Śledčyja Ukrainy padazrajuć supracoŭnikaŭ MUS u zabojstvie biełarusa Žyźnieŭskaha, jakoje adbyłosia 11 hadoŭ tamu
Biełarusa Michasia Žyźnieŭskaha zabili 22 studzienia 2014 hoda padčas Jeŭramajdanu ŭ Kijevie. Paźniej jaho pryznali Hierojem Ukrainy, a ŭ 2017 hodzie tahačasny prezident Piatro Parašenka pieradaŭ Zorku Hieroja baćkam. Zabojca dahetul nie znojdzieny, piša Radyjo Svaboda.
Śledčyja Dziaržaŭnaha biuro rasśledavańniaŭ (DBR) Ukrainy praciahvajuć rasśledavańnie hibieli pieršych achviar padčas supraćstajańnia pamiž milicyjaj i pratestoŭcami ŭ studzieni 2014 hoda, kali ŭ Kijevie prachodzili masavyja akcyi pratestu.
Siarod pieršych achviar, jakija zahinuli 22 studzienia 2014 hoda, — biełarus Michaś Žyźnieŭski i hramadzianie Ukrainy Siarhiej Nihajan i Raman Sienik.
«Śledstva praciahvaje praviarać supracoŭnikaŭ MUS, jakija nieśli słužbu ŭ dzień zabojstvaŭ. Taksama jašče praciahvajucca sudovyja ekśpiertyzy i adpracoŭka śviedak», — paviedamiła dziaržaŭnamu ahienctvu «Ukrinform» prakuror Ludmiła Haŭryš, jakaja ažyćciaŭlaje pracesualnaje kiraŭnictva ŭ spravach Majdana.
Śledčaja DBR Volha Paŭluk adznačyła, što rasśledavańnie pieršych zabojstvaŭ na Majdanie ŭskładniajecca praz adsutnaść jakasnych videazapisaŭ momantu złačynstvaŭ, a taksama niepasrednych śviedak.
«My pastajanna praviarajem pracaŭnikoŭ pravaachoŭnych orhanaŭ, jakija znachodzilisia ŭ miescach, dzie byli ŭčynieny zabojstvy, u tym liku tych, chto mieŭ ahniastrelnuju zbroju — hładkastvolnyja pompavyja strelby madeli «Fort-500»», — skazała Volha Paŭluk.
Pavodle jaje słoŭ, ciapier pravodziacca dopyty asob, jakija mohuć mieć važnuju dla śledstva infarmacyju, i praciahvajucca śledčyja dziejańni ź ich udziełam.
«Ekśpiertnyja ŭstanovy pravodziać miedyka-kryminalistyčnyja i kompleksnyja sudova-miedycynskija ekśpiertyzy, u tym liku ekśpiertyzy pa identyfikacyi zbroi, jakija mahli b paćvierdzić datyčnaść niepasrednych vykanaŭcaŭ da zabojstvaŭ Nihajana, Sienika i Žyźnieŭskaha», — dadała śledčaja DBR.
Volha Paŭluk padkreśliła, što praciahvajucca pošuki novych abstavin pieršych zabojstvaŭ na Majdanie, jakija patrabujuć dadatkovaj pravierki.
Raniej było paviedamlena ab padazreńni arhanizataram hetych złačynstvaŭ — byłomu prezidentu Viktaru Janukoviču, eks-ministru ŭnutranych spraŭ Vitaliju Zacharčanku i jaho namieśniku, a taksama kiraŭnikam Hałoŭnaha ŭpraŭleńnia MUS u Kijevie.
Biełarusa Michasia Žyźnieŭskaha zabili 22 studzienia 2014 hoda padčas Jeŭramajdanu ŭ Kijevie. Paźniej jaho pryznali Hierojem Ukrainy, a ŭ 2017 hodzie tahačasny prezident Piatro Parašenka pieradaŭ Zorku Hieroja baćkam. Zabojca dahetul nie znojdzieny.
Ciapier čytajuć
U 2021 hodzie vypusknica admoviłasia pacisnuć ruku Hihinu na ŭručeńni dypłoma. Ciapier BDU nie choča jaho paćviardžać33
Kamientary