«Tramp, jak i Pucin, chacieŭ by pieradziełu miežaŭ». A amierykanskija kansiervatary idealizujuć režym Pucina jak levyja ŭ svoj čas — Stalina

Jak zaŭvažajuć aŭtary artykuła ŭ The Wall Street Journal, svaimi niadaŭnimi zajavami i dziejańniami Tramp umacavaŭ pieramoŭnuju pazicyju Pucina, ale zbližeńnie pamiž imi farmiravałasia na praciahu doŭhich hadoŭ.

Jany nahadvajuć, što Tramp jašče ŭ 1987 hodzie naviedaŭ SSSR z metaj pačać tam biznes. Pa słovach daśviedčanaj asoby, na nastupny hod jon sprabavaŭ sustrecca z Harbačovym u Ńju-Jorku padčas Hienieralnaj Asamblei AAN.

Choć sustreča nie adbyłasia, Tramp zdoleŭ naładzić suviazi z rasijskimi biźniesmienami, jakija razbahacieli paśla raspadu SSSR, naprykład, pradaŭšy asabniak u Pałm-Bič za $95 miljonaŭ rasijskamu aliharchu Dźmitryju Rybałoŭlevu.

Tramp daŭno maje cikavaść da Rasii – i ŭ biznesie, i ŭ palitycy. Simpatyi da Pucina vynikajuć ź jaho daŭniaha zachapleńnia «mocnymi» lidarami i hrebavańnie demakratyčnymi instytutami. Ciapier, kali Tramp znoŭ staŭ klučavoj fihuraj u amierykanskaj palitycy, jaho prarasijskija simpatyi vychodziać na novy ŭzrovień. Razam ź im i značnaja častka respublikanskaha elektaratu bačyć u Rasii abaroncu tradycyjnych chryścijanskich kaštoŭnaściaŭ i praciŭnika «woke mind virus» («virusu abudžanaha rozumu»).

Aŭtary artykuła adznačajuć, što rytoryka abarony tradycyjnych kaštoŭnaściaŭ aktyŭna padtrymlivajecca rasijskaj prapahandaj. Pucin zapuściŭ prahramu imihracyi dla amierykancaŭ, jakija ŭciakajuć ad «pieraśledu tradycyjnych kaštoŭnaściaŭ» na Zachadzie. Vajna suprać Ukrainy padajecca jak «maralny kryžovy pachod» suprać zachodniaj prahresiŭnaj ideałohii.

«Pryciahalnaść naratyvu pra Rasiju jak utopiju kansiervatyŭnych kaštoŭnaściaŭ u kołach MAGA (Make America Great Again — «Znoŭ zrobim Amieryku vialikaj») nahadvaje pamyłkovaje zachapleńnie, jakoje amierykanskija i jeŭrapiejskija libierały mieli da złačynnaha režymu Iosifa Stalina ŭ Savieckim Sajuzie stahodździe tamu», — cytuje vydańnie słovy prafiesara Škoły dziaržaŭnaj palityki imia Charysa Čykahskaha ŭniviersiteta Kanstancina Sonina.

Prafiesar źviartaje ŭvahu na toj fakt, što hety pohlad zručna ihnaruje realnaść Rasii: režym, jaki zabivaje palityčnych apanientaŭ unutry krainy, sadžaje ŭ turmu hramadzian navat za samuju niaznačnuju krytyku, biare amierykanskich hramadzian u jakaści zakładnikaŭ i prajaŭlaje poŭnuju raŭnadušnaść da sotni tysiač rasijan, jakija zahinuli ci byli skalečany za try hady vajny, jakaja, niahledziačy na hetyja straty, tak i nie zdoleła padparadkavać Ukrainu.

Sučasnaja Rasija — heta kraina z nasielnictvam, jakoje skaračajecca, zavobłačnymi pakazčykami abortaŭ i razvodami, uzakonienaj karupcyjaj i masavaj uciečkaj mazhoŭ.

