Raźviedka ZŠA nie bačyć u Pucina zacikaŭlenaści ŭ realnym mirnym pahadnieńni pa Ukrainie

Pucin spadziajecca dačakacca momantu, kali zmoža ŭziać pad kantrol usiu terytoryju Ukrainy, paviedamili krynicy NBC.

«Jon dumaje, što pieramahaje», — skazaŭ adzin z pradstaŭnikoŭ zachodniaj raźviedki, dadaŭšy, što straty Rasii na poli boju nie prymušajuć Pucina spynić vajnu.

Čynoŭniki ŭ ZŠA i inšych zachodnich krainach skieptyčna nastrojenyja da taho, što Pucin moh by pajści na kampramis i pahadzicca na realnuju, tryvałuju mirnuju damovu, skazali krynicy. Adnak na Zachadzie jość mierkavańnie, što rasijski prezident moh by pravieści pieramovy, kab pahladzieć, jakija sastupki jon moh by atrymać. Taksama jon moh by pasprabavać intehravacca nazad u mižnarodnuju supolnaść, ličać surazmoŭcy NBC.

Rasijski prezident nie maje namieru vyvodzić vojski z terytoryi Ukrainy ci advodzić z zachodniaj častki Rasii, skazali NBC krynicy ź liku pradstaŭnikoŭ vyviedki.

Bolš za toje, Pucin staŭ bolš upeŭnienym paśla niadaŭnich kamientaroŭ pradstaŭnikoŭ administracyi ZŠA, ź jakich vynikaje, što Vašynhton nie razhladaje siabroŭstva Ukrainy ŭ NATA jak realny vynik pieramoŭ, patłumačyli krynicy. «Jahonyja mety zastajucca maksimalisckimi», — dadaŭ adzin z pradstaŭnikoŭ raźviedki.

Pucin, adnak, moh by pahadzicca na časovaje spynieńnie ahniu i na bolš šyrokaje mirnaje pahadnieńnie, tamu što heta dało b rasijskaj armii čas na adnaŭleńnie, skazali surazmoŭcy žurnalistaŭ.

Pres-sakratar Rady nacyjanalnaj biaśpieki Biełaha doma Brajan Chjuz u adkaz na prośbu prakamientavać situacyju zajaviŭ:

«Kiraŭnictva prezidenta Trampa stvaryła pieršuju mahčymaść dla pieramoŭ za mnohija hady, i jon zrabiŭ heta ŭsiaho praz čatyry tydni paśla zastupleńnia na pasadu. Administracyja Trampa praciahnie damahacca pahadnieńnia, jakoje budzie prasoŭvać amierykanskija intaresy i pryviadzie hety kanflikt da kančatkovaha ŭrehulavańnia».

U razmovie z žurnalistami 17 lutaha prezident ZŠA Donald Tramp zajaviŭ:

«Ja dumaju, jon [Pucin] choča pierastać zmahacca». Na pytańnie, ci dumaje jon, što rasijski prezident choča zachapić usiu Ukrainu, Tramp adkazaŭ: «Nie, ja dumaju, jon choča spynić», paviedamlaje NBC News.

18 lutaha prajšła pieršaja sustreča delehacyj Rasii i ZŠA ŭ Er-Ryjadzie. Sustreča praciahvałasia kala čatyroch hadzin. Pa słovach pamočnika prezidenta Rasii Juryja Ušakova, udzielniki damovilisia ab padrychtoŭcy sustrečy Pucina i Trampa, raźvićci dvuchbakovych adnosin, ahučyli svaje «pryncypovyja padychody pa Ukrainie» i damovilisia «ŭličvać intaresy adzin adnaho». Ušakoŭ dadaŭ, što samit z udziełam Trampa i Pucina naŭrad ci adbudziecca na nastupnym tydni.

• 3
• 1
• 0
• 14
• 1
• 0
• 6
• 0