Bieły dom abjaviŭ pra ŭviadzieńnie samych maštabnych sankcyj suprać rasijskaha enierhietyčnaha siektara
Sankcyi ŭviedzienyja za 10 dzion da zakančeńnia prezidenckich paŭnamoctvaŭ Džo Bajdena. Pad ich trapili dziasiatki naftatrejdaraŭ, pastaŭščykoŭ naftaservisnych pasłuh i čynoŭnikaŭ enierhietyčnaha siektara, adznačajecca ŭ paviedamleńni Ministerstva finansaŭ ZŠA. Taksama ZŠA ŭviali abmiežavalnyja zachady suprać bolš za 180 tankieraŭ u tym liku z «cieniavoha fłotu».
Pad sankcyi ZŠA trapili «Hazpram nafta» i «Surhutnaftahaz», a taksama bolš za dva dziasiatki ich daččynych kampanij, vynikaje z paviedamleńnia na sajcie amierykanskaha Minfina. Abmiežavańni suprać ich uviała i Vialikabrytanija.
U śpis taksama ŭniesienyja naftapierapracoŭčyja zavody (NPZ) «Hazpram nafty» (Maskoŭski, Omski), zdabyŭčyja pradpryjemstvy — «Hazpramnafta-Najabrsknaftahaz», «Hazpramnafta-Arenburh» i inš., jaje zamiežnyja struktury — u Tadžykistanie, Kazachstanie, Kyrhyzstanie i Sierbii (NIS), a taksama Gazprom Neft International, zarehistravanaja ŭ Luksiemburhu, «Hazpram nafta šelf» i «Hazprom nafta aera» i h. d.
Uviedzienyja abmiežavańni i suprać struktur «Surhutnaftahaza» — jaho banka, «Kalininhradnaftapradukta», NPZ «Kiryšynaftaarhsintez» («Kinief») i inš.
Pad sankcyi taksama trapiła struktura «Rasnafty» — «Rasnaftafłot».
Abmiežavańni zakranuli jašče niekalki kampanij — apierataraŭ marskich sudnaŭ. Uviedzienyja sankcyi i suprać 183 karabloŭ, jakija «źjaŭlajucca častkaj cieniavoha fłotu» abo naležać rasijskim kampanijam. Heta sudny pad ściahami Rasii, Panamy, Barbadasa, Habona. Siarod ich nie tolki naftavyja tankiery, ale i pasažyrskija karabli, sudny zabieśpiačeńnia i inš.
Taksama ŭviedzienyja sankcyi suprać «Inhosstracha» i «Alfastrachavańnia», jakija zajmajucca strachavańniem marskich pieravozak.
Siarod pradpryjemstvaŭ ź inšych halin, jakija trapili pad sankcyi, — vuhalny Dzianisaŭski hornaŭzbanhačalny kambinat u Jakucii, «Kuzbasrazrezvuhal», Liskinski zavod mantažnych zahatovak i inš.
U administracyi Bajdena zajavili, što raźličvajuć na toje, što novyja abmiežavańni buduć kaštavać Rasii «miljardy dalaraŭ štomiesiac» i, jak nastupstva, udarać pa kursie rubla dy navat pryviaduć da dalejšaha pavyšeńnia klučavoj staŭki Centrabanka.
Pry hetym ZŠA vykazvajuć rašučaść praciahvać zmahacca z abychodam sankcyj suprać Rasii. Ciapier pad ich moža trapić lubaja asoba za fakt pracy z rasijskim paliŭna-enierhietyčnym kompleksam.
Padkreślivajecca, što maštabnyja sankcyi suprać enierhasiektara Rasii nie niasuć pahrozy hłabalnamu rynku nafty. Ryzyki deficytu prapanovy niama, i naohuł u ZŠA raście zdabyča nafty, a na ŭnutranym rynku jość jaje liški.
Ukraina nie budzie prypyniać tranzit nafty pa naftapravodzie «Družba»
Rasija straciła tranzit hazu praz Ukrainu ŭ Jeŭropu. Chto prajhraŭ i što budzie dalej?
Bajden źbirajecca na raźvitańnie ŭvieści pakiet sankcyj suprać «cieniavoha fłotu» Rasii
Što praduhledžvaje mirny płan budučaha śpiecpradstaŭnika Trampa pa Ukrainie
Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»9
Kamientary