«Intelektuały ŭ Amierycy stahodździe tamu ŭjaŭlali sabie i zachaplalisia Savieckim Sajuzam, jakoha nikoli nie isnavała — krainaj roŭnaści, prahresu, mastactva i svabody. Ciapier amierykanskaje pravyja znoŭ ujaŭlajuć sabie Rasiju, jakoj nie isnuje ŭ realnym śviecie, krainu, jakaja staić na varcie siamiejnych kaštoŭnaściaŭ i svabod», — adznačaje Sonin

Adnačasova z hetym, kansiervatyŭnyja nastroi na Zachadzie razvaročvajucca suprać tradycyjnych sajuźnikaŭ u Zachodniaj Jeŭropie. Na Miunchienskaj kanfierencyi pa biaśpiecy ŭ pačatku hetaha miesiaca vice-prezident Džej Dzi Vens abvinavaciŭ jeŭrapiejskich lidaraŭ u padaŭleńni svabody słova i ihnaravańni voli vybarščykaŭ u pytańniach, źviazanych z masavaj mihracyjaj. Pa jaho słovach, uzmacnieńnie cenzury, izalacyja papulisckich partyj i erozija demakratyi stvarajuć bolš surjoznuju pahrozu dla Jeŭropy, čym Rasija abo Kitaj.

U toj ža čas, nielha niedaaceńvać Pucina. Džon Bołtan, były daradca pa nacyjanalnaj biaśpiecy ŭ pieršy prezidencki termin Trampa, prama kaža, što Tramp naiŭna ličyć, što ŭ jaho z Pucinym siabroŭskija adnosiny. Nasamreč Pucin vykarystoŭvaje jaho ŭ svaich metach.

Pavialičyć

Kab maksimalna efiektyŭna vybudoŭvać znosiny z Trampam Pucin vykarystaŭ śpiecyjalistaŭ pa psichałohii i prafajlinhu. Naprykład, u čas telefonnych razmoŭ z Trampam jon naŭmysna havaryŭ doŭhimi manałohami na ruskaj movie, prymušajučy amierykanskaha prezidenta čakać pierakładu, pierš čym toj moh adkazać.

Heta dazvalała Pucinu kantralavać razmovu, stvarajučy staranna pradumany naratyŭ i nie dajučy Trampu pierabivać ci chutka piarečyć. Taki farmat znosin davaŭ rasijskamu prezidentu psichałahičnuju pieravahu, pakolki Tramp byŭ vymušany spačatku zasvoić uvieś patok infarmacyi, pierš čym reahavać.

Sudziačy pa klučavych źniešniepalityčnych zajavach, zroblenych Trampam paśla inaŭhuracyi, vyhladaje na toje, što jon pahadziŭsia z bolš šyrokaj kancepcyjaj Pucina: vialikija dziaržavy majuć prava na śfiery ŭpłyvu ŭ svaim rehijonie, u tym liku prava ŭvarvacca ŭ susiednija krainy abo ich anieksavać.

Jak adznačajuć jeŭrapiejskija analityki i čynoŭniki, zakliki Trampa da taho, kab Kanada stała 51-m štatam pa svaim hučańni byli padobnyja da rasijskaj rytoryki pra Ukrainu, jak i jaho razvahi ab nieabchodnaści anieksiravać Hrenłandyju z-za jaje pryrodnych resursaŭ.

«Pucin usprymaje rytoryku Trampa ab ekstraterytaryjalnych ambicyjach jak apraŭdańnie ŭłasnych pretenzij. Jany abodva ŭjaŭlajuć śviet, pierapaździeleny i z novymi miežami. Naradžajecca strašnaja novaja impierskaja rečaisnaść», — cytuje WSJ słovy byłoha ministra zamiežnych spraŭ Litvy Habryelusa Łandśbierhisa.

• 10
• 2
• 2
• 6
• 1
• 3
• 1
• 0