Dziaržsakratar Rubia: ZŠA praciahnuć akazvać dapamohu inšym krainam, adnak sistema patrabuje rearhanizacyi
Marka Rubia zajaviŭ, što ZŠA praciahnuć akazvać zamiežnuju dapamohu, bo pravilna arhanizavanaja dapamoha prynosić karyść krainie.
Złučanyja Štaty nie admaŭlajucca ad akazańnia dapamohi zamiežnym dziaržavam, adnak struktura i praces hetaj dapamohi pavinny być rearhanizavanyja z ulikam nacyjanalnych intaresaŭ ZŠA. Pra heta dziaržaŭny sakratar Marka Rubia zajaviŭ u paniadziełak u intervju viadučamu padkasta Patriot na SiriusXM Skotu Dženinhsu, paviedamlaje «Hołas Amieryki».
Adkazvajučy na pytańnie ab surjoznych źmienach u pracy Ahienctva ZŠA pa mižnarodnym raźvićci (USAID), inicyjavanych administracyjaj Donalda Trampa, i ab mahčymaści poŭnaha spynieńnia zamiežnaj dapamohi, Rubia skazaŭ:
«Pa-pieršaje, my nie admaŭlajemsia ad zamiežnaj dapamohi. My budziem praciahvać akazvać dapamohu, tamu što ja liču, što pravilna arhanizavanaja dapamoha prynosić karyść krainie. Ale jana pavinna być arhanizavanaja pravilna. Ciapier ujaŭleńnie pra toje, što my pavinny vydatkoŭvać ad 40 da 60 miljardaŭ dołaraŭ na zamiežnuju dapamohu i što ŭsie hetyja hrošy vykarystoŭvajucca razumna, absurdna. Častka hetych srodkaŭ tracicca nieefiektyŭna.
Naša zadača prostaja: pierahledzieć usiu našu zamiežnuju dapamohu — značnaja častka prachodzić praz USAID, častka praź Dziarždepartamient — vyznačyć prajekty, jakija sapraŭdy padtrymlivajuć našy nacyjanalnyja intaresy, i praciahvać ich finansavańnie, a taksama pazbavicca ad tych, jakija źjaŭlajucca pustoj trataj hrošaj abo navat supiarečać našym intaresam u śviecie».
«Ciapier my prypynili ŭsiu zamiežnuju dapamohu i analizujem jaje prajekt za prajektam. Tyja, jakija nie majuć sensu, buduć vyklučanyja, a tyja, jakija prynosiać karyść, buduć zachavanyja ci navat uzmocnienyja», — dadaŭ dziaržsakratar.
Kamientujučy svaju niadaŭniuju pajezdku ŭ krainy Centralnaj Amieryki — Rubia naviedaŭ Panamu, Salvador, Kosta-Ryku, Hvatemału i Daminikanskuju Respubliku — dziaržsakratar adznačyŭ «vielmi pazityŭnaje» staŭleńnie ŭład hetych krain da ZŠA.
«Hetyja krainy chočuć supracoŭničać z Złučanymi Štatami. Akramia taho, jany znachodziacca na maršrutach nielehalnaj mihracyi i narkatrafiku i sutykajucca ź vielizarnymi prablemami praz heta», — skazaŭ Rubia.
Z 14 pa 16 lutaha dziaržsakratar budzie ŭdzielničać u pracy Miunchienskaj kanfierencyi pa biaśpiecy, jakaja adbudziecca ŭ Hiermanii.
«U Miunchienie hałoŭnaja meta — paćvierdzić našu pazicyju. Choć kanfierencyja prachodzić u Jeŭropie, jana tyčycca nie tolki Jeŭropy. Tam źbirajucca lidary z usiaho śvietu. Ale, biezumoŭna, hałoŭnym pytańniem dla ŭsich budzie vajna va Ukrainie. Prezident Tramp jasna daŭ zrazumieć, što hetaja vajna pavinna skončycca. Jon pačynaje vybudoŭvać šyroki płan dla realizacyi hetaj idei, tamu što spynieńnie kanfliktu adpaviadaje intaresam usich bakoŭ. Vidavočna, my budziem abmiarkoŭvać hetaje pytańnie ź ministrami zamiežnych spraŭ i inšymi suśvietnymi lidarami», — skazaŭ Rubia.
Paśla hetaha dziaržsakratar naviedaje niekalki krain Blizkaha Uschodu, uklučajučy Izrail, AAE, Katar i Saudaŭskuju Araviju.
«Akramia nastupstvaŭ padziej 7 kastryčnika, ciapier jość patencyjna cikavyja mahčymaści dla źmieny rehijanalnaj dynamiki, i my chočam heta vyvučyć. U Livanie sfarmiravany novy ŭrad, i «Chiezbała»… Ujavicie sabie rehijon, dzie stabilny ŭrad Livana kantraluje poŭdzień krainy, a «Chiezbała» bolš nie pahražaje Izrailu štodzionna», — skazaŭ Rubia.
«Ujavicie sabie patencyjnuju situacyju — nam jašče treba heta ŭbačyć, ale ŭsio mahčyma — pry jakoj Siryja bolš nie znachodzicca pad uładaj Asada, nie zaležyć ad Irana i Rasii, nie padviarhajecca ŭpłyvu IDIŁ i nie ŭjaŭlaje pahrozu biaśpiecy Izraila».
«Ujavicie sabie rehijon, u jakim Izrail adčuvaje siabie ŭ biaśpiecy dziakujučy źmienam u Livanie i Siryi i hatovy zaklučyć mirnaje pahadnieńnie z Saudaŭskaj Aravijaj i inšymi krainami Piersidskaha zaliva — niešta nakštałt Kemp-Devidskich pahadnieńniaŭ ź Jehiptam abo mirnaha dahavora ź Iardanijaj. U takim vypadku rehijon stanovicca zusim inšym, i mahčymaści, jakija raniej zdavalisia niemahčymymi, stanoviacca realnymi», — dadaŭ Rubia.
«Heta toj šaniec, jaki my pavinny vyvučyć. U nas jość abaviazak pasprabavać heta zrabić. Prezident Tramp jasna daŭ zrazumieć, što adnoj ź jaho metaŭ źjaŭlajecca sadziejničańnie miru va ŭsim śviecie. Kali ŭ nas jość šaniec stvaryć umovy dla miru, my pavinny zrabić usio mahčymaje, kab hetamu sadziejničać».
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary