielskaha abłasnoha muzieja voinskaj słavy Viktoryi Zajac i zahadčycy filii «Miemaryjalny kompleks viaźniam Azaryckaha łahiera śmierci» Kalinkavickaha krajaznaŭčaha muzieja Zinaidy Chlebaviec.

Za realizacyju mižnarodnaha maładziožnaha patryjatyčnaha prajekta «Darohami pamiaci i słavy» ŭznaharodu zdabyli Mahiloŭskaja abłasnaja arhanizacyja BRSM, teleradyjokampanija «Mahiloŭ» i Mahiloŭski abłasny krajaznaŭčy muziej imia Ja.R. Ramanava.

Śpiecyjalnyja premii taksama prysudžany zahadčycy adździeła tradycyjnaj kultury Viciebskaha abłasnoha mietadyčnaha centra narodnaj tvorčaści Taćcianie Łapkovaj — za asabisty ŭniosak u zachavańnie i papularyzacyju technałohii aplatańnia biarostaj hančarnaj posudy i majstrycy narodnych mastackich ramiostvaŭ Hrodnienskaha rajonnaha kulturna-infarmacyjnaha centra Irynie Šavielskaj — za značny ŭniosak u zachavańnie i papularyzacyju tradycyjnych ramiostvaŭ, adradžeńnie narodnych technałohij placieńnia sałomy.

• 1
• 4
• 0
• 2
• 0
• 0
• 0
• 0